رأي ومقالات

إبراهيم عيسي البيقاوي : قصائد بالعاميّة حول الشوق والزيارة والأماني والظروف


[JUSTIFY]لما آخــر مَـرّة زُرتَـك وفى دواخلى الشّوق بِنَادى
كُنــت فـَـاكِر إنّى ألقَـاك فى عيـونك ريـدى بَـادِى
إلّا جِيــت وَلْقِيتُو قلبَكْ خَتّ موضوع ريدنا غَادِى
***
إنـتـَ زهــــرة أُقـحُــوانة والخــديد ريَــان ونــادى
لو يمسّى الليل عليــها أو يَجِيــها نَسِيمُـو هــادى
تَسمُو فى عَالَمْ جميلْ ابداع خيالى وماْ اعتيـادى
***
يا حــلاة البسمــــة فيــــكَ يا زَهَــــر فَتّـــــح يدابـو
نِحنَ مُشْتـــاقين نَجِيــكَ والقليــــب تصبيـرنا سَابُـو
راحْ يَفتّـش عن عينيكَ فى اللّى جايين واللّى غَابُـو
***
الــــوداع يا غــالي مُر مَذَاقو للـــروح والعيــون
يَعذّب القلبْ الرّهيف يَصْلِيهو بالشوقْ والشجـون
والفُــراق قاسى وصَعِيب لو بالسفـر أو بالمَنُـون
***
كان مُناى يا سـالى نحيا فى دنيا ماليها الحنان
لا مـآسى نقاسى فيـها ولا خصومة مع الزمــان
والأمـل هسّـه الفَضَل نتـلاقى فى عالى الجِنـَـان

____________________________________________
قصيدة: أحلى الأمانى
تأليف المهندس/ إبراهيم عيسى البيقاوى 1979م

يعنـى تسـأل عن ظروفـنا بعدمـا اتنكرت فعــلاً
شِن بجيب جواب سـؤالك إلّا أهـلاً بيك وسهلاً
***
نِحــنَ يا غـالى المحبّــة خلّــتنا نتحــاشى الملامـة
مهما تعـقِد لجـبينــك ليــكْ نَفِـــرْ أحلى ابتسامــــة
حليــلا أيــامنا الجميلة حليــل أغـــاريدا وكلامـــا
ما خلاص شَقّيت طريقك وقُلْتَ لينا مع السلامــة
***
نِحْــنَ مِنْ يـــوم ما افترقنـــا ربّــنا القادر حمانـا
لا المآسى نقاسى فيــها ولا قلوبنـــا مُعَذّبانـــــــا
عِشْنَــا فى قلوبنــا القناعة نسينــا أيامك معانـــا
واصبحت أحلى الامانــى جميلة بِتْظَلِّـــل سمانــا
***
نِحْنَ ما أرواحنا طَيْبَة لا بْنَسِيبك لا بْنَخَاصْمَك
ولَو تَطـُول بينَاتْنَــا مُدّة نَبْقَى نَشْتَاق لكلامـــك
طَالَما اتْنَكّــرْتَ إنْتَ والحبيب واقـف امامــــك
أبقـى حَاسِبْ لظروفـك ومَا بَكتّرْ فى ملامــــك

قصيدة: موضوع ريدنا

تأليف المهندس/ إبراهيم عيسى البيقاوى 1980م
[/JUSTIFY]


تعليق واحد

  1. [SIZE=4]سلامات يا باشمنهدس .. طالما الشعر بالعامية كان تخليهو كلو بالعامية، لأن حشر بعض الكلمات الفصحى مثل (أقحوانة) بتخليهو تقيل شديد .. هسي القصيدة دي قابلة للتحلين والغناء (فيها جرس موسيقي .. قول لي خلاص يا زرياب) بس لو اتلحنت .. الفنان لو ردد (اقحوانة) دي 3 مرات، أكيد ح يجيهو التهاب حلق، ويبقى في القرض والفيكس. لك الود.
    [/SIZE]