كوش نيوز .. أخبار السودان بين يديك

عادل الصادق المكي : المخابرات في غرفة نوم العقيد



شارك الموضوع :

[JUSTIFY]شغل المخابرات شغل نضيف.. لو دايرين يطلعوك السما يطلعوك.. ولو دايرين يودوك في ستين داهية يودوك.. يودوك ما تعرف الوداك منو.. ويطلعوك وتفتكر إنك بي فلاحتك طلعت السما.. وبعد ما تتغا.. وقلبك ينسدا عليك.. يجوك ويقولو ليك أصحى يا بريش.. نحن الذين رفعناك درجات.. أها إن بقيت داير تبقى في درجاتك دي.. أسمع نضمنا وأوعك تكاجرنا.. المخابرات الأمريكية ما من شك أنها أقوى مخابرات على وجه الكرة الأرضية.. ومدخلا خشما ونخراتا في كل شي.. وفي كل حلة من حلال العالم تلقى عندها عميل أو اتنين.. شغالين لحسابها.. وأوعى واحد فيكم يفكر في يوم من الأيام إنو مطلوق ويبرطع ساكت.. كل برطيعة مرصودة.. وكل نطيطة محسوبة.. النضم دا الجابو إني لقيت تقرير قالو من المخابرات الأمريكية (خليكم شاهدين أنا قلت قالو) التقرير عن القذافي.. وعن ملابسو الداخلية.. أها شفتو جنس النضم دا؟.. ونحن ندسدس ونضمضم.. شي سراويل وشي عراريق وفوق العراقي جلابية وفوق الجلابية عباية وشال.. غايتو المخابرات علا تكون مجندة ليها قملة حتى تقدر تعرف.. باكر دي إن الواحد فينا اتلوم في أمريكا يملصوهو زي ما هو.. ويحدسو زول زول.. تقرير المخابرات بقول إنو العقيد قاعد يلبس ملابس (داخلية نسائية).. ويحوم بها وينوم بها ويقوم بها.. وبعد مرات يكون لابسن ويقابل الرؤسا والملوك.. ويحضر بهن مؤتمرات القمة.. وينهر وينهزر في الناس القدامو.. (والله خايف باكر دي يزعلو من زول ويمرقوهو لينا ما قاعد يلبس كلوكلو لا نسائية ولا رجالية).. وقالو في التقرير إنو الحكاية دي لما يكون زائر لدولة يدخل المسعولين في ضفورهم وخصوصا بجيب معاهو فراشو ويفرشوهو ليهو عشان قاعد ينوم بالهدوم اللات النسوان ديل.. بصراحة الحتة دي ما فهمتها.. علاقة الفراش بالهدوم شنو؟.. الشي البعرفو إنو الفراش واااحد للضكور واللاناتي.. كان مرتبة وللا كان برش.. علا دا يكون نظامن ما عندي بيهو خبر.. طبعا النضم دا ما دخل راسي.. زول حاكم ناس أربعين سنة بي هدوم النسوان؟.. لا لا يا ناس السي آي أيه قولو نضم غير دا.. التقرير برضو بقول القذافي كان عندو دبدوب حق لعب زي حق الحبيّبة القاعدين يهدوهو لي بعض في عيد الحب.. ولما الواحد يزعل من حبيبتو يقول ليها جيبي لي دباديبي.. زمان لما الحب كان حب كانت الواحدة تهدي لي حبيبها طاقية أو منديل.. والمبسوطة من حبيبها ودايراهو يبقى قداما تهدي ليهو سكين ضراع.. وعكاز مضبب.. هيع.. أرجع لي دبدوب القذافي قالو اسم الدبدوب (تيدي).. وهي دبدوبة انتاية.. كان لو ما رقدت واتوسدت سدرو ما بيقدر ينوم.. في نضم المخابرات الأمريكية.. وفي نضم تاني كتير ما بقدر أكتبو أخاف يقولو قاطعو من راسي ويخلو المخابرات وينشبكو فيني أنا.. ناس الدنيا ديل حليلكم منهم.. والله يكفينا شر السي آي أيه ويصرفا مننا ويشغلها في رقبتها شيالة الحال.!!
[/JUSTIFY]

عادل الصادق المكي
اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.