كوش نيوز .. أخبار السودان بين يديك

بجلّد العناقريب وبركّب الدشوش وبشاهد بايرن ميونخ



شارك الموضوع :

بجلّد العناقريب وبركّب الدشوش وبشاهد بايرن ميونخ


< في مهن طبعا انتهت ...بقى لا وجود لها. < اتلاشت..مشت وين ما عارف؟. < التكنلوجيا والتطور العلمي طبيعي ان يقضي على بعض المهن - وطبيعي كذلك ان تظهر مهن وحرف جديدة. < خليك حريف. < في زول كان ساعتي...هسع قلب موبايلاتي ..بقى بدل يصلح الساعات ..بصلح الموبايلات. < دي برضو حرفنة. < في زول هسع في الدنيا دي بصلح ليه ساعة. < زمان اهم زول ...طول وعرض ..تلقى شايل ليه (ساعة) عاوز ليها (حجر). < هسع ساعة شنو البركبو ليها (حجر). < الساعة تبوظ او يقيف حجرها ..اجدعها طوالي. < الفاضي ليه لي ساعة منو. < الساعة تلقاها بـ (10) جنيه ..وحجرها بـ (25) جنيه. < ليه انا عاوز اقلبها (طاحونة). < هسع علاقة الساعة بالطاحونة شنو؟. < علاقتها (الحجر) يا جماعة ..خليكم متابعين. < الساعات في حد ذاتها اتراجعت ...الكلاسيك فقط البلبسوا ساعات. < زمان برضو كان جلاد العناقريب ليه (شنّة ورنّة) ...اتذكر زمان وقت كان جلاد العناقريب بكوريك في الحلة بجلد العناقريب وبصلح السراير ..كانت الحلة كلها تطلع على الابواب. < اي زول عندو (عنقريب) يطلعو ليك ..الشايل ليه حبال والشايل ليه كراع سرير... والعندو (بنبر) ..والبجي يسأل ساكت ويرجع. < في ناس كدا ..ما بتشروا وما بصلحوا ..بس بسألوا. < يزحموا الناس في (صفها). < جلاد العناقريب في نفسو ...يعمل ليك فيها فاضي وجدولو ما بسمح يمسك ليه (عنقريب) جديد. < ويقعد (يترتر) في الناس ..ويضاير في حبالو ..وكل دقيقة والتانية يقول ليك (الحبال) بقت غالية. < هسع بالمنطق كدا ..ما ممكن (جلاد عناقريب) يحوم في الرياض او المنشية او قاردن سيتي او الصافية ويكورك بجلد العناقريب وبصلح السراير. < ديل السرير لمن يتكسر ..بجدعوه ..يصلحوا ليه شنو؟. < اما (العناقريب) فهي ما سمعوا بيها ..ولا شافوها ..هسع تلقى في جماعة قالوا (العنقريب) دا شنو؟. < الغريبة الزول لمن يموت بشيلوه بـ (عتقريب). < والعريس لمن يجردتقوه ..بجيبوا ليه (عنقريب). < اذن (العنقريب) مازال يحتفظ بمكانته ..ومازال حاضرا في حياة الناس في السودان في اهم مشهدين في الدينا ...(العرس والموت). < قالوا ليك واحد بجلد العناقريب وبصلح السراير ...حايم في الرياض (6) شهور بكوريك انا بجلد العناقريب وبصلح السراير ..زول قال ليه تلت التلاتة كم ما في؟. < ما في زول عبرو. < زولكم من تسعة صباحا لي ستة مساء ..حايم في شوارع الرياض : (انا بجلد العناقريب وبصلح السراير). < شفع الرياض ..فاكرنو (اجنبي). < والكلام البقول فيه دا ذاتو ...قايلنو (روسي). < ما فاهمين اي حاجة. < في واحد في الحلة عندو (دكان) في الرياض من (ولاد الجزيرة) شاف الزول دا حايم اليوم كلو يكورك (انا بجلد العناقريب وبصلح السراير)..ثبتو ليك ..قال ليه يا زول الناس ديل ما عندهم (عناقريب) ما تتعب ساكت. < وسرايرهم ذاتها متينة ولو اتكسر فيها واحد بضربوا لمحل الاثاثات ..ما بجيبوك انت. < جلاد العناقريب قال ليه : طيب انا اعمل شنو؟..دي الحاجة الباكل منها عيش ..وانا ذاتي ما بعرف في الدنيا الكبيرة دي غير تجليد العناقريب ..وتصليح السراير. < ود الجزيرة مفتح ..قال ليه انت لمن تكورك بجلد العناقريب وبصلح السراير ..ضيف للحاجات دي وبركب الدشوش وبظبط القنوات...(خليك مفتح). < جلاد العناقريب ..قال ليه لكن انا الحاجات دي ما بعرفها...ولا حصل اشتغلتها ..واول مرة اسمع بيها عندك. < ود الجزيرة قال ليه انت قالوا ليك اشتغلها ..انا قلت ليك كورك بيها ساكت..بعدين وقت تدخل العمارة او الشقة عشان تركب الدش او تظبط القنوات ..بتلقى ليك حاجة بتعرف تصلحها. < بعدين لو جابوا ليك (كباية عصير) ما خسرانة معاك. < جلاد العناقريب ...سمع الكلام وبقى يكورك : (بجلد العناقريب وبصلح السراير وبركب الدشوش وبظبط القنوات). < يا زول قبل ما يكمل كلامو ..البلكونات دي كلها فتحت ..والنسوان طلعن بي (ريموتاتهم). < زولكم لقى نفسو بتحاجزوا فيها ..رجعت ليه ايام زمان وقت كان مسيطر على السوق. < قال ليهم يا جماعة روقوا ..اصبروا ...الحكاية دي بالجدول وبالبرنامج ..الزول لو ما حجز قبل اسبوع ما يقيف قدامي. < واحد من ناس الطوابق الفوق ..جبدوا ليك ..وقال ليه شقتي في الطابق العاشر عاوزك تركب لي (الطبق). < جلاد العناقريب قال ليه : طبقك دا ما معاه (عنقريب) رجلو مكسورة...(والله اصلحو ليك جنس تصليحة). < الزول قال ليه يا زول عنقريب شنو؟..انت زول (مخرف). < جلاد العناقريب بقى مفتح ..قال يا جماعة تركيب الدوشوش وبرمجة القنوات الاولية فيها للزول العندو عنقريب عاوز جلاد او سرير مكسور. < قلت ليكم بقى مفتح ...ما صدقتوني ..قعدتوا تغالطوا. < في واحد من الجماعة قال ليه : والله انا مع (الطبق) عندي (بنبر) عاوز جلاد. < جلاد العناقريب طلع ليك معاه. < دخلو ليك في (شقة) الباب ذاتو ما بتعرفو من وين؟...الباب زي الدولاب واحد. < ما في اي فرق. < الحيطة زي السفرة. < البلاط تقول لحاف. < جلاد العناقريب (اتهجم) في الدنيا دي جنس (هجمة)...قال بالله في السودان دا في ناس عايشين العيشة كدا. < طيب مالهم بضايقنوا في موية الفول. < معقولة ..ديل تلقاهم ما بعرفوا (رفع الدعم من المحروقات)..واكيد ما حصل سمعوا بيه. < ديل تلقاهم (الجداد) البلدي ما بعرفوه. < جلاد العناقريب قال عشان يستوعب الحكاية ..قال لي صاحب الشقة كدا في البداية جيب لي (البنبر) ..عشان افهم الوضع بعد كدا بركب الطبق. < صاحب الشقة قال ليه لكن انا (البنبر) انا ما مستعجل عليه ..انا عاوز في الاول (الطبق). < الجلاد قال ليه يا زول اصبر ما تضيق ..هسع انت البضيقك شنو؟..عندك شقة حلوة زي دي وكمان ضايق. < والله انا يكون عندي شقة زي شقتك ...ود خالتي المشى الدهب ما يضيق. < ود خالتو هسع الدخلو شنو في الموضوع دا. < المهم الزول جاب ليه (البنبر)..قعد ليك فيه اليوم كلو يجلد فيه. < من صبحت لمن مغربت هو يجلد في البنبر..يفك ويركب فيه عشرين مرة. < وكل مرة يجيبوا ليه كباية عصير. < صاحبكم لمن سمن من العصائر. < اخر حاجة ..قطع ليك (الجك) كلو ..واذان المغرب اذن ..قال لي صاحب البيت اسمع حاسبني على (البنبر) انتهى.. بكرة بجيك للطبق. < بتاع الشقة حاسبو ليك لمن اتبسط ..زولكم نزل يعد في القروش ..وهو يردد والله لو عارف (الاطباق) فيها عصائر وقروش كدا ..كنت من (عامن) اول اشتغلتها. < ضعيت عمري ساكت في العناقريب والسراير. < زولكم اليوم التاني طبعا ما رجع ليه ..وبدل حتى الشارع واصبح يكورك في شارع تاني ( بجلد العناقريب وبصلح السراير وبركب الاطباق الهوائية وببرمج القنوات). < واحد تاني سمعو ليك بقول (ببرمج القنوات)..قال ليه اقيف ..اقيف يا ود الناس تعالي برمج لي القنوات ولحقنا مباراة بايرن ميونخ ومريخ الدوحة. < صابحكم جلاد العناقريب اول مرة يسمع بـ (بايرن ميونخ ومريخ الدوحة)..عبجبتو ليك الحركة ..قال ليه جدا ببرمج ليك القنوات ..بس ما عندكم كراع عنقريب طاشه او بنبر عاوز جلاد او سرير مكسور. < الزبون الجديد قال ليه بالحيل ..عندنا (كرسي عاوز جلاد). < الجلاد قال ليه بس جيب لي الكرسي اول حاجة اجلدو ليك ..وبعد كدا اقبل على برمجة القنوات. < جاب ليه الكرسي ..جلدوا في خمس دقائق هذه المرة ..الجلاد المرة دي قال احسن يجرب شغل القنوات والبرمجة دي وقت جابت ليها (بارين ميونخ). < زولكم قعد ليك في (الريسفير) ومسك ليك (الريموت كنترول). < اول حاجة عارفين الزول الشفت دا جاب منو؟. < جاب ليك (ضفر) حايم في مطار الخرطوم ما لاقى ليه تأشيرة. < صاحب الدجتل قال هييي ..الريسفير دا كمان بجيب ضفر في مطار الخرطوم. < الجلاد قال ليه اصبر ..ساكت ..والله اجيب ليك (قنوات) في الدجتال حقك دا ...ما سمعت بيها. < شوية الجلاد جاب ليك (ابراهومة يخش ويمرق ما عارف يعمل شنو؟). < الحيرة واضحة عليه. < صاحبكم قال للجلاد ..اها دي كمان قناة شنو؟. < الجلاد قال ليه دي قناة الجرسة. < جرسة شديدة ...(اول انتوا في زول قال ليكم قابلوا بايرن ميونخ في البرد دا). < الجباركم شنو؟. < الجلاد شغال في البرمجة كدا ...جات زيفة حاجة مبالغ فيها. < زيفة بي مطرتها. < صاحب البيت قال ليه دي قناة شنو كمان الفتحتها لينا دي. < قال ليه دي قناة (البرد). < البرد دا براهو بغلبكم تسعة. < شويتين كدا ...المباراة جات. < الرقم الفوق المكتوب مع (Live) مكتوب 19 / صفر. < الصورة كانت ما واضحة. < لا اقول ليكم الواحد كان وراء التسعة (19) لّا اقول ليكم الواحد كمان قدام التسعة (91)...الشيء المتأكد منو (الصفر) كان مكتوب. < والشيء التانية الظاهرة (الكرت الاحمر) ظهر في المباراة (3) مرات. < ضفر دا في الشاشة تشوفو رهاب رهاب ...حاجة كدا زي (السراب) واضح عليه من الصورة انو متأثر باالتأشيرة. < عبدالصمد قاعد في المقصورة ..بفكر في يشيل كروجر. < وكروجر ذاتو يكورك في ناس مالك ..يا مالك (الفزعن خلهن ادرع الباقيات). < الالماني دي تقول مولود في (فداسي). < صاحبكم ظبط القناة على كدا ...واخد ليه (رزمة) قروش وطلع يكورك : (بجلد العناقريب وبصلح السراير ..وبركب الدشوش وببرمج القنوات وبجيب مباراة بارين ميونخ ومريخ الدوحة). < ملحوظة : مريخ الدوحة دي تاني ما بنفكها ليكم ..(وقعتوا معانا). هوامش < الطبيب قالوا منع ضفر من (الفول) الي حين انتهاء مباراة بايرن ميونخ ومريخ الدوحة. < سعيد السعودي قال لو عارف الحكاية صعبة كدا ..ما كنت قفلت التلفون ..وكنت براي اخليت خانتي. < بيني وبينكم (البرد) براهو كفيل كان باخلاء خانة سعيد السعودي ..خلوه (بايرن ميونخ). < ترواري قال ...في الهلال ما كان في (برد) كدا. < لسه ..ح تتنفخوا برد لمن تفهموا حاجة. < بارين ميونخ جايكم بي تلجو. < ناس الهلال خلوا شغلتهم وقبلوا على مباراة بايرن ميونخ ومريخ الدوحة. < غايتو ناس الهلال ديل يمسخوا الحاجة. < ناس شفوت ...الحاجات الما بدورها ..ما بتلفتوا فيها. < مسخوا المباراة على ناس المريخ. < المريخاب بقوا وقت تجيب ليهم سيرة بايرن ميونخ ..يضايروا ..و يتطرطشوا الكلام. < .... < عاجل : لو اتجاوزنا ليكم (البرد) ...ما بنقدر نتجاوز بايرن ميونخ. [/SIZE]وإن طال السفر - محمد عبد الماجد صحيفة قوون

شارك الموضوع :

3 التعليقات

      1. 1

        كويس إنك زاتو إقتنعت وصدقت إنوا المريخ وصل العالمية وإسمو حيتعرف في اروبا وحيلعب إن شاء الله مع بطل اوربا والعالم…
        المشكلة في الحاقدين التانين ديل حتمسكهم صدمة يوم يشوفو سيدهم لاعب مع بايرن ميونخ….
        وخليكم يا هلالاب مدى الحياة في الحٌفر وما فاضين للمحليين لمن نفضى ليكم موت بغيظكم…
        وبالتوفيق للمريخ السوداني العالمي.

        الرد
      2. 2

        قول واحد الحمى طايرة ليك في رأسك .. تمش وراء المريخ ده الا اخليك زي بتاع العناقريب ده .. تحوم بالشوارع كلها تكورك المريخ المريخ المريخ المريخ لا بدون عصير ولا قروش..

        بالله مما اعلنوا عن هذه المباراة كلامكم بقى برة الشبكة هضربة شديدة .. الله يكون في عونك

        الرد
      3. 3

        [B]يا محمد عبد الماجد نقلت المريخ الى العالمية بهذه السرعة لم تمنحكم اى فرصة ترتيب عشان تنتقلوا معها عشان كده انتو ما قادرين تصدقوا هذه النقلة والله الا تخلى الكتابة بعده لان المريخ سوف يلعب بعد هذه المباراة مع بطل روسيا وبطل النمسا خليك مع زريبة العيش[/B]

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.