بابكر سلك

ستة بوسترات والبخت ضايع


> معز التمشيطية
> امس مشطها صاح
> ارتكب الهلال ضربة جزاء في اول دقائق المباراة
> معز مشاها
> مشطها
> يخطئ كعادته ولكن لا يظلم
> بالمناسبة
> معز التمشيطية هو يحكم لقاءات المريخ واهلي الخرطوم دائماً
> المهم المعز مشطها
> واكتملت التمشيطة
> بالغاء هدف التعادل الذي احرزه الميرغني
> يخطئ طبعاً ولا يظلم
> ولكن الميرغني ايضاً لم يستغل فارق السرعات بينه وبين اولاد فاطنة
> فاولاد فاطنة مشهورين بالتقل في الحركة
> ودي غلطة كبيرة يا حمد كمال
> المهم
> القط الكاميروني متعودة
> طواااااااالي بيرقر بالبيض هو الموجود والمطلوب
> وحتي الهدف الذي تم الغائه
> كان بيرقر بالبيض
> مكسيم بالبيض على الطريقة الزنزبارية
> كديس الجداد
> وكاريكا لسه زعلان
> بيعة الكابتنية داخله عليهو شديد
> ايها الناس
> سمعنا انو الفاتح النقر بحزم في حقائبه
> لي اسي ما فرتق باقي الشنط
> لملم يا كوتش
> والسبب هو ما صرح به للموقع الرسمي
> الكلام القالوا عن ماسورية محترفي الهلال
> وماسونية تسجيلهم
> فالماسونية جابت الماسورية
> المهم النقر قال كلام
> الغريبة قالوا في الموقع الرسمي
> ونفاهو برضو في الموقع الرسمي
> الموقع ده ما رسمي ولا شنو ؟؟؟
> المهم النقر قالو
> والكلام ده زعل فاطنة
> والبزعل فاطنة في الهلال يا كوتش بنطرد
> الدور علي كاريكا
> فطومة زعلانة منو شديد
> ايها الناس
> صحيح ماسمعناهو عن بيع الهلال لحقوق البث بتاعت مباراة كي ام كي ام لشركة خاصة ؟؟؟
> مامتأكدين
> لكن سمعنا قالوا باعها للشركة بي سبعين
> والشركة باعتها للنيل الازرق بي ميتين وخمسين
> المية وتمنين اولى بيها ياربي الشركة ولاَّ الهلال ؟؟؟
> فطومة افيدينا
> باقي بنصدق كلامك
> موش انتي الناطقة الرسمية والمنسقة الهلامية اقصد الهلالية !!!!
> ورينا يا فطومة واغنينيا عن البحث عن حقيقة الموضوع ده.
> المهم
> اكتب قبل لقاء القمة بين الشفوت والنمور
> وشعار الشفوت من عزام ولي قدام
> موعودون بالثلاثية إن شاء الله
> غايتو ضفر لو جاب قون
> التلاتة مضمونة
> ايها الناس
> في ما يتعلق بالتشجيع والروابط المريخية
> الموضوع بدأ ياخد مناحي اخري
> مناحي لا تفيد المريخ بقدرما تفيد اشخاص بعينهم
> ولأننا لا نسكت على ما يضر بالمريخ
> سنعود للموضوع بوضوح شديد
> لكن مكسيم امورو واضحة شديد
> بيرقر بالبيض طوالي
> جيبي الكمونية يا بت
> القط ده يمكن تعجبو يخلي البيض ده
> المهم
> بالقرآن مريخنا مصان
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> البلد كلها بوسترات معلقة لينا
> نحنا في المدرسة ما قرينا
> نقرأ في الشارع يا والينا !!!!
> المهم ستة بوسترات معلقة لينا
> البوستر الاول
> انتخبوا مرشحكم رمز البتضلل
> او رمز البتفلق
> من اجل اكمال مشاريع التنمية
> من اجل المرأة والرجل والطفل
> من أجل شاي بدون تِفل
> من اجل القضاء على الجقر
> والصورة يا والينا صورة جقر
> البوستر التاني
> كشكش للعلاج بالقرآن
> رقية شرعية
> اخراج الجني واخلاء الجنية
> علاج الحركات القردية
> وتنمية القدرات ال…الفردية
> البوستر التالت
> آدم كديس
> لعلاج البواسير
> والمرض الخطير
> للتكبير والتصغير
> لعلاج ورم المواسير
> لتبييض الاسنان واعادة بريقها بالجير
> البوستر التالت
> الفنان الكبير بنادي الجيش
> حفلة من امها تخلي النفوس بالشجن تجيش
> لا يوجد إلغاء ولا في تفتيش
> تعال ومعك آخرون وأجمل اللحظات عيش
> البوستر الرابع
> علاج البشرة بالاعشاب
> تضخيم مناطق معينة وهامة وتصغيرها
> تفتيح بشرة وتسميرها
> اطالة الشعر وتكبير الشعر برضو ونفخ الشلاليف
> لدينا اخصائيين للجضوم وتدويرها
> ازالة النمش والشلش والشعر الاتنفش والاتنكش
> نفخ الساقين وتدويرها
> ازالة البقع والقلب المن البورة انفقع
> وعلاج العنوسة والتيوسة والبت العرسان تكوسها
> البوستر الخامس
> الهجرة الي امريكا
> عشان تغير الحال الفيكا
> يمكن تضرب معاك واللوتري تجيكا
> يمكن تتخارج بالمزيكا
> وتفارق وطن الكبري الداير يرميهو الجقر فيكا
> البوستر السادس
> استاد الجوهرة الزرقاء
> يسمني ويعميكا
> والينا
> عايشين فظائع
> ستة بوسترات والبخت ضائع
سلك كهربا
ننساك كيف والقراية مرقت من المدرسة بقت في الشارع..انتخبوا..القراية ام دق
والي لقاء
سلك


تعليق واحد