محمد عبد الماجد

بكري المدينة (سكينتو) حوبتها جاءت


لو الأزمات بتجاوزها بي (بيان)…جامعة الدول العربية ما كانت عجزت عن حل اي مشكلة في الشرق الأوسط
الهدف الوحيد الذي سجله بكري المدينة في عزام – سجلو بعد (9) خرفان وبالإشتراك مع (باسكال)

في مباراة المريخ ومريخ الفاشر تم الاعتداء على قوات الشرطة.
دي حصلت؟ – من الـلـه خلقكم سمعتوا بي جمهور يعتدي على (الشرطة).
تم اخلاء الملعب من (الشرطة).
دي سمعتوا بيها – اخراج الشرطة برة الملعب.
والاتحاد والشرطة والمريخ طلعوا (بيان) قالوا فيه نحن زي السمنة على العسل.
ما في اي مشكلة.
تجاوزنا الازمة.
يا عالم في الدنيا دي كلها في ازمة بتجاوزها بـ (بيان).
لو الازمات بتجاوزها بي (بيان)…جامعة الدول العربية ما كانت عجزت عن حل اي مشكلة في الشرق الاوسط.
نحن كنا بقينا الدولة العظمى الاولى في العالم.
وما كانت في حاجة بتغلبنا.
كان السودان بقى (نمبر ون).
ما كان كوبري المنشية لمن اتقفل ..اتجهجهنا ..وغلبتنا القعدة.
ما كان رأسنا ضرب في انبوبة غاز.
يا جماعة ما في (بيان) بحلوا ليه مشكلة.
بيان شنو؟..كفاية علينا جامعة الدول العربية.
عاوزين محاسبات.
عاوزين جزاءات.
عاوزين عقوبات.
ما تساوا لينا بين الجاني والضحية.
المواضيع ما بحلوها كدا.
الاتحاد العام بتاع ناس اسامة عطا المنان ..المباراة توقفت ساعة كاملة ما شفنا منهم غير (البيان المشترك).
ولا قالوا كلمة.
غير تصريحات خجولة لاسامة عطا المنان يقول فيها (تجاوزنا الازمة).
قلنا ليهم الغريق بيجي قدام.
لو دي طريقتكم بتشوفوا كوارث كتيرة.
خليكم عارفين بس ..انتوا السبب.
اتحملوا المسؤولية وقت الفأس يقع في الرأس.
ما تجوا بعدين تعلقوها في الجرايد.
فهمنا المريخ والاتحاد والشرطة اتجاوزوا الازمة ..وبقوا زي السمنة على العسل.
المعلق.
معلق المباراة الذي تم الاعتداء عليه ..ذنبو شنو؟.
كان على الاقل تدوه (سطر) في البيان.
بيانكم اصلو مافيه قيمة …كان تكتبوا ليكم فيه سطر.
قالوا ابدا.
الموضوع انتهى بي سلام.
المباراة الثانية من تلك المباراة التى شهدنا فيها خروج الشرطة والاعتداء على معلق المباراة ..حدثت اشتباكات وضرب.
مباراة شندي برضو كان فيها تجاوزات كبيرة من قبل المريخ.
ولا في زول بقدر يقول حاجة.
اتحادنا اتحاد غداء الجمعة دا – ما تنتظروا منو حاجة.
لأن الاتحاد العام لم يعاقب المريخ على احداث مباراة مريخ الفاشر ..ولم يفتح الـلـه عليهم باكثر من (بيان) لا يخرج من سماكة..حدثت كوارث في مباراة شندي.
قالوا شنو؟.
قالوا الشرطة قررت عدم استعامل الغاز المسيل للدموع.
شفتوا نحن عندنا شرطة مثالية كيف؟.
منتهى الرومانسية.
مشينا مباراة المريخ والاهلي شندي ..وتعالوا شوفوا للاحداث الدامية الاخرى.
اعتداء بالبونية ..وضرب لحكم المباراة وعنتريات ..والفاظ ..وحاجات ما عندها اي علاقة بالسلوك القويم.
ويقولوا ليك الصحافة الهلالية.
ويقولوا ليك مجلس المريخ ح يشتكي صحف الهلال في المجلس.
عاوزننا ما نقول اي حاجة والشرطة بتم اخراجها من ملعب المباراة.
والوهم والخرافات تسيطر على جماعتنا.
خرفان …ولحوم ..وضبائح.
وعاوزين اعلام الهلال ما يتكلم عن هذه الخرافات.
والمريخ يلعب في شندي ..وتحدث نفس الاحداث.
واعلام الهلال مفروض ما يتكلم عن هذه الاشياء.
ضرب واعتداء على الحكام.
واعلام المريخ بيخترع ليه (ضربة جزاء) بيقعد يتكلم عنها.
والحديث عن خروج الشرطة لا.
الحديث عن الاعتداء على معلق المباراة لا.
الحديث عن الاعتداء على مساعد الحكم في مباراة الاهلي شندي والمريخ لا.
الحديث عن الارهاب الذي تعرض له حكم المباراة صديق الطريفي لا.
الاتحاد العام لأنه لم يعاقب المريخ ولم يوقف هذه التفلتات ..حدثت تجاوزات اخرى في شندي كما اشرنا.
وسوف تحدث احداث دامية اخرى في مباراة المريخ والامل اذا لم ينتصر المريخ على الامل.
واي مباراة لا يفوز فيها المريخ ..سوف تكون فيها مثل هذه التجاوزات.
وهذا امر طبيعي اذا كان الاتحاد العام لا يعاقب على هذه التفلتات.
ومجلس المريخ لا يدين هذا السلوك.
واعلام المريخ يترك كل هذه الخروقات والفضائح ويتحدث عن (ضربة جزاء) قالوا ان حكم مباراة شندي لم يحسبها لهم.
يا جماعة.
بكري المدينة شغال ضرب جوة الملعب وبرة الملعب ..وما في زول بيسألو.
لا ادارتو قادرة عليه ..ولا الاتحاد العام قادر يعمل حاجة.
زولكم شغال بالبونية ..ضرب من طرف.
بكري المدينة طبعا حكايتو حكاية.
بكري والسكينة.
بكري المدينة لمن كان في الهلال كان مشهور بي (سكينتو)..وقد كتب مزمل ابوالقاسم وبابكر سلك وهيثم كابو كثيرا عن هذه (السكينة).
كتبوا ليهم سلسلة كاملة عن (السكينة).
نحن ما كنا فاهمين حاجة.
وما كنا عارفين سر الاعجاب بي بكري المدينة شنو؟.
جماعتكم طلعوا عاوزين (السكينة).
كشفنا سرهم.
اول انتوا فاكرين المريخ سجل بكري المدينة عشان كورتو؟…ابدا.
المريخ سجل بكري المدينة عشان (سكينتو).
الضبائح الدورت في المريخ ..كل يوم يضبحوا ليهم (3) خرفان لو ما بكري المدينة وسكينتو – الخروف بي (150) جنيه ما بضبحوا ليكم.
السكينة اشتغلت – ضبائح جد.
لكن بكري المدينة ما شفنا ليه حاجة.
الهدف الوحيد الذي سجله بكري المدينة في عزام – سجلو بعد (9) خرفان وبالاشتراك مع (باسكال).
غايتو قدرتوا توظفوا (السكينة)..لكن بكري المدينة الى الان ما قدرتوا توظفيه التوظيف الصحيح.
الـلـهم إلّا الاعتداء على سائق الهايس وحكام المباريات.
بكري المدينة وقت كان في الهلال ..كان لو ما جاب هدف الليلة بجيب بكرة ..ما كان بصوم الصيام دا كلو.
وكان بكري المدينة شكلاتو في حدود معسكر الهلال.
ما كان بنخليه يطلع برة.
يعني ممكن يعمل شكلة مع سيسه ..يضاربو لمن يجيبو الدم.
وممكن يطلع السكينة لي تراوري.
وممكن لو بالغ كدا يعمل ليه مشكلة مع غارزيتو ..ما اكتر من كدا.
وكان مع شكلاتو دي بيجيب اقوان ..وبطلع نجم المباراة.
بكري المدينة مشى المريخ ..مشاكلو طلعت برة.
بقى يضارب في الجماهير.
مرة عامل ليه مشكلة في شارع النيل مع سائق عربة هائس.
ومرة مع الحكام.
بكري المدينة (سفاري) ما مرق منو.
زولكم شغال (خبط).
ضرب جد.
الطريف في الامر ناس جريدة (الصدي) جابوا ليهم صورة فيها اعتداء بكري المدينة بالبونية على سفاري.
لمن سفاري راجع ورا.
سفاري بي خبرتو دي كلها عاوز يقع.
الاعتداء ظاهر من بكري المدينة ..وناس جريدة الصدي قالوا الصورة بتأكد ان هناك ضربة جزاء لصالح المريخ.
انتوا ناس جريدة الصدي ديل فاكرين سفاري دا الى الان بيلعب في المريخ.
ضربة شنو؟.
انتوا باقى حكم مباراة المريخ وعزام خرب طبعكم.
حكم مباراة المريخ وعزام حسب ليكم ضربة جزاء برة الخط…وفاكرين بهذه الطريقة ممكن يحسبوا ليكم ضربة جزاء وهمية.
في اي لحظة تحتاجوا فيها لي ضربة جزاء ..الحكم بيعدها ليكم.
بعدين انتوا تعالوا هنا بكري المدينة مالوا غامد ايدو كدا.
زولكم دا الظاهر عليه الى الان (محنن).
يكون ما طلع الحنة.
بيلعب الى وقتنا هذا بي حنتو.
يا بشاشة عليك الـلـه نزل لي الصورة بتاعة اعتداء بكري المدينة على سفاري.
عاوزين نشوف (ضربة الجزاء) دي وين؟.
و الـلـه دي حكم مباراتكم مع عزام ما يحسبها ليكم.
في ضربة جزاء بيحسبوها بي اثر عكسي.
غايتو إلا تقلبوا الصورة ..تخلوا بكري (سفاري) – وسفاري يبقى بكري المدينة.
كدا ممكن نقول عندكم ضربة جزاء.
……….
ملحوظة : محسن سيد قاعد يحسب ..عاوز يعرف الامل عطبرة عاوز كم خروف؟.

هوامش

بي صراحة انتوا بدون (خرفان) ما بتغلبو.
بكري المدينة لو ما شم ريحة اللحمة ما بيلعب.
ولا بقدر يضرب ليه حكم.
طبعا ناس المريخ جربوا (العصيدة) قبل مباراة عزام الاولى ما نفعت.
قاموا جربوا (اللحمة).
لقوها ظابطة معاهم.
هسع اتجهوا اتجاه كلي على (الخرفان).
لكن مفروض قروش الخرفان تخصموها من مرتبات غارزيتو وتراوري وبكري المدينة.
قاعدين ساكت.
عماري فترة قيده مع الاهلي شندي تنتهي في ديسمبر.
والكلام ليك يا المطير عينيك.
ما تقعدوا تضيعوا لينا المواهب ساكت.
عماري ووليد الشعلة نجوم المستقبل.
بل هم نجوم هذا العصر.
مواهب حقيقية وحرفنة شديدة.
يا ناس الهلال احسموا مواضيع التسجيلات من بدري.
الهلال يحتاج الى دعم عاجل في تسجيلات يونيو وتسجيلات نوفمبر.
اعملوا غربلة ..وابقوا على المواهب فقط.
…………
عاجل : يا بكري المدينة السكينة لقيت ليها شغلة …خرفان ساكت.


تعليق واحد

  1. لا في العامية السودانية ولا في العربية الفصيحة مافي حاجة اسمها “سكينة”! الصاح “سكين”، كلامك ده كلام مستورد