مطلقـــــات الواتســاب

طارت إلينا الأخبار.. عبر وسائل التواصل الاجتماعي.. وغيرها من مواقع النت.. بان مواطن سعودي قام بتطليق زوجته لأنو أخوها مدير قروب في الواتساب قام بحذف الزوج من القروب.. حذفو.. الزوج اتحمق.. قال يمشي كمان يحذف أخت مدير القروب من البيت.. سبب غريب.. الزوجة مسكينة قاعدة في بيتها وسط وليداتها.. ويمكن تكون مشغولة بطبيخ واللا غسيل عدة.. يجيها راجلا وفجأة يقول ليها.. انتي طلقانة.. عشان أخوكي حذفني من القروب في الواتساب!! قروب افتراضي في عالم افتراضي.. معمول للونسة والسوالف وطق الحنك.. يبقى سبب في طلاق زوجة في صمة خشما؟ وخراب بيت وتشريد أطفال.. طيب دا لو أخوها طردو من بيتو كان عمل شنو؟؟؟.. اعتقد أن الموضوع موضوع مكاواة.. وراحت ضحيتو الزوجة المسكينة.. لا ذنب لها إلا أن راجلا وأخوها قاعدين يتكاوو.. بعد فترة رجع الزوج وقال إنو هو غلطان وندمان وسافي التراب.. لكن الزوجة رفضت الرجوع.. وقالت إنها هي ما غلطت وما عندها أي ذنب تطلق وما زالت الأجاويد تقوم وتقعد!! وقصة أخرى.. آخر أيضا يطلق زوجته لأنها كانت مشغولة بالواتساب في الوقت الهو كان عاوزها تعمل ليهو الأكل.. وثالث يطلقها.. بسبب صفارة الواتساب.. الليل كلو تكورك في أضنيهم وهي كل مرة تقوم تولع الموبايل عشان تشوف الخبر الجاها أنصاص الليالي دا شنو؟.. .. “بس دي كمان كانت تقفل الموبايل.. أو تعملو صامت” وبعدين ممكن تصبر لمن تصبح الواطا وتشوف الخبر.. لكن في ناس لو ما عرفو الخبر في ساعتو النوم يطير من عيونهم.. وآخر طلق زوجتو لانو فجأة لقى الموبايل حق زوجتو فاتح وزوجتو مشتركة في قروب نسائي.. عادي ما فيها شي.. إلا لقاها هي تشتكي للقروب من معاملتو.. وحتى أخص خصوصياتهم.. تناقشها معاهن.. ونابشاهو نبيشة السواد!! وشايلة حالو ما خلت لو صفحة يرقد عليها.. وبعض عضوات القروب كانن بحرشن فيها.. طلقيهو.. تطيريهو وين راجل زي دا؟.. وحات الله أخير تقعدي ساكت.. وانبرت واحدة مطلقة حكت نفس الوضع بتاعها ودايرة تكبر كومها قالت من طلقتو يا دوب ضاقت النوم.. وعينونها غمضّن.. وسمنت ولونها فتح.. “بلا راجل بلا هم”.. وواحدة قالت ليها اكيد اكيد راجلك دا بيعرف واحدة تانية.. هووووووي فتحي عيونك.. وحكت قصة واحدة صاحبتها راجلها مرّ بنفس مراحل (الكرور) حقك دا.. في النهاية اكتشفت انو معرس بالدس.. وقاعد يمشي ليها بالنهار.. ويجي البيت من المغرب فتيرااااان يرقد ويقبل علي الحيطة ويشخر.. وقد لعب الفار في عب الزوجة وغيرت من تعاملها وهذا ما لاحظه الزوج وتأكد له بعد اطلاعه علي حيثيات اتهام القروب النسائي المشتركة فيهو زوجتو.. وهو ما أخير منها بدل ينضم معاها.. ساقها وداها اهلها.. عشان تسمن ولونها يفتح!!

أيها السادة والسيدات.. فتحو عيونكم.. النت ومواقع التواصل عاملنها ناس بناءً على ثقافتهم هم.. ما ثقافتنا نحن.. ممكن نستفيد منها في أشياء كتيرة.. لكن كمان ما نديها فرصة تخرب بيوتنا.. وتصبح مواقع تشويه اجتماعي، وبدل مواقع (تواصل) اجتماعي تبقى مواقع (تفاصل) اجتماعي!!