زواج سوداناس

(كلنا بكري المدينة) هي عرفت من متين؟


شارك الموضوع :

• المريخاب الايام دي يضبحوا ويسموا.
• خرفانهم برة.
• قالوا ليك في العرضة جنوب الواحد لو اشترى ليه (كبريت) بيدوه مع الكبريت (جلد خروف) هدية.
• الجلود كترت – (اعمل ليكم شنو انا؟).
• بلة جابر نغمة موبايلو (باع).
• تفتكروا ح يتجاوز ليكم موضوع (الخرفان) دا بالساهل كدا.
• اقل كورة بيضبحوا فيها (12) خروف.
• اعملوا ليكم كشف مع خرفانكم الكتيرة دي.
• جيبوا ليكم كراس.
• الجماعة اتوهموا ..وبقوا بتاعين (خُرافات).
• اصلو الخرفان والخرافات ما بعيدة من بعض حتى في الكتابة.
• ضبحوا ليهم (9) خرفان وكتبوا ليك (كلنا علي جعفر)..علي جعفر المسكين بقى يشيل ويرمي في الشبكة.
• اقل غلطة بي قون.
• في شندي علي جعفر عمل ليه (غلطة) لو عملها في الجيش بيعدموه.
• كورة ارضية ..نزل ليها في الارض عشان يرفعها.
• لو قالوا ليه ارفعها ما بقدر.
• غايتو الزول دا عندو (صدفة) اخطر من (القصد).
• المعز محجوب (اتخلع)…الكورة كانت في (الواطة) لقاها في السماء ..ما عرف يتصرف معاها كيف؟.
• عماريه جابها قون.
• كمان عماريه بتلفت.
• امس جابوا ليك علي جعفر قاعد في (الكنبة) تقول عاوز يقلع ليه ضرس.
• زي الزول المنتظر نمرتو في عيادة طبيب الاسنان.
• انت قايل يا علي جعفر لو قعدت في (الكنبة) بتمرق مننا.
• يمين معاك للمقصورة.
• وقت جابوا ليك علي جعفر في مباراة الامس قاعد في الكنبة …اتذكرت صف القعّاد في صالون الحلاقة.
• تقول منتظر دورو في الحلاقة.
• صاحبكم قاعد ..زي التقول ما عمل ليه اي حاجة في شندي.
• كأنو ما كان سبب لهذه (الخرفان) التى ضبحت في استاد المريخ بعد خسارة المريخ من عزام في مباراة الذهاب.
• هسع المريخاب قبّلوا ليك علي بكري المدينة – (بقوا يضبحوا وعليه يسموا).
• ضبحوا ليك (21) خروف – وكتبوا في لافتاتهم (كلنا بكري المدينة).
• كلنا محمد علي كلاي.
• كلنا تايسون.
• كلنا بكري المدينة هي عرفت من متين؟.
• فيصل العجب – عمل ليهم اي حاجة بلعب معاهم 16 سنة بي اخلاق وابداع ..ما قالوا ليه (كلنا فيصل العجب).
• العجب قالوا ليه اكتب خطاب اعتزالك..وبكري قالوا ليه (كلنا بكري المدينة).
• فعلا (كلكم بكري المدينة)…بكري المدينة شغال ضرب بالبونية ..وانتوا شغالين شغب.
• بتشجعوا سوء السلوك؟.
• مرة يطلعوا الشرطة برة الملعب.
• ومرة يقولوا دا ما جمهور المريخ دا جمهور سيكافا.
• اول مرة نعرف ان (جمهور سيكافا) دا مواليد حي الشهداء.
• طبعاً جمال الوالي دا ما بعيد عليه.
• ممكن يجيب (جمهور سيكافا) كلو ويجنسو.
• الجنسية عندو اسهل من (الاسكراتش).
• حاجة بتطلع في لمحة.
• نحن عندنا (جدنا) عمرو (87) سنة ..لافين بيه من مدينة لي مدينة ما عرفنا نجنسو.
• جدنا مشلخ …حافظ ليك معارك المهدية دي معركة – معركة.
• زقاق – زقاق.
• يسمع ليك المعارك زي القصايد.
• سوداني لمن بي غادي.
• لو ما جبت ليه ملاح (الويكة) في الفطور ما بفطر.
• غداهو عصيدة حارة.
• عشاه فطير بي لبن.
• نمشي بيه مركز ..مركز يقولوا لينا جيبوا شهادة السكن.
• نجيب شهادة السكن يقولوا لينا جيبوا جنسية اخوه.
• نجيب جنسية اخوه يقولوا لينا صورة (4) صور.
• نصوروا اربع صور ..يقولوا لينا الضابط الليلة ما جاء.
• الضابط يجي ..(جدنا) يفوت.
• جدنا لمن مات ما اتحصل على الجنسية السودانية.
• راح ساكت.
• لا جنسية ولا رقم وطني.
• ناس النونو والحضري وسالمون وجمال سالم يجنسوهم ليك في (محل مرطبات)..اسهل حاجة.
• على العموم نحن اول مرة نشوف لينا جمهور بدعم (سوء السلوك).
• قالوا (كلنا بكري المدينة)..يعني المباراة كلها (غامدين) ايديهم.
• شغالين ضرب.
• عشان كدا امس الحكام المباراة كلها يرجفوا.
• جماعة قالوا ليهم (كلنا بكري المدينة) تفتكروا ح يحكموا كيف؟.
• راجين منهم شنو؟.
• جماعة طلعوا (الشرطة) وخلوا الاتحاد يسحب قراره.
• ليه حق الحكم امس يجامل المريخ بهذه الصورة …طاقم تحكيم المباراة ما فاضل ليه إلّا في كل هجمة للمريخ يقدم شهادة شكر وتقدير لبكري المدينة.
• وحكم الخط اي هجمة للامل يرفع رأيتو …صاحبكم شاف لافتة (كلنا بكري المدينة) قال تقوم تجيني (بونية) طايرة.
• يا زول اعمل حسابك.
• ضفر عمل ليه مخالفة مع مهاجم الامل وهو في حالة انفراد كامل في الشوط الاول….الحكم اتظارف وكمّل الرشاقة كلها ..ومنح (ضفر) كرت اصفر.
• كان احسن تمنح ضفر (شهادة تقدير) بدل الكرت الاصفر دا.
• نوع المخالفة دي ..شوفوا سيحة يوم الجمعة القادمة ..ح يجيكم ورضا مصطفى الشيخ ح يرحب بيه في فقرة (الامبراطور) ..واول ما تجي حالة (ضفر) التى يستحق فيها (الطرد) مع التجريد من الرتبة (سيحة) ح يقول الجهاز اتعطل.
• جهازكم دا عندو (رقم تلفون) جمال الوالي.
• يكون مخصص ليه نغمة.
• ما بتعطل إلّا في الحالات الزي دي.
• يقوم رضا مصطفى الشيخ يعتذر ويعتذر (لمن تحن عليه) ..ويقول خلاص الاسبوع القادم ح نرجع للمخالفة دي.
• انت يا رضا عاوز ترجع ليها بي (فيزا).
• الشيء وين؟…عشان ترجع ليها الاسبوع القادم.
• تفتكر انت لو رجعت ..نحن ح نكون فايقين للحد دا ..و ح ننتظرك.
• سيحة تاني يرجع لينا ويقول : (والله انا قاعد في المباراة دي من الصباح) بس الجهاز اتعطل.
• طبعاً قاعد من الصباح بمخمخ في (التسللات).
• هدف الهلال تسلل.
• في ضربة جزاء على الهلال.
• جماعتكم ديل تقول ماسكين ليهم (تلغراف)…كل جمعة يظهروا ليك الاتنين ويقولوا ليك (الجهاز اتعطل).
• دي عاوزة ليها جهاز – حالة (ضفر) دي واضحة يا سيحة.
• مفروض يطردوا ضفر وامير كمال بالشفعة..وعلي جعفر يلحقوه في كنبتو ويمنحوه (كرت احمر).
• كمان قاعد ولا عليه.
• عملت لينا ازمة في الثروة الحيوانية ..بعد الازمة العملوتها لينا في (الغاز) في مباراة مريخ الفاشر.
• يا جماعة الناس وصلوا القمر ..بيجيوا الصورة من عطارد ..انتوا اللقطة ما قادرين تعيدوها.
• انتوا يا ناس التلفزيون قاعدين يدفعوكم (رسوم) في الاعادة.
• الاعادة عندكم اصعب من القون.
• الشيء الغريبة وما واقعة لي …خروج الكلام الماشي ليكم عليه دا من مزمل ابوالقاسم.
• اجزم مزمل ابوالقاسم في اذاعة (هوى السودان) عن وجود تنسيق بين صحيفة هلالية و صحافيين هلالاب قبل يومين من ايقاف اللاعب بكري المدينة وقال ان الصحيفة قامت بنشر حيثيات الايقاف وتقرير الحكم والذي يعد تجاوز و تسريب معلومات تتعلق بحادثة يفترض ان لا يتعرف الاعلام عليها الا بعد المصادقة عليها من قبل الاتحاد).
• مزمل ابوالقاسم يقول ذلك.
• عليكم الله ختوا ليكم الف علامة تعجب.
• طيب يا مزمل انت وقت كنت بتنشر معلومات (غاية في السرية) من مكاتب الاتحاد العام لماذا كنت تسمي ذلك (سبق صحفي)؟.
• (حوصة الخطير) كان قاعد يجيب معلوماتو من وين؟…من الميناء البري؟.
• ولماذا هي شطارة وفهلوة ومهنية منكم (وكمل كمل يا مزمل) ..وعندما تأتي من صحف الهلال بتقولوا في تنسيق بين الصحيفة والاتحاد.
• هل كان هناك تنسيق بينكم والاتحاد في (ايميل) سادومبا؟.
• ايميل سادومبا اذا (اتمسح) فهو اتمسح في بريد الاتحاد ..لم يتمسح في شارع البلدية ولا في ميدان المولد النبوي الشريف في الخرطوم.
• لقد اجتهدت الصحيفة وتحصلت على المعلومات كما تجتهدون انتوا وتحصلون على معلومات سرية للغاية.
• مزمل قال حكام الخرطوم بيظلموا المريخ …عشان كدا امس جابوا ليهم حكم من نيالا.
• والمباراة القادمة للمريخ ح يكون الحكم من القضارف.
• انتوا تطلبوا بس.
• الاتحاد العام طبعا بيديره جمال الوالي.
• المريخ ما عاوز شرطة …الشرطة كلها تطلع من الملعب.
• ما عاوزين حكام من الخرطوم يجيبوا ليهم حكام من الولايات.
• وما بعيد يقولوا جيبوا لينا حكام من (دائرة الكورة بتاعة المريخ).
• يعني يمكن حسن يوسف يحكم مباريات المريخ القادمة..مع مصطفى توفيق وصديق علي صالح كرجال خطوط.
• بكري يوقفو الاتحاد…الاتحاد يرجع بعد اقل من (24) ساعة ويرجعو تاني.
• ويقولوا ليك في ضربات جزاء لم يحتسبها الحكم للمريخ.
• انتوا (البونية) ما بتحسبوها.
• عليكم الله لو حكم نيالا امس قام بطرد (ضفر) كان فريق المريخ نص دستة مرقتو من الامل عطبرة.
• بي صراحة كدا.
• وبي امانة شديدة …(الخرفان) بقت ما بتجيب حاجة.
• الظاهر عليها فكت.
• شوفوا ليكم (قطر) اضبحوه ..يمكن تستعدلوا.
• …………….
و
• بكري المدينة …(بجري المدينة) بقى موهبة عند مزمل ابوالقاسم.
• موهبة من متين دي؟.
• يعني لو جاكم كاريكا او نزار حامد في المريخ …ممكن تضبحوا ليهم على رأس الساعة.
• بكري موهوب في (البونية).
• موهوب في (الكشافات).
• ولو الاتحاد العام لكورة القدم ما بملك قراره …القرار سوف يأتي من (الفيفا).
• ترقبوا قرار الفيفا قريبا.
• اها قرار الفيفا البفكو منو؟.
• خلوا جمال الوالي يضرب لي بلاتر.
• الفيفا قرارها ما بعيد.
• ………..
• السيدة (ل) الجماعة ديل عندهم رأي واضح في (القرع)…وفي فصل (17) عضو من قيادات الاتحادي من الحزب.
• وقرّض على كدا.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *