زواج سوداناس

صلبط.. صلابيط


شارك الموضوع :

الحمد لله نحن ناس.. تامين.. عندنا ايدين وكرعين واضنين.. ووشي ونخرين.. وما ناقصين حاجة من خلق الله.. فينا البيفهم.. وفينا الفهمو على أدو (يا قول المصريين).. لكن لينا زمن وزمن طويل.. شغالين صلبطة.. في التاريخ وفي الجغرافيا.. وفي خريطة الجينات الوراثية.. وفي أي حاجة نحس إنها قد ترفع من قدرنا.. كأنو عندنا عوجة ودايرين نضاريها بالنضم دا.. اجتهدنا وكتبنا الكتب وبحتنا وكوسنا كواسة شديدة عشان نثبت إنو جدنا العباس.. لحدي ما أي زول فينا حذّر طاقيتو.. وشال عكازو.. وقدّل في السهلة وقال جدي العباس.. لو العباس عم الرسول أبو لهب برضو عماً للرسول مافينا زول بالكضب ساكت قال بيبقى ليهو.. مع إني أشك في علاقتنا بيهو. وبامرأته حمّالة الحطب.. وشوفتو نسوانا جنهن حطب كيفن؟.. من طلح وشاف. ويشيلن فيهو بالشوالات واللواري تنقل والركشات تنقل والبكاسي تنقل والدواب تنقل.. وهن براهن فوق روسنن ينقلن.. أها دي حِمالة حطب واللا ما حِمالة حطب.. ؟ وحمالة الحطب (أروى) ما حبوبتن لينا؟.. يعني جينات المغدوب عليها مرة أبو لهب فيهن فيهن.. قالو بلال، قلنا مننا.. لكن مافينا زول قال بلال جدن ليهو.. لي شنووووووو؟.. النجاشي رضي الله عنه.. قالو أصلاً كان ملك السودان.. والحبشة المقصودة ياها السودان دا.. والنجاشي جدنا.. عنتر أمه زبيبة من عندنا.. البحر الرمت فيهو أم سيدنا موسى.. وهو طفل البحر الليلينا دا.. شفتوهو؟.. .. ونبي الله الخدر.. لاقى موسى ونضم معاهو في المقرن.. المقرن الحسي قاعد دا.. وأخبرني أحد المثقفين السودانين.. وهو جاااااادي.. قال لي إنت عارف ربنا كلم سيدنا موسى بجبل البركل.. جبل البركل الما بغباكم دا.. قال لي كان الجبل اسمو طور.. والنضم البيتقال دا كلو إسرائيليات، دايرين يبعدوهو من عندنا.. وكل ما يطلع لينا واحد.. وعاجباهو روحو.. يقول لنا خليت لكم العباس، علا الرسول جدي.. جمال عبد الناصر اصلبطنا فيهو.. وقلنا أصلاً سوداني علا المعايش ودت أهلو لي مصر.. السادات أمو سودانية.. وحتى نتنياهو رئيس وزراء إسرائيل طلعانهو شايقي حافض غنية آسيا بابورك في الأراك.. اتشبكنا في كلاي.. وفي بيليه.. ولما أوباما فاز.. جرينا على كتبنا نكوس فيها.. وقدر مافي عجوز عندها ولد طافش ومطول من البلد سعلناها.. يمكن يكون أبو أوباما ياهو ولدها السافر دا.. ويطلع أوباما بيبقى لينا.. عشان نقعد ننطط ونفجط في العالم ومافي زول يسعلنا ويقول لنا تلت التلاتة كم؟.. لحدي ما ظهرت حبوبة أوباما في كينيا.. لكن برضو ما خليناها مشينا بحتنا وارها.. وطلعناها قريبتنا.. علا برضو المعايش رمتها في كينيا.. ليه نحن ما نحاول نتصالح مع نحن.. ونقبل نفسنا زي ما هي.. ونطورها.. ونجتهد بعيد من العباس وبعيد من أبو لهب.. ونبقى ناس الناس تعمل لنا حساب.. بس كان خلينا الغتاتة علي بعضنا شوية!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *