زواج سوداناس

التحكم في الإنسان من بُعد


شارك الموضوع :

علم النفس.. ليهو دور كبير.. في الحروب.. منذ أن عرف الإنسان الحروب.. الحرب النفسية.. تحطيم معنويات العدو.. وتطورت آلة الحرب المادية.. كان الإنسان البدائي في حروبه يستعمل سنونو وضفورو.. وإيديهو وراسو.. شي عضعيض وشي خنق وشي شلاليت وشي بونيه وشي روسية.. ثم استعمل الحجارة.. فلع شديد.. وكان الزول النياش البيجدع الحجر من بعيد.. يقع في نص النافوخ.. دا بيعتبر أفرس زول.. وممكن يرقوهو لحدي ما يصل رتبة لواء.. كلو عشان نيشنجي.. وحجرو ما بيجلي..

وأول زول فكر يعمل سكين طويلة من الحجر.. اتغاتت عليهم وأبى يوريهن سواها كيفن؟ وأخد السلطة.. وبقى شايل سكينو دي.. والباقين خايفين منو.. اليقول بغم كلو يبعجو.. قدام أخوانو عشان يخافوا فسيطر على الكهوف وسكان الكهوف.. يمشوا يساككو في اللرانب ويجيبوه ليهو وهو رااااااقد وسكينو عند راسو.. وينجضوها.. ويدوها ليهو.

دا اختراع خطير بالنسبة للإنسان الأول الكان همو كلو ياكل ويتدسّ من الوحوش.. ويتكاثر.. نضم ما بيعرف ينضم ممكن كلمتين تلاتة كفاية بيقضّن الغرض، يعني زي كلمة (نجانجنا) يعني أكل كلمة (أمبو) يعني موية، أحيانا يضرب الشلاليف مع بعض وتصدر صوت يدل على الموية.. وكلمة (نجام نجام) يعني حاجة بتأكل الزول.. وكلمة (ككيخ).. معروفة لكن ما بستعملوها كتير لأنو المسألة ما فارقة معاهم.. وممكن ساعة الشكل يستعملوها يعني واحد يصُر لي واحد ويقول ليهو (ككيخ).. وككيخ من هنا وككيخ من هناك.. والدفسيبة تقوم.

وكلما اتطور ابتدع مفردة جديدة زي (إفييييي) دي لما تطورت حاسة الشم عندو..

وكانت بداية الإمبريالية من سكيكين الحجر دي.. ومن ديك وعييك.. لي يومنا دا.. العندو السلاح هو سيد الناس.. والما عندو يخدم ويديهو وخشمو دا ما يفتحو.

تطورت الآت الدمار والحروب.. لمن وصلنا للأسحلة البيضاء المنها السيوف.. الواقفين فيها نحن ديل لي حسي ونغني ليها (أحَّيْ يا علي ابسيفن يسوي التّح).. إن خلاااااااص دايرين نخوف الناس نغني للمدفع الرزام.

يعكف فريق من العلماء الخواجات طبعا.. على دراسة الجهاز العصبي للإنسان بقصد التحكم فيه عن طريق الأقمار الصناعية..

النضم دا ختري ختري ختري (تلاتة ختري)

قالوا الأسحلة التقليدية دي بقت كلام فارغ.. ودا سلاح جيد.. يعني لو دايرين زول يقتل زول.. يسلطوا عليهو القمر الصناعي ويلعبوا بجهازو العصبي.. ويشيل مسدسو ويمشي يقتلو.. زول مجرم برضو يحددوا موقعو وين على الأرض.. ويسلطو عليهو النصيبة دي.. ويمشي برااااااااهو يسلم نفسو.. يعني ناس القاعدة بعد كم سنة.. كل زول تلقاهو ستّف هدومو ويسلم نفسو لاأقرب قاعدة أمريكية.. دايرين زول يكجن زول برضو نفس البرنامج.. زول يحب زول نفس البرنامج.. وعيييييييييك..

المصيبة البرنامج دا ينقلوهو النت.. والموبايلات.. يا جماعة الخواجات ديل دايرين يسووا علينا كيفن؟..

إن شاء الله يلقوا ليهم حتة في السما دا ويتنقلوا عليها ويخلوا لينا الواطا دي.. نتخلّف فيها بي راحتنا!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *