زواج سوداناس

حـــالتـــــــها دي بـــــــدون (خـــــــــروف)


شارك الموضوع :

انتوا هسع يا ناس المريخ وقت بكري المدينة يجيب ليه قون – الحافز بيشيلو منو؟..بكري المدينة وإلّا الخروف؟
لو ما نزلوا (المكرفونات) – والعريس والعروسة رجعوا من شهر العسل ما بنطلع من الحفلة
مرات وقت نلقى (وردي) بغني في (بعد ايه جيت تصالحني) في الحافلة بنقصد ننسى (الباقي) عند الكمساري
مراوحنا دي فاهمة حاجة …في زول قال ليها شيء ..مراوحنا دي وقت الهلال ينتصر ..هي براها بتقعد تضحك

ولا بنكضب….(ولا بنجامل)..اقل حاجة بنزل لينا (لوري طوب).
اقل شيء.
لوارينا بتدور.
ونشغل ليك اغنية عبدالقادر سالم (اللوري حل بي).
ما عارف – نحن عندنا (حنين) للواري بالفطرة.
بنحس بي نقطة ضعف امام اي (لوري) بنشوفو.
ما عارف القصة طالعة من وين؟.
يمكن عشان اول (لوري) في حياتنا شفناهو كان مكتوب في خلفيتو (اغالط نفسي بي اصرار واقول يمكن انا الما جيت).
وقعدنا نتغالط.
قلت في نفسي ..اللوري دا الجابرو على الغلاط شنو؟.
انتوا بتغالطوا بس.
تجيب ليهم سلطة.
يقولوا ليك السلطة دي انت قطعت اول فيها البصل وإلّا قطعت الطماطم؟.
تقول ليهم ..المعنى شنو؟..بفرق في شنو لو قطعت البصل او قطعت الطماطم بالاول.
يقولوا ليك : لا بتفرق كتير …نحن (النظام) عندنا اهم شيء.
نفسي في (بامية مفروكة)..باسم اللـه ..انا دخلت غلط.
البامية المفروكة الدخلها هنا شنو؟.
مالك انت عاوز تجيب لينا مجلس الصحافة والمطبوعات؟.
مالك عاوز تقوم علينا الجماعة؟.
عاوز تقوم لينا المصران.
نتنظم ليك في فرحنا.
ونمرق الكراسي برة الحوش.
ونطلع غادي من روحنا.
نفوت بعيد.
يشوفنا رهاب – رهاب.
نقدم (اعصابنا) من الفرحة.
ونعرض ليك في (الدارة) لمن الناس تفهم حاجة.
ولا بنطلع.
لو ما نزلوا (المكرفونات) – والعريس والعروسة رجعوا من شهر العسل ما بنطلع من الحفلة.
نفسي في (بطيخة).
يا زول قول باسم اللـه البطيخة الدخلها في الموضوع دا شنو؟.
الناس ديل يسمعوك بتتكلم عن (البطيخ) كدا ..يفتكروك قاصد حاجة.
يقوموا يمنعوا ليك (البطيخ).
يقولوا البلد دي ما عاوزين نشوف لينا فيها (بطيخة) حايمة.
واللـه الجماعة ديل لو قاموا – (القرع) يمنعوا ليك.
قرعة ما عاوزنها.
وقت نفرح نحن بنعمل كدا ..بنتلخبط.
الهلال بيعمل فينا اكتر من كدا.
بروح علينا خشم الباب.
ما بنعرف البيت.
ما في احلى من انتصار الهلال – خاصة وقت الانتصار يكون مريح.
ومن غير اي (ضبيحة).
اصلنا نحن كدا.
طبعنا كدا.
الشفقة بتكتلنا في مباريات الهلال.
لو الهلال ما انتصر بالاربعة – روحنا ما بتبرد.
مراوحنا دي فاهمة حاجة …في زول قال ليها شيء ..مراوحنا دي وقت الهلال ينتصر ..هي براها بتقعد تضحك.
منها وليها.
تقعد تضحك لينا في الصوالين.
مراوحنا كدا.
يمكن اتعلمت الجن دا مننا.
ويمكن انتصارات الهلال وقت تتحقق بتظهر ليك في (جداول الضرب).
تضرب تلاتة في اربعة ..بتطلع ليك بي واحد وخمسين من الفرحة.
شوال البطاطس من حواشتو بتهبشو بتلقى فيهو (رصيد) بي مية.
الجدادة (البيضة) بترمي ليك معاها (رغيفة).
فرحة جد.
اوعك.
نحن بتاعين طرب صاح.
بتاعين حفلات.
لو سمعنا لينا نقارة ..في الواطة ما بنقعد.
نشيل الفرشة والمعجون ..يمكن ما نرجع تاني.
وقت نسمع لينا (دلوكة)..بنقوم نفور ليك زي اللبن.
وندفق برة شعورنا.
وتمسكنا ام فريحة.
نهضرب ليك هضربة شديدة …ما نخلي لينا (ملوخية) حايمة.
نفسي في ملوخية بي لحمة سمينة ..مع شطة وليمون.
هسع عليكم اللـه (الملوخية) الدخلها في الكلام دا شنو؟.
علاقة الملوخية بالاربعة التي فاز بها الهلال امس شنو؟.
لو ما ساي.
وقت الهلال يجيب ليه (قون) بنفرح في الدنيا دي جنس فرحة.
الحاجات بتتلخبط لينا.
اكون عاوز اضرب تلفون ..تلقاني بضرب ليك في (موزة).
ونتراوح.
ونمرق برة.
بنفقد لينا تلاتة ضروس من الفرحة.
وخمسة سنون بتروح مننا ساكت.
ونمشي نغسل ايدنا من (الشبع).
اللحمة بدون ما نجيبها بناكلها.
شية الجمر بدون جمر.
طلعنا كدا.
بتغالطونا في (طبعنا).
عاوزننا نغير (طبعنا) كمان.
جينا للدنيا دي ..بالفرحة الكاملة.
ما في حاجة بتفرح غير (الهلال).
البلد دي حلوة وجميلة ورائعة ..لمن الهلال ينتصر.
بتشوف الخريف بدون خريف.
المطر بتشتغل بدون مطر.
لمن تشيل تلفونك وتضرب لي صاحبك في الكلاكلة ..وتقول ليه (المطرة) دي عندكم كيف؟.
لا بنكضب …ولا بنجامل لينا زول.
ولا بنغش.
ولا بننسى (الباقي) عند الكمساري.
إلّا نكون قاصدين ننسى.
احيانا بنقصدها.
بنكتلها ليك قبلها.
مرات وقت نلقى (وردي) بغني في (بعد ايه جيت تصالحني) في الحافلة بنقصد ننسى (الباقي) عند الكمساري.
نقول الزول دا خلوه يتبسط شوية.
هي الدنيا دي فيها شنو؟.
نفسي في بامية مفروكة.
يا زول البامية المفروكة الدخلها هنا شنو؟.
ووقت نرجع من الاستاد والهلال منتصر ..البنعرفو والما بنعرفو بندفع ليه.
وبنحلف كمان.
الواحد يطلع ليه (50) جنيه ويقول للكمساري ..سبعة قدام و(14) وراء…وتلاتة في الحافلة الوراك ديك.
نحن صعبين.
نحن شفوت.
ما بنتفاهم وقت يجيبوا لينا سيرة الهلال.
عليكم اللـه (النيل) دا لو ما الهلال بقعد (يتراقص) كدا.
الجابرو يقطع المسافات دي كلها شنو؟.
والشاي والسكر.
ومحمد وردي وعثمان حسين.
مدثر كاريكا يجيب ليك في الاقوان زي هدايا عيد الميلاد.
والشفع حايمين في الشوارع متل (العيد).
بدون ما يلبسوا جديد ..بتشوفهم لابسين جديد.
بياكلوا في الحلاوة بدون حلاوة.
نحن كدا.
لمن نطلع بي غادي.
بنمرق من حواسنا.
ونقعد نوصف للناس.
البيسألنا والما بيسألنا – بنقعد نوصف ليه.
بدون سبب.
بدون داعي.
الهلال غالب.
جاب ليه اربعة اقوان.
دي يقولوا عليها شنو؟.
بتشرح.
دي بفهموها لينا المريخاب.
دي شيلة.
اربعة.
دي (باسطة).
دي الف ليلة وليلة.
يمين ما ضبحنا لينا (ود ابرق).
ود ابرق ما ضبحناه في الاربعة دي.
نعمل ليكم شنو؟.
يشرحوها ليكم كيف؟.
يقولوا ليكم شنو؟.
يوصلوها ليكم بي ياتو طريقة؟.
بي ياتو فهم.
نحن فترنا من (الشرح).
اتشقينا من (الفرحة).
وطلعنا نسأل من (السمك).
الواحد جيبو ما فيه حق طلب الفول – وبيسأل من (السمك).
شفتوا (الفلهمة) دي كيف؟.
ثقافة شديدة.
اربعة.
لكن ما كتيرة يا كاريكا؟.
نحن (التمهيدي) ما بنضبح فيه.
ما بنخسر فيه (جدادة).
دور الـ (32) ما بنضبح ليه.
ما بنخسر فيه (عتود).
واضحين نحن وصريحين.
انتوا قايلننا (مخلوعين) زي جماعتنا البضبحوا في التمهيدي (9) خرفان.
خلعة (شديدة).
يمين تتابعوا لي (بكري المدينة) دا – ما تخلوا ليكم (خروف) حايم في البلد.
انتوا هسع يا ناس المريخ وقت بكري المدينة يجيب ليه قون – الحافز بيشيلو منو؟..بكري المدينة وإلّا الخروف؟.
دور الـ (64) ربع كيلو لحمة كتيرة فيه.
خرفان شنو البنضبحها في (التمهيدي)؟.
نحن (الضبيحة) عندنا من المجموعات ولي فوق.
بعدين نحن ما بنضبح (خرفان).
وقت نبقى على (الضبح) بنضبح المريخ ..(تذكروا ضبيحة ايفوسا)…دي غير ضبيحة (الحضري).
بشه وبويا.
بنضبح الاهلي المصري (داريوكان وكرنقو وقودوين).
نضبح (الترجي).
خرفان نحن ما عندنا للحاجات الساهلة دي.
نحن شفوت ..وصعبين.
قلت ليكم الكلام دا قبل كدا.
قلت ليكم نحن (المرارة) بنطلعها قبل ما نضبح الخروف.
عندنا جماعة ..قبل ما يضبحوا ..قبل ما يسلخوا ..بعرجوا على البطن.
ينزلوا ليك (المرارة) دي زي ما هي.
ولا محتاجة ليها (غسيل).
ولا عاوزة ليها (ليمون).
جاهزة بي (شطتها).
….
ملحوظة : واللـه لو ما خايفها تصبح عليكم …الليلة للصباح ما افككم.
هوامش
كاريكا يجيب في الاقوان في الهلال.
وبكري المدينة يضيّع فيها.
انتوا بكري المدينة دا لو وقفوه ليكم في البطولة الافريقية ما احسن ليكم؟.
افضل ليكم من (الشفقة) البعمل ليكم فيها دي.
الزول يشيل ويضيع.
امس كاريكا جاب هدفين محسوبات ..وهدفين لم يحسبهم الحكم.
وما ادونا (ضربة جزاء).
كاريكا لو لقى الحكام البحكموا للمريخ ..كان امس جاب ليه تسعة اقوان.
يا بكري المدينة تاني ما نشوفك في العرضة.
لا شمال ولا جنوب.
اتخارج.
ناس كاريكا ديل بيحرجوك بدون داعي.
انت مالك ومال التلتلة دي.
يا زول اتخارج.
كورتك دي ما كورة زول يجيب ليه اقوان.
وكمان بضبحوا ليه.
يمين كاريكا دي يضبحوا ليه في المباراة الواحدة يجيب ليه سبعة اقوان.
تعبتونا ساكت.
فترتونا.
حالتها دي بدون (خروف).
شفوت انتوا.
صعبين انتوا.
بي صراحة.
نفسي في (بامية مفروكة).
اللحوم بتظهر في المجموعات.
هسع المرحلة البنلعب فيها دي مرحلة (بامية مفروكة).
وجماعتنا ديل في دور الـ (64) بيضبحوا.
إلّا يضبحوا ليهم (بامية مفروكة).
………..
عاجل : هسع بكري المدينة بكون بقول يا ريتهم لو وقفوني.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *