زواج سوداناس

الفشنكات الملاوية


شارك الموضوع :

> الحديث عن جماهير المريخ لا ينتهي
> كل يوم يثبت لنا شفت أن زلزال الملاعب مرعب ومبدع وخلاق
> لن ينسى التاريخ مايقوم به بخيت ود الدمازين
> هذا الشفت وبتكليف من لجنة التعبئه قاد بصا كاملا من شفوت الدمازين للاستاد
> ابلوا بلاء حسنا
> قادوا التشجيع بجنون واعي
> شرفوا المدرجات بهتافاتهم ومعينات التشجيع التي اجبروها ان تتحدث
> فكانت النوبة تئن والوازا تجن والصفقة تحن والمدرجات ترجحن
> تحية خاصة لذلك الشفت المجنون الواعي
> وتحية عبره لشفوت الدمازين فرسان الحوبة
> والتحية عبرهم لامة الشفوت قاطبة
> المهم
> اول امس حمام جديد شرف البلد
> الفشنكات الملاوية
> بعثة قوامها سطاشر لاعب حارس احتياطي ما فيهم
> تذاكر الجية بالدين
> والغريب ان الكورة لم تبث كتسجيل بعد المباراة
> لان الامر يحتاج لمونتاج
> تقطيع وحذف ومؤثرات صوتية وخدع سينمائية
> لا لشيء سوى صنع صورة خلابة تعجب المشاهد
> والمشاهد عارف
> عارف او الحكم هو نفسه الحكم الذي أدار الاولمبي السوداني والحبشي بالابيض
> فهل كان قاعد الاسبوع ده كلو معاهم
> اقصد معنا
> ولا مشي وجا ؟؟؟
> المهم بعد المونتاج وبث المباراة
> أمسكوا الزمن
> وتذكروا ان المباراة تسعين دقيقة
> يعني ما اربعين او خمسين دقيقة
> ولا اظن ان الذين غيروا اتنين بي اطناشر في تقرير الحكم الافريقي
> بتفوت عليهم ضرورة عرض الاهداف فقط
> ويمنتجوا الباقي كلو
> عرض المباراة كاملا مستحيلا
> اتحداكم اعرضوها من طقطق للسلام عليكم
> ايها الناس
> كورة الهلال ضد كي ام كي
> الهلال باعها لي شركة
> الشركة كتر خيرها باعتها للتلفزيون
> وطوالي جابوها لينا بالليل بعد الكورة
> المره دي الحصل شنو ؟؟
> الهلال ما باع للشركة
> ولا الشركة انتقلت لشراء حقوق فحص التربة؟؟؟
> طبعا شغل فحص التربة عائداته اكبر بكتير من عائد بيع تسجيل مباراة
> وكردنة حر يودي قروشو وين
> لكن قروش الهلال
> يجب ان يعلم الاهلة الشرفاء اين تذهب
> من حقهم
> الشركة دي بالطريقة دي يوم بتبيع المقصورة والاهلة لا يعلمون
> ايها الناس
> الطشاش في بلد العمى شوف
> فرحة الغلابة التي يعيشونها عشان غلبوا الفشنكات الملاوية
> فرحة مصنوعة
> لان الفريق ضعيف ماديا وفنيا وتكتيكيا واداريا
> ويعيش مشاكل لاحد لها
> وزيو في ميدان عقرب في كتيييييييييير
> لكن ياخالد عزالدين
> علي القسم
> الفريق الانجولي القابلناهو
> لو قابل الهلال في مباراة
> لخرج الهلال وهلال كادوقلي وهلال الابيض وهلال ام صفقا عراض مغلوبين
> والبقابل الاسد أخير من البقابل الضبعة
> والغريبة لو البقابل الضباع
> يوم اكلتو ضبعه
> دي قرعة بالكمبيوتر خلي بالك
> كي ام كي
> وبعدو فشنكات ملاوي
> ده درب جابتو القرعة؟؟؟
> عشان كده لقينا اجابه لي سؤالنا
> لماذا سكت الهلال عن الاحتجاج على التمهيدي فجأة ؟؟؟
> ولماذا لم يصعد الموضوع
> الدرب سالك
> لكن في السلم والثعبان
> لا تغريك السلالم التي تقابلك منذ البداية
> هناك دبيب طويييييييييييييييل
> بجيبك من المربع 98 الى المربع صفر
> تبدأ من الاول ياخالد عزالدين
> ايها الناس
> اي حمامة طايرة تنزل في استاد الهلال
> انتوا بتجيبوا الحمام ده من وين ؟؟؟
> حيرتونا
> بدل الجوهرة الزرقاء
> سموهوا البرج الكبير
> ايها الناس
> استمعت للقاء يوسف السماني وكردنة
> عفوا دكتور يوسف السماني ودكتور اشرف سيد احمد
> لغة الحوار لا تشبه الالقاب التي تسبق اسميهما
> ثم حضرت ترويج للقاء بالرياضية يقدمه يوسف السماني
> موضوعه حقيقة قصة بكري المدينة
> وكيف سيواجه الاتحاد انسحاب الهلال
> وهل فعلا هناك اتفاق ولائي لسحب الثقة عن الاتحاد العام ؟؟؟
> الموضوع واضح جدا التهديد الفيهو
> ومحاولة تجريم تسجيل بكري
> لذا اتعجب جدا عندما يقول صديقي امير سيداحمد
> ان الرياضية دائما تقدم خدماتها للمريخ
> يا دكتور يوسف
> قانون الجنسية السودانية يمنع اعادتها ومنحها لمن تنازل منها طوعا
> وجمعة تنازل عنها
> بل جميع الجنوبيين تنازلوا عنها طواعية بعد الانفصال
> وبالتالي لايمكن لجنوبي ان يتجنس
> لماذا لا تدير لنا حلقة حول قانونية تجنيس جمعة جينارو ؟؟؟؟؟
> بعد ده
> اتمنى من الرياضية المحايدة حسب ادعاء مالكها
> اتمنى منها ان تخصص حلقة عن قانونية تجنيس جمعة جينارو
> وعن موقف احمد بيتر
> ولا الموضوع يبقي ما ليهو علاقة بالحياد
> حياد بالحا يا امير سيد احمد؟؟؟
> المهم
> هرطق السماني وبطرم كردنة كعادته
> ولما انتهى اللقاء
> كررت كلام سعيد صالح لي يونس شلبي
> انا عاوز جملة مفيدة يا بني آدم
> المهم
> دكترة السماني وكردنة الفخرية ماكانت قدر اللغة التي تحاورا بها
> بالمناسبة
> بتي قربت تتخرج من جامعة الاحفاد للبنات
> قلت ليها لازم تعملي دراسات عليا
> الاحفاد جامعة عريقة وممتازة
> وعشان تستفيدي
> جيبي رسالة الدكتوراة بتاعت عمك كردنة استفيدي منها
> قالت لي كردنة دكتوراتو من عندنا؟؟؟
قلت ليها أمال من اديس ولا من الثريا؟؟؟؟
> ايها الناس
> في مباراة الاياب بتاعتنا
> ما بالضرورة يكون الحكم من رواندا
> لكن بالضرورة ان يكون من الحكام البخجلوا شويه
> واختيار الحكم «المعروف» جاكسون بافازا لا اظن ان القرعة هي ما فرضته علينا
> ليدير مباراتنا في انجولا
> لا نطالب مجدي باختيار حكام مبارياتنا
> بقدر ما نطالبه ان يطلع منها
> المهم
> سمعنا بالشيخ المودنو لندن
> ده منافس جديد وخطير لخط الدفاع الاول
> روشا
> بعد ده الشغل ضب «أهوص»
> سهليه «ازبا»
> مرفئين مبقرط
> وبخرات هااااااره
> الزول ده زحلقوهوا سريع
> القصة بقي فيها «خدام» بضم الخاء
> ايها الناس
> ان تنصروا الله ينصركم
> أها
> نجي لي شمارات والي الخرتوم
> كان شفت يا والينا
> بنخجل لما الشافع يقيف قدامنا ويقول أدينا
> نتقطع حتت ونديهو كل الفينا
> وقبل ما يبعد خطوتين راجع يجينا
> ويقول نسيت
> تاني ادينا
> في المدرسة قالوا لينا وقالوا لينا
> بقينا نخاف يا والينا
> لو نسوانا بشرونا وقالن لينا
> ولي عهد جديد بفرفر وقادم لينا
> ننطط عيونا يا والينا
> نقرب ننط الحيطة ونرجع
> نجري الشارع ونرجع
> نطلع راس البيت نخاف نوقع
> ندخل تحت السرير نقوم ونقع
> نفكر نهرب أو ننتحر أو حتت نتقطع
> ونرجع نعاين لي نسوانا هن يرجفن ونحنا نرجف ونتأتأ
> يمكن نفاخ
> يمكن ملاريا حبشية
> يمكن قبضة أبت طلع
> نرجف كلنا يا والينا
> تقول مصاحبنهن ما حلالاً لينا
سلك كهربا
ننساك كيف وعشان بنخاف من قولة أدينا اتمنينا نعقر يا والينا
وإلى لقاء
سلك

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *