زواج سوداناس

رقابة ماااافي


شارك الموضوع :

إنها دولة جباية، لا دولة رعاية.. هذه العبارة ليست من الأقوال المأثورة.. ولا من الأقوال )الماسورة ( إنها عبارة أطلقها العبد لله منذ سنين عددا وهو يتحدث عن إنعدام الرقابة في كل شئ.. إبتداءً بالكافتيريات والمطاعم وإنتهاءًً بالمختبرات الطبية والمستوصفات.. أفتح مطعماً.. سوف يأتيك من يطالب برسوم الرخصة التجارية.. يطلع من هنا يجيك بتاع النفايات عاوز قروشو.. يطلع بتاع النفايات يجيك بتاع العوايد.. يطلع بتاع العوايد يجيك بتاع الزكاة.. يطلع بتاع الزكاة يجيك بتاع الضرائب.. يطلع بتاع الضرائب يجيك بتاع (الكرت الصحي للعاملين).. الزول الوحيد الما بجيك هو الزول المفروض يفحص الأكل ويشوف الزيت البتطبخ بيهو زيت (نباتي) واللا (زيت مكنة).. واللحم القاعد تقدمو لحم ذات الأظلاف أم ذات (الكدارين) !
أفتح (عيادة طبية) حتى وإن كنت خريج (المدارس الصناعية).. أكتب على لافتتك ما شئت من التخصصات.. ومن الزمالات.. ومن الشنو ما عارف.. واستقبل المرضى.. أكتب ما شئت لهم من الروشتات والأدوية.. لا يهم أن لحقنهم أمات طه أو أصبتهم بعاهات مستديمة وأصبحوا من رواد (معهد سكينة).. سوف يأتيك من يطالب برسوم الرخصة التجارية.. يطلع من هنا يجيك بتاع النفايات عاوز قروشو.. يطلع بتاع النفايات يجيك بتاع العوايد.. يطلع بتاع العوايد يجيك بتاع الزكاة.. يطلع بتاع الزكاة يجيك بتاع الضرائب.. يطلع بتاع الضرائب يجيك (الكرت الصحي للعاملين).. الزول الوحيد الما بجيك هو الزول المفروض يتأكد من أنك دكتور طبيب مرخص ليك بالعمل ويتأكد من شهاداتك ومؤهلاتك !!
وحتى لا نكون قاعدين نلقي الحديث على عواهنه فقد صرحت السلطات الصحية مراراً وتكراراً عن اكتشافها لعيادات تمارس فيها
فيها مهنة الطب من قبل أشخاص معرفتهم بالطب كمعرفة العبد لله باللغة التركمستانية !!
الكلام الفوق ده بيؤكد تماماً أن حكومتنا الميمونة في هذا العهد السعيد (ما شايفه شغلا) وإنو القصة أصبحت هايصة.. ودونكم ما حدث مؤخراً من حدث يدمي القلوب بمنطقة الدخينات.. إذ استأجر عدد من الأساتذة مدرسة وأسموها (الريَّان) – شفتو كيف.؟- وقاموا باستقبال طلاب الشهادة السودانية واستلموا منهم رسوم تسجيل ورسوم امتحان ورسوم شنوووو ما عارف.. وعندما جاء الامتحان (نجروا ليهم) أرقام جلوس من راسهم.. وإذ إن الامتحان الأول قد كان (تربية إسلامية) فقد قاموا بتعديل امتحان (السنة الفاتت) وأدوهو ليهم.. وحتى تكتمل الحدوته فقد قاموا بتعيين (بتاع البوفيه) ومعاهو كم زول (كمراقبين) !!
وبعد أن تم اكتشاف (اللعبة) إتضح أن المدرسة غير مسجلة بوزارة التربية والتعليم.. يعني مدرسة (كيري ساااكت).. وكاد مستقبل هؤلاء الطلبة أن يروح (شمار في مرقة)، لولا اكتشاف هذا الأمر مبكراً وتلافيه من قبل إدارة الامتحانات بالوزارة، التي قامت باستخراج أرقام جلوس (ما مزوَّرة) لهم وإجلاسهم لامتحانات الوزارة مع الوعد بعقد امتحان لهم لمادة التربية الإسلامية !!
بالطبع مثل هذه (القصص) من (الإحتيال) لم تحدث ولن تحدث في أي بقعة في العالم إلا أنها تحدث لدينا.. ليس لأي سبب من الأسباب إلا لأن الرقابة لدينا معدومة، وأن حكومتنا أطال الله بقاءها حكومة جباية لا حكومة رعاية.. وكلو أصبح تزوير في تزوير وما عارفين التزوير الجاي ح يكون في شنوووو !!
كسرة:
الله يستر !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *