زواج سوداناس

من جاور السعيد يسعد


شارك الموضوع :

والجيرة مقصود به القرب.. في سكن.. زمالة في عمل في دراسة.. زوج أو زوجة.. صديق وصاحب.. أو حتى زول راكب جنبك في المواصلات لمدة قصيرة.. وأقف جنبك في الشارع.. قعدت جنبو في مناسبة اجتماعية.. الخ.. أها الزول دا لو كان زول فرايحي يعاديك.. بالفرح والسعادة.. ولو كان زول نكد.. أول حاجة من شكلو وإنو مادي طرومتو.. ح تحس إنو قلبك اتقبض.. وقدر مافي شي كعب في حياتك يتلملم يجيك في بالك من غير ما تشعر.. ولو نضم معاك وقعد يحكي ليك مآسيهو.. ومآسي أهلو.. ومآسي جيرانو.. ومآسي البلد.. تتم الناقصة.. تنزل وأنت مغموم ومهموم.. أما لو كان جارك في الحلة والحيطة بالحيطة.. زول دائما يضحك ويتونس.. وهو ووليداتو ومرتو تسمعهم يتونسو.. انت زاتك ح ترتاح لو كنت شخص متوازن.. دا لو ما كنت انت اصلك زول نكد.. وقعدت تحتار في الناس دي البيضحكها شنو؟ ووصفتهم بانهم ناس فارغين ساكت.. وفي نظرك الزول الما فارغ هو الشايل هم الدنيا فوق راسو ومطرّم اربعة وعشرين ساعة.. دا لو ما مديت راسك عليهم بالحيطة وقلت لهم “ياجماعة الحكاية شنو؟ قر قر قر قر.. دوشتونا”.. الغريبة لو عندهم مرا فرايحية أوفر.. لو راجلها جا من برا تزغرد.. ولو جاب لها توب جديد تزغرد.. ولو جاب للوليدات كيس موز تزغرد.. لو ضربو شباك بوهية تزغرد.. .والعجب العجاب لو جاب خروف هي تزغرد والخروف يكورك.. كل ما يقول (باع) تزغرد.. في هذه الحالة تلملم عفشك وتعزم على الرحيل.. من جنب الناس الما نصاح ديل!!.. دي اسرة سعيدة فرايحية.. أقل حاجة تبسطها..

السعادة ممكن تكون بابسط الأشياء.. والزول يفرح بالعندو وما يعاين للعند الناس.. عشان ما يتعب.. مع أن الأمان المالي يعتبره علماء السعادة من أهم مقومات السعادة.. لكن برضو حاجة نسبية.. في ناس دايرين يلملمو قروش الدنيا دي كلها.. ويكون عندهم مال أحمر.. لكن برضو حاسين أنهم لسه.. أها ديل هم والسعادة اتفرقو..

يوم السعادة العالمي يحتفل المجتمع الدولي في 20 مارس كيوم عالمي للسعادة، بعد أن اعتمدت الأمم المتحدة في دورتها السادسة والستين هذا اليوم من كل عام يوما دوليا للسعادة اعترافا بأهمية السعي للسعادة أثناء تحديد أطر السياسة العامة لتحقق التنمية المستدامة والقضاء على الفقر وتوفير الرفاهية لجميع الشعوب.. صادف يوم الجمعة الفاتت يوم السعادة.. ومرّ علينا بدون ما ننتبه ليهو.. يمكن عشان مقومات السعادة المذكورة دي ما عندنا.. من حق أي إنسان أن يكون سعيد.. غايتو ناس الأمم المتحدة ما قصرو.. ورونا درب السعادة، الدور والباقي علينا.. لكن لحدي الحاجات دي تتوفر” التنمية المستدامة والقضاء على الفقر وتوفير الرفاهية”.. نخلي النكد.. ونفرح بالقليل.. حتى لو كانت ميتة قلب.. أخير من الميتة بالمغصة.. والنكد.. دحين يا أخوانا من السنة الجاية اصلو السنة دي فاتتنا هو يوم واحد نحتفل مع العالم.. نسعد فيهو نبعد عن كل شيء يجيب لنا النكد.. ونطرح وشياتنا شوية.. وتاني يوم نرجع نطرم!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *