زواج سوداناس

هستيريا المعجبات بالمطربين


شارك الموضوع :

فرقة (البيتلز) الخنافس الانكليزية ظهرت في بداية الستينيات والي بداية السبعينيات.. أخدت شهرة عالمية.. وشهرتها كانت في كل أركان الدنيا.. حتى أن كثيراً من شباب ذاك الزمان كانوا يقلدوهم في لبسهم وشكلهم.. كان البيتليز بيأجروا المعجبات.. عشان يجن الحفلة ويسكلبّن.. ويزعطن شعرن ويبكن.. وإشاعة جو من الإثارة.. ويحررن الحفلة.. قصاد مبلغ يتفق عليهو الطرفان (المسكلبة) و (والمسكلب من أجله).. ظهرت واحدة قبل فترة شايلة حال البيتلز قالت طالباهم مئة جنيه استرليني من سنة ستة وستين لي يوم الليلة ما ادوها ليها.. المبلغ قصاد سكلبة. . وبكاء.. وشعبطة في اعضاء الفرقة واحد واحد.. في حفل مشهود.. وقد هججت الحفلة و الجمهور دا كلو وقف علي حيلو ورقيص شديد وزغاريت وكواريك والقيامة قامت وعيييييييك.. بعد المجهود دا كلو البيتلز أكلو حق المرا دي.. وتراها حسي شايلة حالهم وحايمة.. وقالت هم ما كانو كدي.. كانو بيدوها حقها أول بأول… إلا المرة دي طمعو فيها وأكلوها !! قبل فترة برضو تردد عن المطرب تامر حسني.. إنو برضو قاعد يأجر المعجبات المسكلبات والنايحات.. محرررات الحفلات.. وشفت لي صورة لي واحدة تبكي بكاء شديد تحلف تقول ميت لها زول.. وتامر يربت علي كتفها.. وتعليق على الخبر في نفس الصورة انها بعد النخجيبة دي.. اتشعبطت فيهو يا الله ويا أمين فكوها من رقبتو.. وساقوها بعيد وصحبانها جابو ليها جك موية وغسلت وشيها واستغفرت.. شفت صورة تانية لواحدة معجبة قالداهو وتبكي بي وجعة شديدة وهو يغني.. “ما بعرفو بيغني في شنو؟.. يا ربي تكون غنية دخلوها وصقيرا حام؟ البكت البنية دي؟”.. وقالت بعض الصحف المصرية اصلو تامر قاعد يسوي كدي!! وذكرو مرة في برنامج فني في قناة فضائية وعلى الهواء مباشرة اتصلت معجبة وقالت لتامر إلا تتزوجني.. وبعد التحقق وزرزرة موظف الهاتف اتضح انها متفقة معاهو.. وتامر قال لموظف الهاتف مرر المكالمة!! أما تامر نكر الموضوع دا وقال دا كلام فارغ أنا ما بلملم قروشي وأجي أصرفن على المعجبات.. شاهدت اكتر من مطرب عربي.. فيدوهات.. في حفلات لهم.. وشفت بنات بيسون في جنس سواة.. كواريك وبكاء.. وغمران.. وسكلبة.. ومعيّط شعر.. ويحوشو فيهن ما يطلعن ويشعبطن في المطرب.. ويخنقنو… بيني وبين نفسي قلت قطع شك السكلي دا ما بي ساكت… مجاااااني كدي… رجعت واتذكرت البنت البريطانية المعجبة الرقدت قدام مايكل جاكسون وقالت إلا يمشي فوقها بكرعيهو.. غايتو لو مايكل كان مديها قروش عشان تسوي كدي يبقى إتلوم لوم ضكر.. شايف في الحفلات عندنا رفسيبا شديدة.. وشبيح ايدين في السما دا.. وبنياتنا الله يغتي عليهن بدن الشعبطة في الفنانيين.. شفت فيديو لواحدة متشعبطة.. لكن لي حسي مافي واحدة بكت بكا وجعة واللا غمرت.. علا خايف واحدة معجبة (مستلبة) تطلع المسرح وتبكي وتشعبط في فنان من فناننا المخلوعين ديل والما مصدقين الهيلمانة البقو فيها دي.. يجدع المايك ويدفرها ويقول لها “المات منو؟”!! والأوركسترا كل واحد يخلي آلتو ويتلمو فوقو ويشيلو معاهو الفاتحة!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *