زواج سوداناس

ولدنا البقضي غرضنا .. !


شارك الموضوع :

* اليومين دي أيام (شعارات) .. !

* هسه ناس الهلال يقولوا ليك بتستهروا بينا وقاصدين شنو بقصة (الشعار) دي ..!

* نحنا بنتكلم عن موسم الإنتخابات، و(كل مرشح عندو شعار وعقبال الهلال) .. !

* انتو عصمت رافع ليكم (شعار) والمريخ بنتهي منكم بتسحيل نزار .. !

* تبقى عليكم يا محمد عبد الماجد :

ميتة و(تسجيل نزار) .. !

* يا حماده عليك الله أتكلم مع الكاردينال دا (ما ممكن يضرب في المدينة ويفرط في نزار )..!

* سوري أتذكرت صاحبنا محمد مُشفر يا مزمل أصلو كردنة زعلان منهم ..و(لو تخاصم او تجافي .. زول “بقاطعك” زي مافي) ..!

* غايتو طه علي البشير لو فعلاً حكيم مفروض ينحني للعاصفة ويحتوي عبوات كردنة الناسفة .. !

* الكاردينال قاطع (قوون)، وحقيقي كردنة دا لو عملت معاهو حوار (بقاطعك) خليك من تجيب خبر ضدو .. !

* يا كردنة روِّق المنقة .. (القصة بسيطة قالوا تسجيل بكري صحيح، والحكاية دي ما دايرا قومة نفس) ..!

* المشكلة (ابو الكرادن) ما بعرف يهادن .. !

* بكري يا كاردينال تسجيلو شمّت فيك العدو والصديق، و(نزار حامد في الطريق) .. !

* يا نيزو الطريق ما طويل .. و(تصل بالسلامة يا جميل) ..!

* الزعيم مع الإنتخابات دي رافع شعر (تسجيل ولدنا البقضي غرضنا) ..!

* الهلال ما عندو شعار يرفعو لأنو شعار عند عصمت، و(نزار رافع القزاز) ..!

* (قزاز) علينا .. (الصفوة) شالوا نور عينينا .. !

* حسم المريخ أمر نزار حامد تماماً، وتبقى له إنجاز ملف (البدلة) .. !!

* يمكن للوصايفة الآن مفاوضة نزار في (البدلة)، فهذا كل ما تركه الزعيم لكبسور علماً بأن البدله ليست إيطالية وأقل من عادية .. !

* (بدلة) يا مولاي حافي حالق في الطريق الشاقي الترام .. !

* كل حريص على مستقبل الهلال ينبغي أن يدير حواراً موضوعياً عن (مصير البدلة)، وهل عدم إرجاعها فيه مساس بالفريق أم أنه أمر عادي، أم يتطلب التقدم بشكوى بإعتبار أن الزي (عهدة نادي) .. ؟

* سمعنا و(العهدة على النادي) أن محاولات تخدير جماهير الهلال من قبل الإدارة (اتكشفت وطلعت مجرد كلام فاضي) .. !!

* الهلال ساكي موضوع بكري المدينة، و(المدينة حسم صفقة نزار) ..!

* أشتكوا بكري بتهمة إقناعه لنزار حامد بدخول التاريخ، وإرتداء شعار المريخ .. !

* يا كردنة (الجفلن خلهن أقرع الواقفات) .. !

* بالمناسبة : لماذا يتجاهل الهلال إشراك أبننا اللاعب المهذب فيصل موسى أساسياً رغم ما سمعناه من تصريحات كاردينالية في موسم التسجيلات ..(وما أجمل الحكاوي عن أتباع الأسس العلمية في التسجيلات الصاح واللبدة زي التمساح) ..!

* إهتمام الوصايفة بكل ما هو بكري المدينة يعكس مدى أثر اللدغة القاتلة ..و(تسلم يا ود يا عقربة يا الجهجهت الجماعة وكترت الهضربة) .. !

* كتروا في الشكاوي .. (لسة منتظراكم بلاوي) ..!

* يا مزمل انت عارف نزار ولدنا لكن سرية الصفقة تتطلب الآن الإمساك عن سرد التفاصيل .. و(مرحب بي ولدنا البقضي غرضنا) .. !

* الولد ولدنا وكلمة الحق بنقولا .. والقال(ولدي) غلب .. !

* بكري ونزار ..(ضربة قاضية فوف طاقة الهلال) ..!

* انتوا متحملين (الصفر) اكتر من 80 سنة غالبكم تتحملوا ضربة العقرب ونزار .. (يا عالم أركزوا شوية وأعملوا ليكم شكوى شكوتين وخلوا آدم يجي الإستديو مع الكاردينال يحسم القضية في حوار) ..!

* كيف آدم منو .. (يا جماعة ما تزعلونا منكم) .. !!

* في رياضي (متابع للساحة الرياضية) ما بعرف آدم .. ؟

* آدم دا يا (رياضيين يا بتوع المتابعة) الزول الإتكلم عنو الكاردينال في حوارو الشهير بعد تسجيل بكري وقال (قلت لآدم جيب القروش) ..!

* آدم القروش ما بتحرك شعرة في العقرب ..(أقنع وأكسب) ..!

* كانا قناعة بكري أن الهلال لن يضيف له جديداً، لذا فأنه كان مستعد للدفع للمريخ مقابل تسجيله .. !

* ما عارف السبب الحقيقي الخلى بكري يرفض اللعب في الهلال، لكن (حاسي انو آدم لعب دور في الحتة دي) .. !

* آدم بدل يفتح الخزنة كان يقول لينا الأسباب و(يفتح الصندوق الأسود) ..!

* كلو من آدم .. !

* يا آدم موضوع نزار دا في يدك .. و(طالما فشلت في العقرب حاول أقنع “ابو النيز” يسلمكم البدلة وما تصهين بالله عايزين نسمع ردك) .. !!

* نزار محسوم وخلاص اكتملت القوة ..و(يا آدم جيب من جوة) ..!

نقوش متفرقة

* تعثر كابوسكورب أمام ضيفه ديسبورتيفو في الدوري الأنغولي يجب أن يدفعنا لرفع درجة الحظر ، فالأنغولي الجريح فريق منظم وخطر ..!

* غايتو يا (كابو الفريق) الله يدينا خيرك ..!

* نضرب (كابو الفريق) ونضمن العبور ونرجع نحسم كبسور ..!

* أصحى يا غرزته .. !

* عدنا لأسطوانة كل عام المتمثلة في إعلان كتلة الممتاز إيقاف البث .. و(بث) خلاص .. !

نقش أخير

* نتمنى أن يتم إدخال حل مشكلة التلفزة في برنامج (الطفل المعجزة) ..!

شارك الموضوع :

تعليقات الفيسبوك

تعليقات


1 التعليقات

      1. 1
        أبو محمد

        لو سجلت نزار ولا ميسي برضك وصيف وجالس على الرصيف وطاير من الأبطال.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *