محمد عبد الماجد

نحن (المرايل والبزازات والنذاغات) دي قاصدنها يا مزمل


سبحان اللـه ..ايميل سادومبا اتمسح..عشان كدا سادومبا بقى اي زول يلاقي ليك في المريخ بيمسحو
الجوهرة الزرقاء دي نبنيها بي مليون بي اتنين بي 40 مليار ..ما في زول دفع فيها قرش

الحبيب مزمل ابوالقاسم ..يجيبوا ليه (بوتاكو) زي الحصان ينطط متل (سلاح الطيران الامريكي)…بيقول مصاب.
الكورة البرفعها (بوتاكو) برفع معها (فني كهربة سيارات) – عشان ما في زول يتكلم.
يفكفك ليك (الدفاعات) زي الساعة.
بوتاكو يعملوا ليه (كشف) – 120 طبيبا ..كلهم متخصصون – وحافظين الطب.
شاربنو شراب.
بوتاكو عملوا ليه كشف طبي في الامارات.
الدكاترة العملوا كشف لبوتاكو في الامارات ..كلهم عيونهم خضر ..واقل واحد فيهم حافظ ليك فرنسا شارع – شارع.
الواحد لو ماشي يشرب بمشي بي بدلة (فول ست).
اقل طبيب فيهم بينزل ليك (الطوحال) قدامك ويشتغلوا ليك وانت واقف ..تستلموا وتتخارج في ساعتها.
بوتاكو ..وصل الخرطوم.
في الخرطوم ما خلوا ليه حاجة ..ناس رويال كير بي حتة ..وناس معمل استاك بي حتة ..عملوا ليه كشوفات لي جدو التاسع عشر.
ما خلوا ليه (ضفر).
الكشوفات كلها طلعت سليمة.
مزمل ابوالقاسم قال لا…في مشكلة.
وعويصة كمان.
قلنا يا ربي مجلس الصحافة والمطبوعات عندو (دورة) بيدرس فيها (طب) للصحفيين.
يمكن.
مزمل عمل فحوصات براهو لي (بوتاكو) وقال بوتاكو عندو (وباء الكبد).
لا حول ولا قوة إلّا ب اللـه.
يا مزمل نحن الفحوصات البتطلع من دكاترنا ما قاعدين نثق فيها ..بتطلع غلط …كمان عاوزنا نصدق التقارير الطبيبة البتطلع من الصحفيين.
عيادة الكبد.
قلنا ما بعيدة من مزمل ابوالقاسم ، اصلو مزمل متخصص في (الكبد) عمودو البكتبو اسمو (كبد الحقيقة).
اعراض وباء الكبد شنو يا مزمل؟.
اللاعب الكورة البيعكسها بيكون فيها (منعرج) هوائي.
تمريرة اللاعب المصاب بي وباء الكبد (قصيرة) ما بتصل.
خالد عزالدين نشر التقرير الطبي الحقيقي الذي يؤكد سلامة بوتاكو القاعد يلعب معانا الان.
مزمل قال لا.
ومنتظرين الى وقتنا هذا تقرير دكتور مزمل…بتاع الاصابة.
الغريبة تقرير مزمل الطبي عن بوتاكو ..اعلام المريخ اثبتو واكدوه كلهم وقالوا ما فيه اي مشكلة.
رغم ان التقرير (وهمي) ..وان صحف المريخ التى ادعت اصابة بوتاكو لم تنشر التقرير كما نشرت )قوون( تقرير بوتاكو الذي يثبت سلامته.
الاغرب من دا ..ان الاسياد والجوهرة الزرقاء عندما نشروا تقرير حكم مباراة الاهلي شندي والمريخ بتوقيع وخط حكم المباراة صديق الطريفي وفي ورق الاتحاد المروّس ، اعلام المريخ شكك في التقرير..وقال هذا التقرير غير حقيقي.
علماء و اللـه.
يعني تقريرهم الطبي الذي لم ينشر عن بوتاكو حقيقي.
والتقرير الذي نشر بخط يد حكم مباراة الاهلي شندي والمريخ (وهمي).
برضو فهم.
غايتو (منطقكم) دا – ليه حق يخلي مقصورتكم تطير.
ديل ما ناس يقعدوا معاهم.
لكن خلونا نقول ان تقرير حكم مباراة الاهلي شندي والمريخ هو فعلا غير حقيقي لأن الصحف التى نشرت التقرير شطبت الكلمات التى تلفظ بها بكري المدينة وشتم بها الحكام.
الحاجة العاوزين نسأل منها ..انت يا مزمل..(اكرا) دا مالكم ما اتكلمتو عنو؟.. بوتاكو خلوه.
اكرا ما بقدر يكمل ليه مباراة لاسباب طبية ..وبعد دا يقولوا ليك (بوتاكو) مصاب بداء الكبد.
مزمل ابوالقاسم مرة …مرقها لليمن..ما خلى ليه مستشفى بتاعة ولادة في اليمن.
مشى الاحصاء اليمني.
ومشى اتحاد كورة القدم اليمني.
وجاء راجع لينا بي شهادة ميلاد اكرم الصلوي ..وقال لينا الصلوي دي (قاصر).
قلنا ليه قاصر شنو يا مزمل؟..نحن عاوزين نقسم لينا (ورثة).
مزمل قال اكرم الصلوي دا ما بلعب هنا..الفيفا قالت ما في كلام زي دي.
تبارك اللـه مزمل ابوالقاسم سمّع لينا شهادة ميلاد اكرم الصلوي دي كلمة – كلمة.
يعني تاني الهلال لو عاوز يسجل ليه لاعب ..اول حاجة يتصل بالقابلة.
حكاية الوكيل ..وادارة النادي ..واللاعب ..ما بتخارج عند مزمل ابوالقاسم.
شوفوا (القابلات).
اجتهادات مزمل ابوالقاسم الصحفية كان يمكن ان يشكر عليها ..فهي تعتبر عمل صحفي مقدر.
بس للاسف الشديد ..مزمل موضوع القابلات ..ووباء الكبد بشوفوا فقط عندما يكون الامر متعلق بالهلال.
عشان مزمل ابوالقاسم الذي مرقها لليمن ..وما خلى ليه (قابلة) في اليمن ما سألها ..جاء وضرب طناش عن شهادة ميلاد سعيد السعودي.
سعيد السعودي ولدوه في (جدة) وسجلوه بشهادة ميلاد طالعة من (ام بدة).
خلوه موضوع اكرم الصلوي ..وقابيتو .. ووالي الدين والحاجات البعيدة داك.
مزمل دا مرة قال في زول مسح الايميل.
قلنا ليه ايميل منو؟.
قال لينا ايميل سادومبا.
سبحان اللـه ..ايميل سادومبا اتمسح..عشان كدا سادومبا بقى اي زول يلاقي ليك في المريخ بيمسحو.
اكرم الهادي سليم ..مسحوه (11) مرة – لمن بقى في الاهلي الخرطوم بيفكها.
زلابية هي يا اكرم؟.
اكرم الهادي سليم كل ما يتذكر سادومبا بيفك الكورة.
ومحامي كلتشي الفرنسي.
وحاجات كتيرة.
الى ان وصلنا الى الشركة الصينية المنفذة للجوهرة الزرقاء.
انت يا مزمل هسع في زول سألكم من الشركة التى نفذت (الرد كسل).
في زول قال ليكم المشروع حقكم كلف كم؟.
طالع لينا مالك في (الجوهرة الزرقاء).
الجوهرة الزرقاء دي نبنيها بي مليون بي اتنين بي 40 مليار ..ما في زول دفع فيها قرش.
ان شاء اللـه الكاردينال يقول تكلفتها 5 جنيه.
عندكم (طوبة) فيها.
لا انتوا ولا الحكومة.
الحكومة ذاتها ..الكاردينال ح يجيبها عشان تقص شريط افتتاح الجوهرة الزرقاء.
ما عاوزين منها اكتر من كدا.
شيلوا (طوبكم) واتخارجوا.
مزمل ابوالقاسم امس استعجب من المبلغ المحدد لبناء الجوهرة الزرقاء ..وقال المبلغ قليل.
يعني الكاردينال (دقس) ليك الصينيين.
مزمل قال (بناء طابق شاخور وحده كلف المريخ أكثر من ستة ملايين دولار!!).
يا مزمل لو في ناس ضربوا جمال الوالي ..وخدعوه ..لازم يكون في ناس كمان يضربوا الكاردينال.
يا مزمل انتوا ناسكم ديل قالوا الخروف بـ (1200) جنيه بيجيبوه لي جمال الوالي بـ (7000) جنيه.
لو انتوا بيغشوكم الكاردينال ما بتغش.
زول مفتح ما زي الوالي.
جماعتكم الحول جمال الوالي اخطر من الشركة الصينية ذاتها..البتطلبوا الشركة بيضربوه في خمسة.
عليكم اللـه ..خلوها الجوهرة الزرقاء ..في زول عاقل كدا بدفع ليه 6 مليون دولار في طابق.
اصلو طابق شاخور دا بعد المباراة بطبقوها ويدخلوه غرفة اللاعبين.
مزمل ايضا استدل بمعلومة قصد بها التفخيم والتجريم عندما قال 🙁 قيمة مقاعد طابق شاخور التي حطمتها جماهير الهلال في مباراة القمة الشهيرة بلغت نصف مليون دولار).
واي زول في الدنيا عارف لو كسروا ليه (نضارة) بقول قيمتها مليون جنيه في الوقت الذي يكون سعرها (50) جنيه.
يا مزمل النصف مليون دولار التى قلت انها قيمة لمقاعد طابق شاخور التى كسرها جمهور الهلال ..ناس الهلال ادوكم منها (دولار)؟.
ولا قرش.
خلوهم ناس الهلال.
ناس الاتحاد قالوا ليكم شنو عن (13) كرسي كسرها جمهور المريخ وحده وقالوا قيمتها نصف مليون دولار.
الامر العجيب والذي بني به مزمل ابوالقاسم معلوماته وتحليلاته واعتبر ان الامر غير منطقي هو ان مزمل استقى معلوماته وحصل عليها من (الانترنت).
قال مزمل : (دخلنا إلى الإنترنت وبحثنا عن الاسم المذكور فوجدنا شركة صينية تحمل الاسم المذكور وتأسست في العام 1989، بواسطة رجل أعمال صيني اسمه (هيرمان لو) وخضعت إلى عملية إعادة تنظيم في العام 1993!).
هسع انا لو كنت (صيني) وقمت بحثت عن (المريخ) في النت قام طلع لي مريخ بورسعيد الذي يلعب في الدرجة الثانية ..هل يعني ذلك ان مريخ ام درمان بيلعب في الثانية.
ما بنّي عن (نت) فهو باطل.
المعلومات التى يتحصل عليها عن طريق الانترنت هل معلومات لا يعمل بها وتفتقد للمصداقية.
اكتبوا اسم اي شركة سودانية في (غوغل) ح تطلع ليكم بلاوي.
ح تشوفوا العجب.
شركة الصمغ ح تطلع شركة ملبوسات.
وشركة النفط ح تطلع حلويات.
وحاجات تانية.
بعدين يا مزمل ما وريتنا دخلت النت بالصيني ام بالانجليزي؟.
مزمل يكون لحق الموضوع درس لغة صينية عندما علم ان الشركة المنفذة للجوهرة الزرقاء صينية.
طيب ح تعلموا شنو لمن يجيبوا ليكم شركة يابانية للاضاءة ..ح تدرسوا لغة يابانية كمان.
لو باريتو الكاردينال دا ..ح يرجعكم للغة الهيروغلافية.
اتخيلوا ان مزمل ابوالقاسم قال شنو عن الشركة المنفذة للجوهرة الزرقاء.
قال مزمل : (أهم منتجات شركة فو هونغ: المرايل.. النداغات.. فرش الأسنان.. الملاعق.. البزازات (أشكال وأنواع) ، ألعاب الرضع.. المرايات (الآمنة المصنوعة من مواد غير قابلة للكسر) ، مثبتات الأبواب (كي لا تصيب الأطفال بحركتها) ، وأدوات الحمام (لا نرى داعياً لتفصيلها لأنها معلومة للجميع).
هذا ما قالوه مزمل ..علما ان هذه المعلومات كما ذكر مزمل تحصل عليها من (الانترنت).
معقولة النت دا كمان فيه ألعاب رضع ..ومرايل ونذاغات.
معقولة فيه ادوات حمام.
غايتو يا الكاردينال الناس ديل جهجهتم جنس جهجهة بعد (القابلات) بقوا يفتشوا في المرايل والنذاغات والبزازات.
تعرف يا مزمل الكاردينال دا يكون قاصدها.
نحن في الجوهرة الزرقاء ح نلعب مع منو يعني؟.
ح نلعب مع ناس علي جعفر والريح علي وبلة جابر وبكري المدينة وعنكبة.
ديل بيحتاجوا لمستلزمات الاطفال.
عليكم اللـه الجماعة ديل مع الجري و اللـهث البعملوا ليهم الهلال ما بحتاجوا للمرايل والبزازات.
يا اخوي يا مزمل نحن الحاجات دي جايبنها بي فهم.
قاصدنها.
والموضوع دا انتوا مجربنو من زمن منصور بشير تنقا.
والي الدين محمد عبد اللـه.
وانور الشعلة.
بدل ما تشيلوا (الكورة) احسن تشيلوا ليكم (مرايل).
ونحن عارفين في اول لقاء قمة في (الجوهرة الزرقاء) ح تحتاجوا للبزازات.
بتنفعكم.

ما ترفضوها ساكت.
……..
ملحوظة : تتصوروا كلام مزمل دا كلو طالع من (كرت الدعوة) الذي وصله من مجلس الهلال.

هوامش

ناس كرت يعمل فيهم كدا.
طيب لمن (الجوهرة الزرقاء) يفتتحوها ح تعمل فيكم شنو؟.
حالتكم صعبة شديد.
قلنا ليكم يا مزمل بتحتاجوا للمرايل والبزازات..قعدتوا تغالطوا.
السنة كلها تغالطوا.
وبرّد يا.
بلة جابر بعرف السبب.
الليلة هيثم كابو بكون ضابح.
بعدين كدا انتوا اطلعوا من كابوسكورب.
الناس ديل ناويين ليكم نية كعبة.
يا مزمل ..(رمضان عجب) مقتنع بي كلامك دا.
…………
عاجل : يخلوها كدا يقولوا (سوق القش) يعملوها (الجوهرة الزرقاء) يقولوا ليك مستلزمات الاطفال.


‫5 تعليقات

  1. ههههههههههههههههههههههههههههههه والله مزمل عزبك عزاب يا ميمي عبد الماجد ……..طيب لو ما زعلت كنت قلت كل الكلام دا

  2. مزمز أبو القنابل يرمي في القنابل واجمهور المريخ المسكين يصدقه

  3. يا اخ محمد اذا اتتك مذمتى من ناقص فهى الشهادة لى بانى كامل
    مذمل ناقص عقل وذمة

  4. قمة التخلف في الصحافة الرياضية والطرح الإعلامي.. بالله هذا اعلام يمكن يساهم في رقي الكرة السعودية، او اعادتها إلى امجادها.. حكي ستات الشاي والمشاطات

  5. سخف وهرطقه وهرجله ، لقد أتعبتم حروف اللغة العربية بعدم موضوعاتكم