بابكر سلك

صقر قريش7/1000 لا باع كنيسة ولا ضبح كديسة


> ناس كتار كانوا قايلين نحنا بنتكلم عن صقر قريش بتاع مسرحية المهرج
> ده براهو وداك براهو
> صقر قريش بتاع مسرحية المهرج ده زول مالي هدومو
> غيور على القومية والعقيدة
> منتقداً للحال الذي وصل إليه شباب الامة من تردٍ
> حتى اتذكر لما سألوهو من التأشيرة
> سأل
> وما هي التأشيرة ؟؟؟
> قالوا ليهو اذن دخول الانسان للدولة
> فاستنكر سائلاً
> ومنذ متي يحتاج العربي لاذن ليدخل الي دولة عربية
> قالوا ليهو انت يا حاج قايلها فوضى زي زمنكم ؟؟؟
> الواحد فيكم يركب الحصان ويبرطع
> برطعك برطعك برطعك
> من جزيرة العرب لحدي العراق وقشة ما تعتر ليهو !!!!
> زمنكم فوضى يا حاج
> نحنا انتظمنا
> عندنا قوانين
> وعندنا لوائح
> وعندنا منظمات دولية
> وعندنا وعندنا وعندنا
> إنه عبدالرحمن الداخل
> ذلك الرجل القوي
> فصقر قريش المسرحية
> لاباع كنيسة ولا ضبح كديسة
> وفي المسرحية مشاهد فيها نقد سياسي رائع جداً
> اذكر منها انه عندما اقتاد الحرس صقر قريش الى الحراسة
> كان يحدثه عن جيلنا
> وكان يقول ليهو عندنا مواصلات وعندنا حكومة وعندنا جيش
> وعندنا حرية وعندنا ديمقراطية وعندنا حرية
> وفي هذه اللحظة فتح له باب الحراسة
> ومع قولة حرية وقيامه بفتح باب الحراسة
> قال ليهو ادخل يا حاج
> ده صقر قريش الحقيقي
> الرجل الذي استدعته مسرحية المهرج
> لينقذ ما يمكن انقاذه من بقايا العرب
> فاستعان صقر قريش وقتها بأحد الفرسان
> دحام
> ذلك الرجل الطويل القوي الفارس المؤمن
> لم يستعن بعجوبة الخربت سوبا
> ولم يستنجد بالحكامات
> جاء دحام وبصوته الجهوري زأر
> انا لها يا صقر قريش
> قاموا الجماعة في المسرحية دخلوهو غرفة الاشباح
> والناس كانوا سامعين صوت الكمبرسون
> فخرج دحام غريباً في كل شيء حتي مشيته
> استغرب صقر قريش
> فصاح
> دحاااااااااام
> وما كان من دحام إلا أن يرد
> هووووووووووي
> كمبرسون ياعمك
> يغير الف دحام في نفخة واحدة
> وكأن مصطفى احمد الخليفة ومن قبله الماغوط
> قد ارادا أن يقولا هذه هي الاساليب التي نقتل بها الرجولة في ابنائنا
> المهم
> صقر قريش بتاعنا القاصدو انا
> ما صقر قريش بتاع المسرحية
> بالطبع ليس عبدالرحمن الداخل
> فالداخل لا يعرف ما هي التأشيرة
> وليس له جواز سفر
> اما صقر قريش هذه المساحة
> فيكفي انه يتمتع بسبع جنسيات
> واذكر من لوحات تلك المسرحية الرائعة
> الاحتفالية التي اقاموها لصقر قريش عند استدعائه في المسرحية
> كان الفنان هو الفنان عبدالمنعم عثمان
> والذي تغنى لصقر قريش بالآتي
> يا صقرنا يا صقرنا ويا صقرنا
> انت تزرع في نخيلك ونحنا نعصر في تمرنا
> يا صقرنا يا صقرنا يا صقرنا
> والاشارة من الاغنية في المسرحية واضحة
> انت يا عبدالرحمن الداخل تزرع في النخيل
> ويقصد به المجد العربي الحلال
> ونحنا نعصر في تمرنا
> اي نعيش علي الخمارات مستثمرين كنا او زبائن
> فنصنع منها بحراً وداراً
> والعياذة بالله
> المهم
> يبقى وضح إنو صقر قريشنا هو البايع الكنيسة وضابح الكديسة كيري
> وسوف نعرج للمزرعة التي قامت حولها العوة
> صقر قريش الزمن ده لا يشبه صقر قريش الزمن الجميل
> المهم
> لاحت شمس التأهل
> وحقو ما تشيلنا نومة تسرق مننا صباح الانتصار الجميل
> نصحصح شوية
> نرفع المعنويات
> نوحد القلوب
> نقوي العزيمة
> نحارب الهزيمة
> ونعلن رفع راية منازلة الترجي
> بعض الاشكالات التي يصنعها الناس
> القصد منها تشتيت التركيز
> وإفساح المجال لدخول اليأس للنفوس،
> ولكن لن ندع تلك الاشكالات تتسلل بين أيدينا لتفتننا
> سنرفع راية النصر ونحميها
> زيادة جرعات الاعداد والاستعداد يا غرزة
> رفع الروح المعنوية والضبط والربط يا حسن يوسف
> الاصرار ونضع هدفنا الانتصار يا اولادنا
> لنعود من جديد للمدرجات مرددين رائعة عمر محمود خالد
> بالاعداد والعمل الجاد > > > للأفراح نكتب ميلاد
> التشجيع الداوي ودايم > > > لازم يهز أرض الإستاد
> والجمهور الواعي وفاهم > > > هو الدافع وهو الزاد
> يلا جميع نملأ الاستاد > > > للإبطال نهديها تحيه وللأجيال نبني الأمجاد
> بالتأكيد الأمجاد التي يقصدها دكتور عمر
> ليست الامجاد الواقفة جمب جاد وممنوع تدخل المطار
> فأمجاد دكتور عمر المقصودة
> هي الامجاد التي دخلت وستدخل المطار
> أيها الناس
> كردنة قال بدفع خمسة وعشرين في المية من تكلفة ما أسماه الجوهرة الزرقاء
> وبقعد خمسة وعشرين سنة
> أسي غير الكلام
> قال بدفع مية في المية
> ياربي برضو قاعد مية سنه ؟؟
> طيب لو هو قعد مية سنة
> الهلال بي قعاد كردنة بقعد عشرة شهور ؟؟؟؟؟
> لكن ما يضحكني
> انو الموضوع قالوا عند شركة صينية
> يعني ما اصلي
> يعني ممكن الكشافات تولع ببببق
> وتحرق طوالي
> ممكن الباب ما يفتح
> شغل صيني
> تقليد
> ومعروف انو الصينيين احسن من يقلد
> ما ببتكروا
> لكن بقلدوا ليك الشيء الخالق الناطق
> شكلا بس
> مضمونا بكون اي كلام
> خليهم يا كردنة يقلدوا ليك القلعة الحمراء
> بعد داك يقع بالناس يقع في ناس
> قول قضاء وقدر
> ايها الناس
> الصينيون ممكن يصنعوا ليك لمبة مثلاً
> نفس اللمبة بي دولار
> ونفسها بي نص دولار
> ونفسها الدستة بي دولار
> ونفسها المية بي دولار
> حسب قروشك
> باقي ليكم كردنة ده اتفق معاهم علي ياتو لمبة ؟؟؟
> صديقي عماد الطيب
> راجع العقد بوصفك محامي
> وشوف ياتو نوع في اللمبات مكتوب في العقد
> المهم
> داير اقول ليكم شيء
> لكن لمبة
> المرة الجاية
> ايها الناس
> علمتني امي
> وقالت لي البمد يدو للرجال بكسر عينو قدامهم
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> والينا
> بصاتكم الجديدة دحين ما طويلة شديييييد ؟؟؟
> دي غايتو الا تشتغل الخرطوم بورتسودان يا والينا
> تصل بورتسودان تستعدل على الخرطوم جمب الميناء
> لكن في الخرطوم الزحمة دي الا تستعدل في الابيض عشان ترجع بورتسودان
> قصوها ما دام جبتوها ووكت ما بترجعوها
سلك كهربا
ننساك كيف وممكن نغير شوارع البلد كلها لي بص بدل نغير البص
والي لقاء
سلك


‫3 تعليقات

  1. الجوهرة الزرقاء أصبحت الجوهرة الصينية . أخشي علي الحسناء الصينية وسط المنطقة الصناعية من مسمار او مفك طاير