زواج سوداناس

شوفوا المريخ..(بيانكم) مع الشرطة والاتحاد كان عن تطوير (محلية كرري)؟!!


شارك الموضوع :

مجلس المريخ اصبح يخرج بيانات بمعدل (بيان) مع كل (خروف)
ازمة المريخ ليست في بلة جابر و ضفر وبكري المدينة وعلي جعفر وإنما ازمة المريخ الحقيقية في جمال الوالي ومتوكل احمد علي والفريق طارق
المريخ الذي يختار حكامه اصبح يُمنح في اي مباراة ضربة جزاء..امام هلال كادقلي اضاع مصعب عمر ضربة جزاء
كأن جمال الوالي في الـ (13) سنة الماضية كان يدير (ساقية) او كان يدير (محطة وقود) لو دا بيانكم

البيانات التى يصدرها مجلس ادارة المريخ من حين لآخر هذه الايام بمعدل (بيان) مع كل (خروف) هي بيانات مضحكة ..كأنها تخرج من متوكل أحمد علي ، لأن (النتف) ظاهر في كلماتها.
في زول ونحن في الالفية الثالثة بنتف سلك عربية التلفزة ..لو ما الحكاية (فوضى) ساكت.
حقيقة اتعجب من ان يكون مستوى مجلس ادارة نادي المريخ بهذه الضحالة وهو يخرج (بيانات) بهذا المستوى (الدرامي) المضحك الذي لا نشهده حتى في دراما رمضان في الفضائيات السودانية.
لا الطيب الشعراوي ولا عوض شكسبير بعملوا في البتعملوا فيه دا يا ناس همد والفريق طارق.
امس اخرج مجلس ادارة نادي المريخ (بيان) جعلنا نقول ان جمال الوالي الذي ادار المريخ منفردا لمدة (13) سنة متواصلة لم يتعلم فيها اي شيء.
(13) سنة راحت ساكت.
شمار في مرقة.
ما استفاد منها جمال الوالي اي شيء.
وكأن جمال الوالي في الـ (13) سنة الماضية كان يدير (ساقية) او كان يدير (محطة وقود) ، فقد ثبت عدم استفادة جمال الوالي من تلك الخبرات العريضة وهو يقود نادي من اكبر الاندية في السودان.
الزول لو قعد (13) سنة في شارع عام بيحفظو ويقعد يوصف ليك اي (طبلية) في الشارع.
الهندسة (5) سنوات.
الطب (6) سنوات.
انت يا جمال الوالي بعد (13) سنة مازالت كما يقول الزميل حسن فاروق (سنة اولى ادارة).
الناس بتتعلم وبتعرف..ما معقولة تصدروا لينا (بيان) كأنه طالع من (جزارة) او محلات (غيار زيت).
او من كتاب سنة تالتة بتاع المطالعة.
سوف نعرض لبيان المريخ ونقدم بعض الاجزاء من البيان الذي اخرجه مجلس ادارة نادي المريخ لنثبت ان ازمة المريخ ليس في بلة جابر واحمد عبداللـه ضفر وبكري المدينة وعلي جعفر وانما ازمة المريخ الحقيقية في جمال الوالي ومتوكل احمد علي والفريق طارق الذي نال درجة الدكتوراه قبل أيام.
لو كان الامر بيدي لسحبت منه درجة الدكتوراه وهو يخرج بيان على ذلك الشكل (التطفلي).
ما دخل المريخ في انسحاب الهلال ..ينسحب او لا ينسحب هذا امر بين الهلال والاتحاد العام.
لماذا غضب مجلس المريخ عندما استجاب الاتحاد العام لشروط الهلال او دعونا نقول عندما احترم مطالبه.
في البدء ..نحن ضد هذه البيانات بصورة عامة ..ومع سيادة القانون وتطبيقه على الجميع على الاتحاد وعلى الهلال وعلى المريخ.
لكن للاسف الشديد ..اتضح ان الاتحاد العام يسيّر نشاط كورة القدم في السودان عبر (البيانات) والجوديات ..وقد ثبت وبرهن للجميع ان اكثر المستفيدين من الجوديات والبيانات والمعاملات التى هي من تحت التربيزة نادي المريخ.
وما اعلان الهلال انسحابه من الدوري الممتاز اخيرا إلّا تأكيدا على تجاوزات المريخ والاتحاد معا..بعد ان اصبح الاتحاد العام مستعمرة مريخية كما قال رئيس نادي الهلال في حواره مع قناة النيل الازرق.
هذه البيانات نحن ضدها ..لكن اذا كان الاتحاد العام لا يعرف ادارة كورة القدم في السودان إلّا عبرها ..فان الهلال يجب بوضع اليد ان يكون عنده نصيب من تلك البيانات.
يعني عاوزننا نخلي ليكم (البيانات) براكم ..تنوموا وتصحوا بيه ..ويبقى الهلال صاحب الجلد والرأس من لجنة الاستئنافات الى لجنة التحكيمية.
قالوا ليكم نحن ما بنفهم.
وما بنعرف.
عاوزنها بالقانون ..نحن اسيادو.
عاوزنها بالبيانات ..بنشيل نصيبنا منها.
تعالوا نشرح بيان المريخ المضحك الذي اصدره مجلس المريخ امس.
انظروا كيف بدأ مجلس المريخ بيانه ..الذي يثبت فيه ان الدنيا (مهدية) وان المريخ لا يحترم السلطات الممثلة في اتحاد الكرة وفي مجلس الصحافة ..علما ان المريخ اكثر المستفيدين من هذه (الجودية) التى تحدث عنها البيان.
يقول البيان : (جاء بالأجهزة الإعلامية صباح اليوم الاثنين إشارة لأعمال الجودية التى قامت بها لجنة ( الرصد والشكاوى بمجلس الصحافة والمطبوعات) عن ما سمى ( إحتواء الخلافات ووقف المساجلات) بين صحيفتي (الزعيم) و (الاسياد) , وعن الجودية الاخرى المسماة (طي صفحة الخلاف ) بين (الاتحاد ) و (الهلال) .
يرجو مجلس ادارة نادي المريخ توضيح وجهة نظره الرسمية على النحو التالي : –
ما قامت به المؤسستين (مجلس الصحافة ) و ( الاتحاد السوداني ) يؤكد ما ظل يذكره مجلس ادارة نادي المريخ فى كثير من المواقف والتى تتلخص فى أن الأجهزة الرقابية أو السلطات المختصة بالشأن الرياضي عاجزة أو غير راغبة أو لا تتوفر لها الإرادة لتطبيق القانون وحسم الفوضى التى أصبحت سمة غالبة فى الوسط الرياضي بسبب هذا المنهج ).
هذا ما جاء في الجزء الاول من بيان المريخ والذي نعلق عليه بواقعة هي سبب ما نحن فيه الان.
اين كان مجلس المريخ عندما عالج اتحاد كورة القدم مع مجلس المريخ احداث مباراة المريخ ومريخ الفاشر بي (بيان) بعد ان توقفت المباراة لمدة ساعة كاملة وتم اخراج الشرطة من الملعب.
لقد كان مجلس المريخ الذي يتحدث الآن في استغفال للناس طرفا في بيان ثلاثي كان بين المريخ والاتحاد والشرطة بعد ان قالوا انهم حلوا تلك الازمة بواسطة البيان المشترك.
بالمنطق ..اخطر البيان الذي اصدره الاتحاد والهلال بعد إعلان الهلال انسحابه من الممتاز ام ان الخطر كله كان في البيان المشترك الذي كان بين الشرطة والاتحاد والمريخ.
لماذا يريد مجلس المريخ ان تتعامل معهم السلطات بالرفق واللين واللطف والجودية بينما تسأل عن (القانون واللوائح) عندما يكون الهلال طرفا في الازمة.
اين كان القانون الذي يتحدث عنه مجلس المريخ عندما تم اخراج (الشرطة) من الملعب بواسطة (الجمهور) كأول حدث بهذا الشكل تشهده الملاعب في العالم؟.
اين القانون ..عندما عالج الاتحاد العام اعتداء بكري المدينة على حكام مباراة الاهلي شندي والمريخ بلائحة (جودية) ايضا وتم ايقافه (6) مباريات ليخالف نصا واضحا في القانون يلزم الاتحاد معاقبة بكري المدينة على اقل تقدير لمدة عام؟.
مجلس المريخ يبدو عليه انه صاحب ذاكرة (سمكية) ..لأن الجودية التى رفضها الآن ..هي التي تعالج بها كل قضايا المريخ.
مجلس المريخ صاحب البيان المشترك (الثلاثي) بين الشرطة والاتحاد والمريخ يتحدث عن بيان الاتحاد الاخير ويقول : (البيان المشترك للاتحاد السوداني والهلال هو محاولة لإيجاد مخرج آمن للهلال من قراره السابق بالانسحاب عن بطولة الدوري الممتاز ولأسباب واهية القصد منها فقط التهديد للخروج بمكاسب غير مستحقة قانوناً).
يا ربي البيان المشترك بين الاتحاد والشرطة والمريخ كان من اجل تطوير وإعمار محلية كرري.
مجلس المريخ الذي يحدد ويختار اسماء الحكام الذين يديرون له مبارياته اخر من يتحدث عن (القانون).
القانون دا خلوه …ما تقربوا عليه..عشان انتوا اكتر من ينتهكه.
نرجو من جمال الوالي عندما يريد ان يصدر بيان باسم مجلس المريخ ان يصدر بيان محترم ..ومنطقى ومعقول.
ما تبقوا لينا زي حكاية كوبري المنشية الذي قالوا ان (الجقور) هى التى كانت سببا لتصدعه.
احترموا في الناس قدراتها ..وخاطبوا ذكاء الناس بمسؤولية بعيدا من هذه (الخرباشات) التى تجعل الناس يضحكوا عليكم بما في ذلك المريخاب انفسهم.
في جزء اخر من بيان المريخ (المسخرة) يؤكد مجلس المريخ ان البيان المشترك بين الاتحاد والهلال اراد فقط ان يظهر ان الاتحاد استجاب لضغوط الهلال.
شوفوا الكلام ..طيب انتوا وقت عارفين ان الاتحاد لم يستجب لضغوط الهلال وان الامر لا جديد فيه الحارق رزكم شنو؟.
زعلانين مالكم؟.
دي كمان حاسدننا فيها.
بيان المريخ اثبت ان الاتحاد لم يستجب لضغوط الهلال ..وقالوا ذلك صراحة في البيان (يعلم الجميع بأن الشكوى فى صحة تسجيل اللاعب بكري عبدالقادر تم رفضها من قبل اللجنة المنظمة ثم لجنة الاستئنافات قبل حوالي شهر , وفى مقدور الطرف صاحب الاستئناف استلام القرار مباشرة من المكتب المختص وليس من خلال اجتماع مشترك يضم قيادات الاتحاد ليتم تصوير الامر وكأنه استجابة لضغوط من نادي الهلال).
يا جماعة اللـه ..الجماعة ديل ما في زول بيديهم عقلهم …المشكلة شنو اذا كان الامر كله كان مجرد (تصوير) وقد لخصه مجلس المريخ في (وكأنه استجابة لضغوط نادي الهلال).
اذا كان (تصوير وكأن) فقط ..البخليكم تزعلوا قدر الزعل دا شنو؟.
واللـه فعلا ما عندكم موضوع.
الظاهر مجلس المريخ عاوز يثبت للناس انو شغال وانو قاعد ..ومتابع للأحداث ..وهم ببيانهم هذا اثبتوا انهم برة الشبكة.
مجلس المريخ الذي يتحدث عن القانون تدخل فيما لا يعنيه عندما حدد مجلس المريخ قضية الهلال مع بكري المدينة واختصرها في (المبلغ) الذي استلمه بكري المدينة من الهلال.
وكأن هذا المبلغ استلمه اللاعب من الهلال في (شحنة بصل) او في (حصاد حواشة).
بيان المريخ يحدد للهلال قضيته ويقول حرفا : (ومنعاً للتضليل السائد حول هذه القضية فان التحكيم هو بين نادي الهلال واللاعب بكري فى المبلغ المستلم والمودع بكامله طرف الاتحاد).
باللـه في عنجهية اكتر من كدا.
الغريب ان بيان المريخ الذي هاجم الاتحاد دافع عن اسامة عطا المنان ليكون بيان مجلس المريخ هجوم ودفاع للاتحاد في نفس الوقت وهو يقول كماء جاء في البيان : (وأن ممثل اللاعب بكري فى هيئة التحكيم وحسب رغبة اللاعب كتابة هو الســيد متوكل احمد علي وليس الســيد اسامة عطا المنان . والذى درج الاعلام الهلالي على ايراد اسمه كممثل للاعب تضليلا للرأي العام وإظهاره بعدم الحياد أو الإنحياز للمريخ وهي فرية وكذبة معلومة الدوافع والأغراض).
الناس ديل اتعلموها وين؟.
ليك حق (تنتف) سلك عربة التلفزة يا متوكل أحمد علي طولما هذا هو منطقكم.
ويا بكري اقنع منها لو متوكل وكيلك.
نكتفى بهذا القدر من البيان ..لأن ما تبقى من بيان مجلس المريخ لا يصلح حتى لأن يكون (علف) دواجن.
……
ملحوظة : الظاهر الجماعة ديل قامت بيهم (الجوهرة الزرقاء) الزعلة دي ما زعلة بيان دي زعلة (الجوهرة الزرقاء).

هوامش

يا مزمل عليك اللـه في (مستلزمات اطفال) اكتر من ما جاء في ذلك البيان.
المريخ الذي يختار حكامه اصبح يمنح في اي مباراة ضربة جزاء.
امس امام هلال كادقلي منح المريخ ضربة جزاء.
ديل مع هلال كادوقلي عاوزين ليهم ضربات جزاء.
الغريبة ضربة الجزاء برضو ضاعت.
معقولة اي مباراة ضربة جزاء ضائعة للمريخ.
اضبحوا ليكم (ديك).
عشان العارض يفك.
……
عاجل : غازريتو لو استمر بالطريقة دي بتلحقوه حسام البدري عندما رقد في رويال كير.

شارك الموضوع :

تعليقات الفيسبوك

تعليقات


2 التعليقات

      1. 1
        Adil

        رائع ومنطقي

        الرد
      2. 2
        abu-aabid

        يا ود عبد الماجد انت رووعة ومقالاتك علم وفن ودراما وادب ربنا يحفظك وعينا باااردة بس ناس كابو اسكورب ديل يا كافى البلاء لا بيقروا ولا بيتعلموا !!!!

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *