زواج سوداناس

الحوثيون 1/1000 يا ماجد اقعدوا جمب نوش


شارك الموضوع :

> موضوع الساعة فرض نفسه علينا
> تحالف العرب وحرب الحوثيين
> أو قل تحالف المسلمين في حربهم ضد الحوثيين
> او قل حرب المسلمين ضد المسلمين
> كلنا مسلمين
> حتى باختلاف المذاهب والانتماءات كلنا مسلمون
> وفي مثل هكذا مواقف
> ربنا سبحانه وتعالى ورانا الحل
> قال لينا لو في طائفتين من المسلمين اقتتلوا
> نصلح بينهما
> فإن بغت احداهما على الأخرى
> نقاتل التي تبغي حتى تعود الى امر الله
> واظن ان الاخوة الحوثيين قد غرتهم الانتصارات
> وابوا الصلح
> والمابي الصلح ندمان
> لكن حقيقة ما يقطع القلب بعض التعليقات في الشبكه العنكبوتيه
> واكتر حاجه المتني
> صورة لاوباما وهو يضحك تحت تحت قائلا
> العرب لما اتفقوا ضربوا اليمن
> ومما المني كثيراً
> القوة العسكريه الهائله المستخدمه في الحرب
> والاسلحه المباده بعد بداية الضربات
> كلو سلاح عربي
> الضارب والمضروب عربي
> شتتنا قوتنا بيناتنا والغرب يتفرج
> ولو جمعنا ما استخدامناهو في الحرب وما ابدناهو للحوثيين
> لضمنا حماية امتنا مية سنه لي قدام
> ولكنها قوة الرأس
> اللهم بعد ده ادي الناس رأسها
> ووحد بين قلوبنا
> وعلمنا الاسلام على حقيقته
> دينا لاي زمان واي مكان
> يتعايش مع الجميع بدون خنوع ولا خضوع ولا يحقر بالآخرين
> ايها الناس
> اعجبني قرارنا الاستراتيجي بالانضمام للتحالف العربي
> واعجبتني تغريدات الاعجاب في حق جنودنا وفي حق موقفنا من ذلك التحالف
> ويا اخواني قالوا الحاره جات
> واصلو نحنا بنتعرف يوم الحاره تجي
> اللهم سلم اولادنا وانصرهم ووفقهم لرفعة رأسنا فوق شديد
> المهم
> قالوا الكسير بدأ في نادي الهلال
> ما كسير التلج
> ده موجود من بدري
> كسير الحيط
> ووقتها تذكرت حيط استاد المورده
> مكسره لي اسي
> سبعه سنين مكسره
> مكسره في منو ما عارف
> الهدم هين
> صعب البناء
> والتكسير بدأ بالنادي
> يعني فصيل استاذ ماجد يتخارج
> يقعد جمب نوش لما مدة المجلس تنتهي
> معقوله بس
> الشغل حسب المجسم من الناحيه الشرقيه والناحيه الغربيه
> وفي دكاكين مستاجرات
> الدكاكين شغاله
> كان مخازن كان دكاكين
> والشغل يمشي كيف ؟؟؟
> لو المهندسين صينيين
> الهلالاب ديل هنود ؟؟؟؟
> ايها الناس
> عند وضع حجر الاساس
> اسلام قالت لي الخوف يبقي ده الشاهد الاول في مقبرة الهلال
> فضل الشاهد التاني
> وبالواسوق يا عابدين
> قلت ليها بعد الشر
> ابو الهل صغير وجاهل
> لي اسي ما عمل شئ
> لاجاب كاس من بره
> لا طلع من زيرو كبير
> ولا اتسجل في لوح الشرف الافريقي
> المهم
> شركة مستلزمات الاطفال الدايره تبني قلعة الهلال ما غريبه علي
> دحين عمارة البرير موش مركز لعب الاطفال المستورده من الصين؟؟؟
> يبقي الشركه بتعرف الهلال من زمن البرير والهلال بعرف الشركه من زمان
> المورداب صبروا
> الهلالاب بصبروا ؟؟؟
> محمد عبد الماجد
> بعد التكسير ده الشمس بتسخن معاكم
> تعالوا اقعدوا في ضلنا
> ضلنا بتاع الطابق التاني
> علي بال ما تلقوا ليكم صرفه
> ضل في اليد ولا جوهره في الخيال
> يا بتوع الكاردينيال
> ولا ما مكتوب كده في الشاهد
> اقصد في حجر الاساس ؟؟؟؟
> المهم
> اليوم نلتقي هلال كادوقلي
> بالقلعة الحمراء موش في حجر الاساس
> وهي تجربة جاده لمباراة التأهل
> نتمني ان يؤديها اولادنا بجدية كبيرة
> حتى نطمئن عليهم في انجولا
> وعلي الجماهير ان تأتي مسانده
> بكثره وبشده
> نشحن اولادنا تمام
> ونوديهم انجولا وفي نفوسهم اصرار
> على الأقل من اجل الجمهور والكيان والتاريخ
> نعمل العلينا
> وفي انجولا الاولاد ما بقصروا
> وقلبي يحدثني بتأهل من قدم المدينة
> كبسور بموت
> ايها الناس
> اتمني ان يؤدي هلال كادوقلي مباراة قويه
> بس بعيد عن تعمد اصابة اولادنا
> ونحنا بنفرز
> ضربة التعمد من الصدفه
> وعلي التحكيم ان يعطي كل زول حقو
> وان يحمي المواهب بالصرامه
> المهم
> ماذا فعل الاتحاد في استئناف المريخ المتعلق بعقوبة بكري المدينة؟
> وهل ذبح المدينة هو ارضاء لجهات بعينها ام عقوبة يستحقها المدينة؟
> وهل لو كان المدينة قد اعاد قيده بناديه القديم
> واتي نفس الفعل «ان اتي اساسا بفعل»
> هل كانت ستكون هذه هي العقوبة؟؟
> وهل من اساسو كان بكون في تقرير فيهو ادانة لبكري؟
> وكيف تسرب التقرير؟
> واين ذهب تقرير الحكم اليوغندي الذي كان يوضح فيه انذاره لعمر بخيت؟
> لسه في يوغندا ولا رسلو؟
> لو كان هناك نرسل جمال سالم يجيبو ويجي
> باقي ده تقرير مهم شديد
> ولا شنو يا مجدي؟
> المهم
> كلنا من عصرا بدري لموقعة كادوقلي
> ايها الناس
> علمتني امي
> وقالت لي
> الما بار بي امو بلى بخمو لما يعرف حاجه
> لو قدامو سنكيت ما بمشي بعيد
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> وكان شفت يا والينا
> وكان شفت يا والينا
> تحالف العرب عاجبنا يا والينا
> واريتو يبقي تحالف للعرب يقوينا
> لكل العرب يجمع بينا
> نرفع رأسنا فوق يخلينا
> ما يبقي تحالف مهمه ويعود الحال القديم لينا
سلك كهربا
ننساك كيف والطيارة الضاربه والقاعده المضروبه كلهن عربيات
والي لقاء
سلك

شارك الموضوع :

تعليقات الفيسبوك

تعليقات


1 التعليقات

      1. 1
        Adil

        يجب مراعاة اللغة مرة محن مسلمين ومرة نحن مسلمون. انت درست وين؟ الرجاء عدم مناقشة الامور السياسية بمثل هذه السذاجة وبمثل هذه اللغة الفجة احسن خليك في الدافوري

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *