محمد عبد الماجد

يا رمضان عجب الجابرك على القُعاد مع الجماعة ديل شنو؟ اذا كان (الوالي) ذاتو ماشي


جمال الوالي في المريخ اصلا المقعدو (المقصورة الطائرة)..وقت الهلال يعمل ليه (جوهرة زرقاء) البخليه شن بقعدو؟
“””””””””””””””””””””””””””””
(13) سنة في كل (ابريل) جمال الوالي بقول خلاص انا ماشي ..خلاص انا ما بقعد
“”””””””””””””””””””””””””””””””””””””””””””
بعد (الجوهرة الزرقاء)..(الرد كسل) ح تكون متل (دار الرياضة) ام درمان زول بيشعر بيها مافي
“””””””””””””””””””””””””””””””””””””
تاني ناس علي جعفر ح يشتغلوا بـ (تحويل الرصيد)..وناس بلة جابر برجعوا لي سندوتشات الطعمية ..(البوفيه المفتوح) قفل
“””””””””””””””””””””””””””
• جمال الوالي طبعا في شهر (ابريل) من كل سنة عندو حركة ثابتة (تلاتين عشرة).
• حركة بعملها (اول ابريل) تحديدا…(افهموها زي ما عاوزين تفهموها).
• في ذمتكم انا هسع جبت سيرة (كضبة ابريل)..وإلا اشرت ليها ساكت.
• براكم بتفترضوا ليكم حاجات وترموها فينا نحن.
• تشيّلونا (الذنب) ساكت.
• نحن (الحركات) دي عارفنها – وكاشفنها…ولا بتفوت علينا.
• حافظنها نحن بي (قشر موزها).
• حركة جمال الوالي دي لأنها مكشوفة نحن قاعدين نسميها (تلاتين عشرة).
• العاوز الجلاكسيات ..يمشي (الجوهرة الزرقاء).
• ناس (التلاتين عشرة) يمشوا بي جاي..وناس (الجلاكسيات) يجونا بي جاي.
• انت يا رمضان عجب الموقفك مع ناس (تلاتين عشرة) شنو؟.
• تعال انت بي جاي اقيف مع ناس (الجلاكسيات)..انت ما عارف قيمة نفسك.
• اقيف لينا مع ناس الشغيل.
• كل حد يمد كراعو حسب ماركة موبايلو.
• قدر استادو.
• رمضان عجب شكلو عاوز يتخارج من (تلاتين عشرة)..يقولوا ليكم الكلام الف مرة.
• وتقعدوا تغالطوا.
• (13) سنة في كل (ابريل) جمال الوالي بقول خلاص انا ماشي ..خلاص انا ما بقعد.
• (13) سنة ونحن في الحالة دي.
• جمال ماشي..والجماعة يدوروا ليك (تحانيس).
• ونحن ما بنقعد بلاك.
• ونحن من غيرك ما بنكون.
• والمريخ بلاك بيبقى خلا.
• في (اول ابريل) جمال الوالي طوالي بقول انا ح امشي شهر مايو.
• نحن عارفين.
• نحن ناقشين.
• ويضيف ح نتيح الفرصة للاخرين…(لا ما بصدق).
• اصلو ما معقول.
• اصلو ما ممكن.
• جمال الوالي بيقول كمان سوف اخدم المريخ واقدم له الدعم من اي موقع ..ودعمنا للمريخ لا يرتبط بالمناصب.
• صدقناك.
• نحن مصدقين.
• نحن خلونا – انتوا مقتنعين بالكلام دا.
• طيب يا جمال الوالي وقت قطعوا الكهرباء من نادي المريخ في عهد عصام الحاج ..انت كنت (قافل تلفونك) من ناس الفريق عبدالله حسن عيسي ليه؟.
• ما تقول لينا (البطارية) نزلت.
• جمال الوالي ذاتو ما بشيل ليه تلفون بطاريتو بتنزل.
• انت قايل الكهربة القطعوها من نادي المريخ ..قطعوها من نادي مريخ الحصاحيصا؟.
• طبعا ناس مريخ الحصاحيصا ما عندهم اي دخل.
• وبرّد يا.
• في احدى الصحف الرياضية جاء عن رحيل جمال الوالي من المريخ هذا الخبر : (أكد جمال الوالي رئيس نادي المريخ رحيله عن رئاسة النادي في مايو القادم موضحا في اجتماع عقده الرئيس مع المجلس الاستشاري مساء الثلاثاء ان مسألة الرحيل بنيت على قناعة كاملة وليس هروبا من المسؤولية او خوفا من المعارضة لكنها مسألة فرضتها ظروف خاصه تتعلق بي شخصيا ومضى الوالي قائلا :لا أستطيع الإفصاح عن أسبابي الشخصية بالتفاصيل لان الصلاة نفسها فيها السر والجهر).
• نحن ما عندنا مشكلة.
• نحن بنصدق.
• ان بقت علينا نحن ..اصلو ما مختلفين.
• الغريبة ان صحيفة الصدى جاء في عناوينها الرئيسية خبر عكس ذلك الخبر الذي نشر في عدد من الصحف امس.
• الصدى قالت عبر عناوينها الرئيسية ( جمال الوالي يتعهد لمجلس الشورى بعدم الرحيل إلا والمريخ في افضل حالاته).
• كلام (الصدى) يعني ان جمال الوالي لن يرحل من المريخ مدى الحياة – لأن جمال الوالي قال لن يرحل وإلا المريخ يكون في افضل حالاته.
• ومع ناس علي جعفر ديل – ما اظن المريخ يكون قريب في (افضل حالاته).
• يعني يا ناس (تحالف المعارضة) ..اقنعوا من رحيل جمال الوالي من المريخ طالما ربط الرحيل بان يكون المريخ في افضل حالاته.
• الغريبة ان الصدى التى اكدت عدم رحيل الوالي إلا اذا كان المريخ في افضل حالاته ..جاءت بهذا الكلام من اجتماع الوالي بمجلس الشوري.
• في الوقت الذي اكدت فيه الصدى عدم رحيل جمال الوالي ذهبت صحف المريخ الاخرى لتأكيد رحيله.
• والاخبار كلها طالعة من حدث واحد.
• هذا التباين في الاخبار ..مع ان المصدر واحد ..يؤكد لنا ما اشرنا اليه ان جمال الوالي بعرض فكرة الرحيل ساكت كدا وبتراجع عنها.
• لا برحل ولا حاجة.
• قاعد.
• لكن بيني وبينكم ..والكلام دا ما يطلع من العمود دا …بعد افتتاح (الجوهرة الزرقاء)..جمال الوالي صعب يقعد ليكم يا ناس المريخ.
• جمال الوالي في المريخ اصلا المقعدو (المقصورة الطائرة)..وقت الهلال يعمل ليه (جوهرة زرقاء) البخليه يقعد شنو؟.
• البقعدو شنو؟.
• الزول دا اصلا الكورة كان قنعان منها.
• مراقتو كانت (المقصورة الطائرة).
• بعد (الجوهرة الزرقاء)..(الرد كسل) ح تكون متل (دار الرياضة) ام درمان زول بيشعر بيها مافي.
• جمال الوالي على كيفو.
• رمضان عجب وقت (الرئيس) عاوز يتخارج ..هو البقعدو شنو؟.
• الزول بتاع (الضحاكّات) يا رمضان عجب (مغادر المجموعة) انت البخليك تقعد مع الجماعة ديل شنو؟.
• اظن بعد كدا الجماعة ديل ما عندهم منطق.
• ولا بقدروا يسألوك.
• ولا بقدروا يقولوا ليك حاجة.
• ح تقعد لي ناس متوكل أحمد علي.
• يا رمضان عجب قول ليهم (جمال الوالي) ذاتو قنع من المريخ ..انا البقعدني شنو؟.
• بعدين انت عارف ظروف المريخ من غير جمال الوالي ح تصبح كيف يا رمضان عجب.
• اكيد ما عارف.
• لو عارف بتشيل (شنطتك) من الليلة وتتخارج من المريخ.
• بتعمل نفس حركة حمودة بشير.
• وعلاءالدين يوسف.
• والشغيل.
• عليكم الله يا جماعة زول يشيل العمود دا ويوصلو لي رمضان عجب بالاسم ..عشان يكون عارف الحاصل.
• عشان ما يغشوه ساكت.
• يا رمضان عجب ..نحن نكون واضحين معاك…بعد جمال الوالي (الكهربة) في نادي المريخ ما بتقعد.
• البخليك تقعد في نادي رئيسو ذاتو ما مستقر شنو؟.
• وعشان تكون عارف يا رمضان عجب ..نحن ناس سلك ومعاوية الجاك فتحنا ليهم باب القبول الخاص.
• ناس سلك ومعاوية الجاك ..هم ذاتهم فتروا من (التصبيرة) البعملوا فيها للجماهير.
• خلاص حكاية (المقصورة الطائرة) دي بقت ما بتقسم مع جماهير المريخ.
• يعني يا سلك بعد (الجوهرة الزرقاء) اوعى اسمع لي واحد فيكم يقول (المقصورة الطائرة).
• نحن لو اقتنعنا – البقنع (رمضان عجب) شنو؟.
• يا رمضان عجب انت البوقفك مع ناس المقصورة الطائرة ديل شنو؟.
• اطلع لينا بي جاي مع ناس (الجوهرة الزرقاء).
• ناس المريخ ديل حالتهم ح تصعب على الكفار بعد رحيل جمال الوالي من المريخ.
• تاني ناس علي جعفر ح يشتغلوا بـ (تحويل الرصيد).
• وناس بلة جابر برجعوا لي سندوتشات الطعمية ..(البوفيه المفتوح) قفل.
• البقعدك مع الحالات دي شنو؟.
• الترحيل ح يكون بي (امجاد).
• والمعسكر في النادي.
• فنادق ..وطيارات ..تاني ما في.
• وبرّد يا.
• لملم حاجاتك سريع يا رمضان عجب ..وان قررت تقعد اقبض قروش كاش.
• استلمها كلها.
• (7) مليار ما تنقص قرش.
• ما تثق في زول..لو جمال فات ..(الشيك) الصادر من المريخ إلّا تصرفو (بصل).
• بعدين انت يا رمضان الجماعة ديل ما قصرت معاهم.
• عملت ليهم اي حاجة.
• كل مرة تنقذ فيهم.
• في الهلال المسؤولية جماعية ..ما ح تتعب التعب البتتعبو في المريخ الآن.
• انت ما تشوف الشغيل ارتاح كيف؟.
• الشغيل كورتو ذاتها اتصلحت.
• اضرب ليه في الشريحة التاني ..بوريك الحاصل شنو في الهلال.
• انت شوف (الباشا) بعد ما اعاد توقيعو في المريخ حصل ليه شنو؟.
• شوف صلاح الامير زمان حصل ليه شنو في المريخ؟.
• نور الدين عنتر.
• ديل ناس ما بقعدوا معاهم.
• نحن كلمناك.
• ……..
• ملحوظة : الجوهرة الزرقاء ح تطفش ناس كتيرة من المريخ.
هوامش
• اضافة (ماركا) الى كتابها الزميل عبداللطيف أحمد (ضفاري) الذي يقدم (عيدية) في الصحيفة من خلال عرض ساخر يجمع بين المحلية والعالمية.
• من دون شك (ضفاري) اضافة حقيقية لصحيفة (ماركا).
• تابعوه واحكموا براكم.
• هسع لو كان ضربات الجزاء بضيّع فيها رمضان عجب ..كانوا قالوا رمضان عجب قاصدها.
• يا الكاردينال ..جوهرتك الزرقاء دي ..ناقصة (عجب).
• عشان نشوف موضوع (البزازات) دي ح يصل وين؟.
• انت يا الكاردينال ما ترد بالتصريحات.
• ولا ترد بالتلفون.
• انت رد بالتسجيلات.
• على (الجوهرة الزرقاء) لو كملت الجميل في تسجيلات مايو ..بتكون ما قصرت.
• وما بتكون خليت حاجة.
• مع الملاحظة التى نرددها دائما ان الهلال (فنيا) الى الآن غير مقنع.
• والجوهرة الزرقاء ما ح تلعب لينا.
• جضم الكفر.
• ………
• عاجل : في (13) جقر اتسللوا من كوبري المنشية في ظروف غامضة ..مشوا وين؟.


‫3 تعليقات

  1. فعلا صحف فارغه وكلام ليس له معنى وبرضوا يقولون صحف رياضيه ده كلام مشطاط ونسه حوارى

  2. الفضاء المفتوح جعل من الصحافة اصعب مهنة .. الأحترافية اذا لم تقترن بالتميز لا تكفى .. استغرب والله ان يجد مثل هذا الهدر والهيافة طريقه للنشر .. الصحافة مهنة محترمة فلا تجعلوا منها مكان للعوارة ووكر للعطالى .. صحفى كيسوا فاضى ومتقندف فوق ام كم .. والله فعلا من اين اتى هؤلاء ؟؟؟

  3. أؤيد ود الشريف … الذين يسمحوا بهذه الخطرفات بين سمسارة المريخ والهلال من ما يدعون اهم صحفيون يستحقوا الابعاد ايضا …ثم تانى انتو ما بتخجلو ا؟ وين الكوره ووين الاعبين … كلهم لاعبين لا يسو ضفر رجل مسى اليسرى ! شاهدوا الكوره الخليجيه وصلت وين ؟؟ الادارات كلها مناكفات وكلام فارغ… لاعبين ملاكمين وشتائم فى الميدان وبالليل فى صالات المناسبات والحفلات الماجنه …ولما اقابلو الفرق الافريقيه فى دور ال 64 يتشاطروا … واول ما دخلو الجد دور ال 16 الجرسه بدت … حكام افريقيا مرتشين .. الرحلة طويله … الفندق ما مريح … عشان عارفين … فرق الكنقو والكاميرون وشمال افريقيا بياكلو الكتوف كسره ولاعبينا كلهم متغزيين بالكسره …
    ياريس دايرين برنامجك الانتخابى يشمل نضافة الوسط الرياضييى من صحفييى المريخ والهلال عشان تضمن اكثر اصوات فى السودان وهو جمهور الهلال والمريخ …ودايرين وزير شباب ورياضه قوى وما بخاف وواثق من نفسه عشان يوقف الفساد الرياضى بدءا من اتحاد الكوره وينظف الوسط الرياضى حتى يكون فى امل لتحسن الكوره فى السودان