زواج سوداناس

(الكاف) يلدغ الاتحاد بسبب العقرب .. !!


شارك الموضوع :

* يا جماعة بصراحة الاتحاد الأفريقي طلع بفهم كورة مع انو الناس قايلين القصة محصورة في (ديكاتورية عيسى حياتو وتحكيم الكاف الماسورة) .. !

* امبارح لما بكري المدينة كان بلعب الكاف (إتشقلب) .. !

* جماعة حياتو لما شافوا (العقرب) قالوا مهاجم زي دا مفروض يشارك مع كل الفرق الإفريقية في المباريات الكبيرة، وما يكون حصري علي فريق واحد عشان (الخير يعم) .. !

* دا كلام الناس البتفهم كورة ..!

* ناس الكاف لما عرفوا أمس العقرب موقوف محلياً رسلوا خطاب للاتحاد العام قالوا ليهم : (انتو لو بتفهموا كورة مفروض إذا وقفتوا لاعب زي دا توقفوا الدوري معاه) .. !

* دوري بدون عقرب حقو ما يلعب .. !

* أمبارح الكاف (أخد موقف) في قرار (إيقاف) المدينة، وقال لناس معتصم : (لو دايرين (تقيفوا) علي حيلكم ما مفروض (توقفوا) لاعب زي دا ولا يوم، عشان الناس تحترم الكورة في إفريقيا والأنظار تتجه نحو الخرطوم) ..!

* معليش يا حياتو انت بتقول في كلام كبير، و(ناس معتصم لسه متخندقين مع الحكم مع انو الأجندة واضحة والجرايد نشرت التقرير) ..!

* تقرير الحكم منشور .. وشقلبة العقرب جهجهت باكات كبسور …!

* كبسور أصلاً عندو مشكلة باكات ..!

* كبسور مضروب في باكاتو وبوتاكو ..!

* الإتحاد متخندق في عقوبة غريبة ..و(العقرب) رأس البلد وبعمل في (شقلبة) عجيبة .. !

* تنويه : مفردة (متخندقين) التي قلناها عن قادة الاتحاد العام اقتضتها ضرورات اللغة، ولا علاقة لها برجل اعمال يتحدث عن نفسه بسذاجة والمجتمع (ساخر)، ويدعو الناس لرفع أياديهم بطريقة بلهاء، و(نحمد الله الذي عافى الصفوة من عشاق الشو وأبتلى القبيلة الررقاء) .. !

* مجتمع الهلال دا ممكون و(صابر) .. !

* شوهد العقرب أمس يمشي على يديه في انغولا ..(صحافة الوصايفة شن قولا) ..؟

* الله يعينكم يا محمد عبد الماجد خلاص (الكاف) حسم موضوع بكري وناوي يعمل (استيضاح) للاتحاد العام .. !

* لاعب زي دا مفروض لو غاب الاتحاد يصدر توجيه يقضي بالبحث عنه في كل الطرقات .. و(يا حياتو انتو أصحاب رؤية ولمسة فنية وكتر خيركم لانكم بتعرفوا قيمة المواهب الحقيقية) .. !

* مشى العقرب أمس عل يديه فرحاً بينما (أوقفت) لمساته الخرطوم على رجل واحدة .. !

* ليس مهماً (أن تقف) الخرطوم ابتهاجاً لهدف العقرب، ولكن المهم حقاً الا (تقف قلوب) بعض أخواننا الهلالاب في موسم الأحزان) .. !

* يا جماعة أحسن (تقيفوا) من متابعة أخبار العقرب عشان (نحنا خايفين على صحتكم) ..!

* (الشقلبة) أحلى مافي الكورة ..و(كابو الفريق منظم شديد، وعقربة المدينة كل يوم بتطلع فيها إبداع جديد) .. !

* قون المدينة شدة ما مزعلكم حقو نعيدو ليكم، و(لو العقرب دا مشى بالطريقة دي الله يغطي عليكم) ..!

* العقرب سألوا منو ناس الكاف، :(وانتو خليكم هنا مع بوبكر قبقبة لحدي ما نقرر الرد عليكم بالود عنكبة) .. !

* أمبارح العقرب جاب القون في انغولا، و(وصايفة الخرطوم كانوا بشجعوا في كابو بشكل جاد، وبعد شوية جاءهم هبوط حاد) ..!

* انهزم الزعيم أمس من قبل كابوسكورب بهدفين مقابل هدف ليخطف بذلك بطاقة العبور ..و(لا عزاء لرفاق كبسور) ..!

* لم يقابل كبسور فريق حقيقي حتى الآن، و(كم كم الزنزباري والرصاصات الملاوية أندية متواضعة وسريعة الذوبان) ..!

* ناس الكاف زعلانين في عقوبة بكري وقالوا للاتحاد السوداني : (دا لاعب بقعد برا يا جماعة انتو دايرين كورة ولا مهزلة) .. ؟

* يا مزمل : انتهينا من كابو الفريق وكتلنا العدو وفرّحنا الصديق .. !

* بقينا ناس ترجي .. و(الكبير دائما بكون قدوة للناس، ونحمد الله أننا ما بنعرف خمسات التوانسة وشراب موية ترباس) ..!

* الحقيقة أن الزعيم هو الفريق الوحيد القادر على قهر عملاق باب سويقة ..!

* فتحنا ملف الترجي و(كابو قفلنا كتابو) ..!

* إتقفلي ..!

نقوش متفرقة

* مبروك التأهل يا صفوة .. و(إذا تعلق قلب الزعيم بالثريا لنالها) ..!

* يا كبسور ما أحلى لحظات العبور ..!

* يلعب الوصايفة اليوم مباراة (فشنك) مع فريق ملاوي، ورغم أن اسمه (الرصاصات) الا أنه لم يسبق له من قبل قتل منافس ..!

* مبروك للزعيم الضرب كابو .. والعقرب الاتشلقب حبابو ..!

* يا المدينة .. يوم بتكتل ليك زول فينا ..!

نقش أخير

* شقلبي طوباية تلقي عقرباية

شارك الموضوع :

تعليقات الفيسبوك

تعليقات


3 التعليقات

      1. 1
        abu-aabid

        خلاص اختزلتوا فريقكم كله فى فد لاعب !!!!! النظرة البلهاء والكتابة الحمقاء لاتخرج الا من قلم المدعو كابو والذى هو عنوان لزمن الانحطاط الصحفى متل هذا يكتب عمود مفترض عمود كهرباء ما يدوهوا ليه !!!!!!(على نسق تشبيهاته العرجاء التى تضرس )
        بقيتوهوا زى امل الامة الذى فى احدى ندواته كان مذيع الندوة ينوه ان مازال امل الامة فى الطريق وكان اجمل تعليق:( الامة دى تطير عيشتها كان زولكم ده ضربته عربية والا مات خلاااص نبقى بلا امل) !!!!
        اها زولكم ده كان بقى اللاعب الاوحد والا ميسو عدييل ودى اخلاقه ودى تصرفاته يخلوهو يمرح ويسرح على كيفو وده الفرق بينكم وبين الهلال الهلال مؤسسة ذات اخلاق ومبادىء وتربية فى الاول وانتو متعودين العجووز المصرى مرمط بيكم الارض وبرضو الحال ياهو نفس الحال ومازال مسلسل تراورى ومهازله قائمة ولم يفتح الله عليكم او على مجلسكم بكلمة !!!
        كابو ده كتاباتو دى بيتعلم الصبر وطولة البال

        الرد
      2. 2
        abu-aabid

        خلاص اختزلتوا فريقكم كله فى فد لاعب !!!!! النظرة البلهاء والكتابة الحمقاء لاتخرج الا من قلم المدعو كابو والذى هو عنوان لزمن الانحطاط الصحفى متل هذا يكتب عمود مفترض عمود كهرباء ما يدوهوا ليه !!!!!!(على نسق تشبيهاته العرجاء التى تضرس )
        بقيتوهوا زى امل الامة الذى فى احدى ندواته كان مذيع الندوة ينوه ان مازال امل الامة فى الطريق وكان اجمل تعليق:( الامة دى تطير عيشتها كان زولكم ده ضربته عربية والا مات خلاااص نبقى بلا امل) !!!!
        اها زولكم ده كان بقى اللاعب الاوحد والا ميسو عدييل ودى اخلاقه ودى تصرفاته يخلوهو يمرح ويسرح على كيفو وده الفرق بينكم وبين الهلال الهلال مؤسسة ذات اخلاق ومبادىء وتربية فى الاول وانتو متعودين العجووز المصرى مرمط بيكم الارض وبرضو الحال ياهو نفس الحال ومازال مسلسل تراورى ومهازله قائمة ولم يفتح الله عليكم او على مجلسكم بكلمة !!!
        كابو ده كتاباتو دى بيتعلم الصبر وطولة البال!!!!!!

        الرد
      3. 3
        hashim

        والله دة النفاق العديييييييل هسة فى ذمتك يا كابو نفس العقرب دة لما كان فى الهلال حا تقول نفس الكلام دة
        اذا قلت ايوة بقول تكون كذاب و اذا قلت لا ما بقول تبقى منافق

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *