رأي ومقالات

تهاني عوض: لو انجليزتك (تعبانة) أحسن تترزع (في السودان) وما تفكر تتخارج ؟


أمس واحد من اقربائي في (الثلاثينات) يقيم في دولة عربية خليجية ، وليهو 4 شهور قاعد عاطل ساي ، الأسبوع الفات اتقدم لوظيفة في شركة يديرها (هنود) ومن اول معاينة (طار) مع إنو عندو (بكالوريوس) ادارة اعمال بتقدير (جيد جدا) من جامعة حكومية عريقة ومعاهو كمان (ماجستير) في ادارة الاعمال (MBA) .. قال لي تصدقي يا تهاني شالوا ليهم واحد عندو بكالوريوس بتقدير (مقبول) لكن في الانجليزي(بلبل) !! وانا لحقت (أمات طه) !! قلت ليهو : مشكلتك انت عارفها كويس .. مشكلتك انك ما بتعرف انجليزي (زي الناس) ولغتك الانجليزية ركيكة (سنجال 2) ! وبتعرف تقرأ لكن ما بتعرف تتكلم زي الناس ..وانا نصحتك قبال تسافر قلت ليك اعمل ليك (كورس مكثف في المخاطبة الانجليزية ) English communication واعمل ليك دورة سريعة في (الكمبيوتر) عشان تزود سرعتك في الطباعة وتسيب الكتابة باصبع واحد ويد واحدة(طريقة الشاكوش دي برة ما بتاكلك عيش بايت) وتقعد تفتش لحروف الكي بورد وعشان تكتب ليك صفحة باستخدام وورد(word) تقعد ليك ساعة إلا ربع ! منو البشغل ليهو زول بكتب ليهو صفحة في الكمبيوتر في ساعة ؟!
المشكلة دي ما مشكلة قريبي دا (براهو) دي مشكلة خريجين (كتار) الواحد يتخرج من الجامعة ويقدم لشغل في السودان ولما يقعد عاطل فترة طويلة (سنتين تلاتة) يضغط على اقاربه في الخارج عشان يشتروا ليهو (فيزا عمل) و اول ما تصل (الفيزا) طوالي ينشغل بالاجراءات واستخراج وتوثيق الشهادات عشان يتخارج من البلد دي بسرعة ! انا بستغرب ما دام الواحد يتخرج وعندو نية يسافر ليه ما يخت في (بالو) انو في الخارج المنافسة قوية والشركات بتبحث عن مهارات وقدرات وخبرات ولغة وليس فقط عن مؤهلات جامعية .. الشهادة الجامعية لوحدها (ما بتأكل عيش) لازم الواحد يأهل نفسو (كويس) في الكمبيوتر والانترنت والبرمجيات ودورات تدريبية في مجالات مختلفة وكمان في اللغات وخاصة الانجليزي . والحكاية دي ما بتاخد (زمن كتير) ..يعني في أقل من (6 شهور) الواحد ممكن يطور نفسو في الانجليزي وفي الكمبيوتر وياخد ليهو كم دورة كدا في الادارة والتخطيط وتنظيم الوقت. وكمان في مواقع في الانترنت بتساعد في تعلم اللغة الانجليزية بسرعة بس الحكاية محتاجة لرغبة واصرار وجدية وشوية صبر والواحد يكون في الانجليزي (بلبل صداح)
, How is your English today? if it is not good , do not think to travel out Sudan , !
لو انجليزتك (تعبانة) أحسن تترزع (هنا قبلك) وما تفكر تتخارج ؟ المتخارج ليها شنو؟

تهاني عوض


‫18 تعليقات

    1. اختي دي شكلها عربي كويس ذاتو ما عندها – عشان كده احسن هي التتخارج من البلد دي – واحد بيهزر

  1. المعلقين السابقين لا يتحدثون عن الموضوع وإنما إنصرفوا لتهاني ،،،،،، خلو عندكم موضوع وأتناقشو في الموضوع ولا تشخصنوا الأشياء ،،،، كلامكم ياتهاني سليم مليون بالمائة ،،،، للأسف غالبية الخريجين لا يتحدثون الإنجليزية بصورة مرضية ناهيك عن جيدة ،، وهذه ستقلل من فرص توظيفهم ،، وحتي إن وجوا فرصة فسيكون عائدها ضعيف ،،،، تصيحتك يا تهاني ، من المفترض أن يفكر بها أي خريج حتي ولو كان يود الحصول علي فرصه جيده بالداخل ،،،،،

  2. كلامك صحيح لابد لمن يريد ان ينجح في المنافسة في سوق العمل وخاصة الخارجي لابد له ان ياخذ بنصيحتك وان يؤهل نفسه جيدا في كل ما ذكرتيه ولا يهمل منه شيئا بل يمكنه ان يضيف … ما اعلمه في الخارج حتى شيء بسيط مثل قيادة السيارة قد يكون عائقا بينك وبين ايجاد عمل … فقط كنت اتمنى من الاخت اسنعمال كلمة غير ( اترزع ) فهي من نوع الكلام الذي قد يقلل فرص قائله في وجود عمل في الخارج فلغة الاستفزاز والاستعلاء هي لغة الاستخدام داخل السودان

  3. كلامها صحيح اللى عايز يلقى وظيفة محترمة الانجليزى والخبرة قبل الشهادة لانه ممكن يعملو ليك معاينة وحتى ما يشوفو شهاداتك . الخريج العايز يغترب يطور نفسه اولا

  4. الاخت تهاني لك التقدير والاحترام وكلامك صحيح 100% وللأسف الشديد الخريج البيصل هنا لا يعرف اي شئ عن الانجليزي والله الواحد فيهم لو قالوا ليه اكتب طلب وظيفة باللغة الانجليزية يعجز عن ذلك ولو كتبه يكتبه بلغة ركيكة جدا مع أنه يحمل شهادات ورقية تثبت ان الشخص الذي امامك خريج جامعة ……. في مجال ….. وهذا هو الواقع . نرجو من الشباب الذين يرغبون في الهجرة او العمل في الخارج ان يطوروا أنفسهم وخاصة في مجال اللغة الانجليزية والكمبيوتر وفي شئ مهم جدا هو الثقة بالنفس وكيفية التعبير عن ذاتك وتقديم نفسك للآخرين بصورة جميلة والاهتمام بالمظهر الخارجي وتحت المظهر الخارجي هذه مليون خط أحمر

  5. بسم الله الرحمن الرحيم

    كلامك صح واللغة الانجليزية فى العالم كله مهمة حتى فى السودان

    كان دراسة او عمل 00

    ولدنا جاب شهادة كبيرة وممتازه رفضت دخوله الجامعة فبل ان يحسن لغته الانجليزية 0

    ممكن ان تتخرج من الجامعة ولكن بدون انجليزى لا تستطيع العمل 00

    وفعلا امانى موضعك حقيقة 00

  6. اعجبني الموضوع وازيد ان معظم الخريجين الذين يحضرون الي السعوديه يعملون في مهن عمالية ولا يعملون بشهاداتهم الا المحظوظ او الذي عنده واسطه نصيحه جميله وياريت لو الزمن برجع عشان نعمل بيها شكرا وتحياتي

  7. مع احترامي للآراء والتعليقات السابقة ، ليست تحدث اللغة الإنجليزية بطلاقة هي المعيار المرجح للحصول على وظيفة في البلدان العربية المجاورة ، اصبحت هنالك معايير شتى لا تأخذ بالكفاءة المهنية واللغوية وحتى إذا كنت بلبل باللغة الأنجليزية وكانت المعاينة بواسطة أحد الهنود الذين يتحدثونها بركاكة مع عدم الأخذ في الإعتبار بقواعد اللغة السليمة ، هنالك بكل أسف معايير اخرى تتحكم في اختيار المتقدم

  8. بسم الله الرحمن الرحيم

    اخى abuhassan

    فعلا الاغلبية شغالة بدون انجليزى والاغلبية فى السابق خريجى ثانوية

    وممكن تعمل بدون انجليزى لكن الافضل تكون الانجيزية تمام حتى بعض الاحيان

    اذا جاء ضيوف فى العمل اوحتى اذا دخلت بعض الاحيان تشرب شاى

    عشان اللغة الانجليزية حاولت ان اسفر الولد الى انجلتر ورفضت سفرته الى ماليزيا

    والان الحمدالله فى الجامعة وفى كلية ممتازه والحمدالله 00

  9. نوافقك في شيئ واحد وهو الجامعات الآن مستواها أقل من ثانويات زمان حتى مستوى الفهم العام!
    ولكن الماعندو انجليزي يترزع؟؟؟ يعني كل من هو الآن داخل السودان مترزع؟!.

  10. حاجة غريبة أن الواحد يحمل ماجستير وما بعرف إنجليزي! أم أنها ماجستيرات الإنقاذ؟

    وبعدين كمان كورس المخاطبة ما بسموهوش (English communication) لأن المخاطبة هي الكنفرسيشن!

  11. الحل بس يرجعوا الانجليزى للجامعات ويواصلوا على الطريقه دى على الجايين يطلعوا مكربين
    وقبل فتره ينبهوا الطلاب انو من السنة الفلانية التدريس ح يكون بالانجليزى

  12. فعلا مين تهاني عوض دي ؟
    تهاني دي شغلت الناس فترة طويلة في الفيس .. كانت بتجيب معلومات وحاجات صعبة الحصول عليها
    فجأة اختفت عندما انكشف امرها انها جدادة الكترونية ولم تظهر مرة اخرى ..