زواج سوداناس

تهاني عوض: كلام للنساء فقط ! ممنوع دخول (أبو شنب)!


تهاني عوض

شارك الموضوع :

بروتس عمل ليهو صفحة في الفيسبوك .. واشترك في قروبات كتيرة وصفحات كتيرة 80% مواقع لا أخلاقية وفاضحة وخادشة للحياء العام .. بروتس بدأ يفتش لأصحاب وصاحبات عشان (يعمر) صفحتو.. قام رسل طلبات صداقة للبنات الحلوات الواضعات صور ممثلات أجنبيات وفنانات ، بعد كدا بروتس بدأ يعبّر عن (نفسه) وشاف أكتر حاجة ممكن تلفت الانتباه أن يلبس (عباية) الواعظ (الثعلب المكار)..وشوية شوية بروتس ، آيات قرانية ، أدعية ، مواعظ ، تطبيقات سنن ، وحكم ، ومواعظ..أها بروتس حاول يكون نشيط ويشارك في بوستات الآخرين حتى لو ما أصدقاؤه..أها قبل ما يقرأ (موضوع البوست) بروتش يشوف آخر تلاتة تعليقات ويقوم ينزل بــ (تقلو) ويكتب: اتقي الله ، يا بنت ما تنستري ..هسي أول حاجة غطي شعرك دا يا بت الناس.. بعد شوية (بروتس) رسل رسالة في الخاص : هلا بالعسل ممكن نتعرف ؟ ولأنو ما لقى رد ولقى (صد) بروتس (بقا حمش) واغتاظ وشعر بأن (رجولته) قد اهينت فأراد أن (ينتقم) مستخدما سلاح التعليقات كأسهل (سلاح متوفر) : ناس داعش عندهم حق ! قريش كان عندهم حق لما كانوا بدفنوا البنات احياء .. ومرات (بروتس) ينسخ كلام من موقع ديني ويجي (يلصقو) في محل التعليقات ويجلس (منتشياً) وكأنه قد كسب (11 نقطة) في مباراة نتيجتها 9/صفر !!
بروتس دا يا بنات مسكين و(فارة ساي) ، و(فاقد حنان وامتنان) وعندو (جفاف عاطفي) و(اسهال غزلي) ، وما ناقش أي حاجة في الحياة ولا في فن التعامل مع الآخرين ، ومخو(مليان وهمات وأوهام) ، وبفتكر إنو الفيسبوك دا بس موقع (للتعارف والحبكانيات والغزل والدردشة الليلية).. بروتس لمّا لقى (نفسو) ما حقق (الهدف) الاستراتيجي من استخدامه للفيسبوك قام شال (ورقو.. وعفشو وعدتو القديمة، وباقي وسخو) ورحل ..مشى (تويتر) بس للأسف كانت النتيجة (6/صفر)!!
اخواتي /خالاتي/ عماتي صديقاتي /زميلاتي/ صديقاتي: احذرن (بروتس) فهو (كالنعجة) دوللي له مليون نسخة ! ومليون وجه وعليكن ب(الحظر) وبس ! وكان (حظرتي وارتحتي) أوعاك تعملي بوست وتجي (تردحي) كدا ناس التحالف بتاعين( ‫‏عاصفة‬ المرجلة) بشتغلوك وبوروك (المكشن) بلا بصلة وبخلوك (تطلعي من طورك) وتجدعي (عفشك) في الصقيعة ..فأحسن ليك تحافظي على (عفشك) وصحانتك ، وأعصابك واحظري من (سكات) ولا (من شاف ولا من دري)!

تهاني عوض

شارك الموضوع :

تعليقات الفيسبوك

تعليقات


2 التعليقات

      1. 1
        ابوبكر الرفاعي

        رائعة…. ما في كلام
        ذكرت امي و هي – اطال الله عمرها – زولة شورة و راي و تقطعوا نااااشف و تقول للاعور قدامو
        هوووووي يا اعور
        لا فض فوك …
        و عليك الله يا تهاني ابري قلمك ده شوية كدة….

        الرد
      2. 2
        صريح جدا

        من خلال متابعاتي لكتابات هذه (الآنسة؟)
        يبدو لي أن لديها عقدة من جنس الرجال وذلك ربما لأسباب أسرية…

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *