زواج سوداناس

تهاني عوض: للنساء فقط ! تصوير المناسبات الخاصة ونشرها في الانترنت دي هبالة !


تهاني عوض

شارك الموضوع :

في مناسباتنا الاجتماعية (السارة) الناس بتجتمع وتفرح . الاهل والمعارف والجيران والاصدقاء وزملاء العمل .. وفي ناس بتحب تخلد (المناسبة) وتوثق ليها وتقوم (تصورها) بالموبايلات أو كاميرات الفديو .. ولحدي هنا كويس ودي حاجة جميلة كونو الناس تتقاسم وتتشارك الافراح واللحظات السعيدة لكن (الماصاح) إنك بموبايلك تصوري الناس وهم في أوضاع خاصة .. الما صاح أنك تصوري رقيص العروس أو تمارين رقيص العروس أو حنة العروس أو لحظة الفرجة على (شيلة العروس) أو لحظة تجربة فستان (الزفاف) أو نقش الحنة أو تصوري الناس وهم قاعدين بملابس (البيت) وطوالي بسرعة تنشري الصور في الفيسبوك أو تتشاركيها مع مجموعات الواتس اب أو تنزليها في اليوتيوب بدون ما تراعي لخصوصية (المناسبة) وخصوصية (القعدة)!! بأي حق تسمحي لنفسك بتصوير بنات الناس ونشر صورهم في الانترنت ؟ بأي حق تصوري الناس في قعدة خاصة وبملابس خاصة وتنشريها على الانترنت ؟ منو الاداك الحق في النشر؟ وهل استأذنتي من اصحاب المناسبة ؟! ولا بس بالنسبة ليك الموضوع (سبق صحفي) أو حاجة للفشخرة والبوبار؟! احتمال بعض الناس بيعملوا الحاجة دي بحسن نية لكن حسن النية لا يبرر الخطأ والاستمرار في الخطأ . بالطريقة دي الناس حتكون مجبورة على تنبيه الضيوف بعدم التصوير ويمكن كمان في ناس تضطر تتشدد وتمنع دخول الموبايلات لمكان المناسبة أو تشتري جهاز (كشف الموبايلات) وتعرف منو الدخل المناسبة (النسائية الخاصة) بموبايل عشان يصور .
ياريت ننتبه لحكاية التصوير بالموبايل ، ومافي داعي الناس تنشر أي حاجة صوروها ..لأنو دا انتهاك للخصوصية وتشهير بأعراض الآخرين وفيه ضرر على سمعة الناس .

تهاني عوض

شارك الموضوع :

تعليقات الفيسبوك

تعليقات


2 التعليقات

      1. 1
        محمد عبدالله

        جميل يا تهاني
        .

        الرد
      2. 2
        omar khalid

        كلامك صاح يااخت تهاني المفروض بعد انتشار اليوتيوب والفيسبوك والواتساب يمنع التصوير عن طريق الموبايل واﻻن في السعودية اي مناسبة يمنع منعا باتا حتي الدخول بالموبايل وذلك عن طريق كاشف ﻻجهزة الموبايل

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *