زواج سوداناس

قطار الشوق 1-2


شارك الموضوع :

قوم بينا يا سواق.. حرك قطار النيل
باللهفة والأشواق.. نمسك دربنا عديل
ودينا نهر النيل..
الفيها بالتحديد إنسان بسيط وجميل
أرض الحديد والنار.. مزروعة ريد ونخيل
في عطبرة التاريخ.. حافظنو جيل ورا جيل الناس جميع أحباب.. خاتين عموم الميل
بارعين في كل مجال.. ويمين جمال الشيل
***
العطبراوي شموخ.. تاريخ في صوت فنان
ردد أغاني الجيل.. بي صوت فخيم رنان
طرد الغريب والذل.. جنبنا أي هوان
وملانا خير وحماس.. ومحبة للأوطان
علمنا درس البر.. شان نرفع السودان
**
مرحب مداين النور.. والنهضة والعمران
شندي الجميلة سلام.. للمنقة فيكى جنان
وشوف دامر المجذوب والنوبة والحيران
حوش بانقا المبروك.. بقى للرئيس عنوان
والباوقة والتفاح.. وغناوي ليها زمان
أسمنت ماركة فريد.. كم علا للبنيان
والحنة نوعها عجيييب.. كم زانت النسوان
وقوم بينا يا سواق.. ودعنا أمدرمان
وركبنا قطر الشوق.. قاصدين عزاز وحنان
أهل الفهم والذوق.. والطيبة والتحنان
شان ننثر الأشعار.. ونردد الألحان
**
وبى عطبرة وناسها.. حنكحل الأجفان
عجلاتها في الطرقات.. لا جوطة لا دخان
في كلي سوق أصناف.. ونظام في أي مكان
في عطبرة الأفراح.. والبهجة.. والألوان
وفي عطبرة استقرار.. وسلام معاهو أمان
وفي عطبرة البوليس والقادة والأركان
وفي عطبرة التعبير.. الأحلى للسودان
في عطبرة التفسير.. الأغلى للسودان
تلويح:
مع خالص تحياتي لعموم أهل عطبرة بحفاوتهم وكرمهم وبشاشتهم وتذوقهم المختلف للشعر وأحلى اللحظات بينهم.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *