محمد عبد الماجد

بعد مباراة الترجي


• في السودان اي موضوع مهم عاوز تعملو بتعملو (بعد الجمعة).
• والجمعة اجازة ..ويوم قصيّر.
• والسبت اجازة ..وما بتفهم فيه اي حاجة.
• والاحد بداية اسبوع …وزحمة شديدة.
• الجمعة ساتر اساسي في الموضوع…حجر زاوية في كل مواضيعنا الاجتماعية والرسمية.
• يعني من (الاثنين) وانت ماشي لي غادي ..بتحول كل (الملفات) الى ما بعد الجمعة.
• في ناس الواحد فيهم لو عاوز يقلع ليه (ضرس) بيقلعو بعد يوم الجمعة.
• تقول عاوز يقلعو بواسطة خطيب مسجد.
• يعني في اي اسبوع …عندنا خمسة ايام بنضيعها ساكت ..ما بنعرف نعمل لينا شيء بدون ان نقول : (بعد الجمعة).
• التقول (عقد).
• الواحد يلاقيك من الصباح ..تسألو وتقول ليه متين؟ : يقول ليك يا زول ما في مشكلة ..خلينا نقول مبدئيا كدا بعد الجمعة.
• ونقول بعد الجمعة.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (بنت المنى جاد الفزع) ..قالت ليك (الرصيد) الرسلتو لي الاسبوع الفات ما وصل.
• واي مشروع مالي فيه صرف ..ان شاءالله لو عاوز تغيّر (كفر) الموبايل بتحول الامر برمته الى اول الشهر.
• من يوم 13 وانت ماشي لي غادى ..لو عاوز تسافر ..بتسافر اول الشهر.
• لو عاوز تصلح ليك حاجة في العربية ..بتصلحها اول الشهر.
• لو عاوز تجيب ليك (لمبة) للبيت ..بتجيبها اول الشهر.
• عشان كدا – نحن اي شهر عندنا فيه (17) يوم بتروح ساكت.
• قاعدين نضيّع في عمرنا ساكت ..وما جايبين خبر.
• اخطر من ذلك في البيت نفسو موضوع انك تجيب ليك (لحمة) او تجيب ليك (فرخة) او تجي شايل ليك (سمكة)… او تشتري ليك (باسطة) اتحولت كل هذه الامور (تنفيذا) الى اول الشهر.
• هذا الامر جعل ليك (اول الشهر) ..حالة من حالات المطاردة والترقب والملاحقات.
• اول الشهر ولع نار.
• عشان انت اي تصديق بتحولو الى اول الشهر.
• واي قرش بتطلعو من جيبك اول الشهر.
• لمن يجي (اول الشهر) تلقى الدنيا كلها في انتظارك من (سيد اللبن) الى (سيد البيت).
• لمن تغيّر شارع بيتكم.
• ويبقى لو في مرادك ..تجي نازل بيتكم من فوق.
• تنزل بي برشوت.
• او بواسطة قوات سلاح الطيران.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (السرة بنت شفع الزيت) قالت ليك عاوزة لي (شاحن موبايل)..شاحنها بقى كعب..خربوه الشفع.
• في تحويلات نحن بنرفعها الى ما بعد العيد.
• يعني اي زول في السودان دا عاوز يعرس بقول ليك عرسي في العيد القادم.
• البعرس والما بعرس بقول ليك العرس في العيد.
• عشان كدا في الاعياد ما بتلقى ليك (نادي فاضي).
• ولا بتلقى صيوان.
• ولا بتلقى حتى (كرسي).
• كل الناس بتعرس في العيد.
• ودي حسابيا بتخلينا نفقد في السنة على الاقل كدا عشرة شهور.
• عشرة شهور ..بتروح مننا ساكت.
• عشان نحن لو عاوزين نعرس ..بنقول العرس في العيد.
• لو عاوزين نصلح البيت ..بنصلح البيت في العيد.
• لو عاوزين نجيب لينا حاجة جديدة – بنجيبها في العيد.
• حاجاتنا الكبيرة كلها في العيد.
• وهذا ما جعل كثير من الناس يزوغوا من العيد.
• واصبح العيد ..هم اغلب الناس في السودان ..لأنهم كلهم عندهم وعود مفروض ينفذوها في العيد.
• فاكرين العيد ما بيجي.
• والعيد الزمن دا بقى يجيك بدون ما تشعر.
• فجأة كدا تلقى العيد باقي ليه (19) يوم.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (الرفيعة بنت فرح الخط) قالت ليكم ماكينة تلاجتها حرقت ..الكهربة تمشي وتجي فينا متل حملة الدفتردار الانتقامية.
• ما خلت لينا جهاز.
• يوم داك الكهربة حرقت لينا خلاطة ومكوة ولبسة ميمونة الجديدة.
• ناس المريخ هسع رفعوا كل امورهم الى ما بعد مباراة الترجي.
• اي واحد تهبشو فيهم بقول ليك بعد مباراة الترجي.
• الحاجة الباسطانا الايامات دي هي ان المريخاب انشغلوا بي نفسهم.
• وبقوا في رقبتهم.
• سيرة (الجوهرة الزرقاء) بقوا ما بجيبوها.
• شايلين هم ..وحايمين بيه – ما قادرين يقولوا اي حاجة.
• اي واحد تقول ليه حاجة ..يقول ليك بعد مباراة الترجي.
• نفسهم مرقت من الحياة.
• وبقى ما عندهم نفس للاكل.
• الواحد فيهم تشوفو تعبان كدا ..وروحو طالعة…وقت تجيب ليه سيرة الكورة زي الجبت ليه خبر وفأة.
• يسرح كدا.
• ويمشي بعيد.
• لمن تحن عليه.
• وتقعد تصبر فيه ..تقول ليه يا زول الدنيا دي اصلها كدا – ما في حاجة بتستاهل.
• اصلو ما تشيلوا هم.
• البرازيل اتغلبت سبعة.
• يعني شنو؟.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (السريرة بنت العوض) الدكتور قال ليها تاني لا تاكلي سكريات لا نشويات لا دهنيات لا نشويات ..لا تحضري مباريات المريخ.
• الايامات دي تقول للمريخابي بي كل حسن نية ..اسمع تعال افطر معاي.
• يقول ليك خليها بعد مباراة الترجي.
• تلقى ليك مريخابي واقف براهو ..وبالو بعيد ..تقول تطلعو من الحالة دي ..تقول ليه اسمع يا اخوي ..رأيك شنو نمشي بورتسودان؟.
• يقول ليك خليها ..بعد مباراة الترجي.
• عندنا واحد مريخابي صعب …النوع الما بحول الطبق داك …جابوا ليه خبر وفأة.
• صاحبكم قال الدفن بعد مباراة الترجي.
• اي حاجة بقوا يقولوا ليك بعد مباراة الترجي.
• ناس المريخ قالوا عملوا ليهم مؤتمر صحفي ودشّنوا خدمة تحويل الرصيد…واحد من المريخاب الشفوت ..الظاهر عليه من (المعارضة) رفع اصبعو.
• جمال الوالي رفعة الاصبع ما عجبتو.
• جمال الوالي ما بحب زول يرفع اصبعو.
• جمال الوالي قال ليه في شنو؟.
• المريخابي الرافع اصبعو ..قال ليهم : غايتو الترجي لو غلبكم في استادكم …الخدمة دي إلّا تحولوها الى حملة تبرع بالملابس القديمة.
• ما في زول بيحول ليكم رصيد.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (الكنينة بنت شاف الحطب) – قالت ليك يوم داك ضربت ليها (تونة) في الفطور وحضرت نشرة عشرة في التلفزيون ..حصل ليها تسمم.
• لا عرفت التسمم من (التونة)..لا عرفتو من نشرة عشرة.
• الدكاترة المشت ليهم كلها ..قالوا ليها تلفزيونكم كم بوصة؟.
• ………..
و
• بلة جابر ..بقى يركب البص ..ينزلوه منو.
• يقولوا ليه انت برة البعثة.
• عاجبك كدا يا رمضان عجب.
• البعملوا لي بلة جابر ..بيجوا ويعملوه ليك.
• عملوه قبل كدا للباشا.
• اعمل حسابك.
• وخليك مفتح.
• وخليك عارف اي حاجة.
• نحن تاني ما بنوصيك.
• تاني ما بنقول ليك كلمة.
• هلالاب الجيلي بيشجعوا الهلال والريال.
• الهلالاب ديل في اي حتة ضافرين ليك المريخاب.
• مريخاب الجيلي ..الواحد تلفونو ما قادر يرد عليه ..من الضفرة.
• ضفرة شديد.
• و
• (ونحن عايشين والحمدلله (النفس) بينزل ويطلع إلى الآن..ولا تنقصنا شيء سوى رؤياكم الغالية).
• بس خالتك (المخيخة بنت مساعد) فقدت ذاكرتها .. وبقت تشجع جزيرة الفيل بدل المريخ.
• وقرّض على كدا.


‫5 تعليقات

  1. لوعاوز تغير ديكور بيتكم يا ود عبد الماجد اخير تمشي كوستي
    قال ابطال قال طيب الديكور كيف

  2. محمد عبد الماجد كاتب ثقيل ولايفهم في اصول الصحافة شي واظنه فاقد تربوي يكتب اي كلام في اي كلام لايقدم ولايوخر سخيف في نقده وتناوله للاشياء

  3. انت الحارق دمه شنو يا المارد الاحمر مادام هو ما بيعرف يكتب انت بتقرا ليهو ليه ؟؟ امشي اقرأ لي العراب حقكم …

    1. ابو خالد الدمام اول شي اعرف انت اكتب كويس بعدين تعال علق وانت مالك قاعد يغمت ليك ولا شنوو ههههه