الفاتح جبرا

مستشفى MTN لسرطان الثدي


قال لي صديقي (ياسر) الذي يشغل منصب المدير العام لإحدى الشركات:
• يا أستاذ كتاباتك كلها عن الأشياء السلبية.. البلد دي ما فيها حاجة إيجابية تكتبوا لينا فيها؟
• قلت له: والله لو شفنا شيء إيجابي بنكتب.
• قال لي: هل تعلم أن هنالك شركة سودانية (عالمية) خرجت من عباءة المفاهيم التقليدية (للبيزنيس) المتمثلة في التوسع وجني الأرباح وتوزيعها على المساهمين، وأصبحت تشارك مشاركة فاعلة في بناء ونهضة المجتمع (السوداني)؟!
• قلت له: يعني شنووو؟ أنا بعرف شركات (كتيرة) تشارك في كثير من الأنشطة الاجتماعية.
• قال لي: معظم شركاتنا، خاصة الكبيرة منها مشغولة بتحقيق مكاسب أصحابها فقط دون أن يكون لها دور فعَّال في تنمية المجتمع أو المشاركة في قضاياه المختلفة.
• والشركة الإنتا قاصدا دي عملت شنووو يعني؟
• الشركة القاصدا دي عندها مشروع سنوي اسمو (21 يوماً لخدمة المجتمع) يبدأ في الأول من يونيو، ويستمر لحدت يوم واحد وعشرين.. في الواحد وعشرين يوم دي الموظفين كووولهم بمختلف درجاتهم الوظيفية (من المدير العام وإنتا نازل) بيطلعوا من مكاتبهم (المكيفة) عشان يخدموا المجتمع.. يعني ممكن تلاقي المدير العام طالع ليهو في سلم (بيضرب بوهية) ونائب المدير العام ماسك ليهو (مسطرينه بيبني) وواحد من رؤساء الأقسام بيعجن ليهو في (مونة) !
بيني وبينكم الكلام ده (ما وقع ليا في رأسي) فطلبت من صديقي (ياسر) أن يعطيني أمثلة لما قامت به هذه الشركة من (أعمال) فأخرج (ورقة من درج مكتبه) وقال لي (أمسك عندك):
• ساهم موظفو الشركة في أعمال تأهيل دار المايقوما للأطفال مجهولي الأبوين، وشملت أعمال الصيانة دار الأطفال فاقدي السند وتوسيع الصيدلية وإنشاء صهريج مياه وتقديم معينات عينية.
• قام الموظفون خلال (الواحد وعشرين يوم دي) بإعادة تأهيل دار العجزة (الضو حجوج) وشمل المشروع الصيانة للدار والتبرع بأجهزة حاسوب ومولد كهربائي وإقامة يوم علاجي، ودعم المسنين بالملبوسات، بجانب تنفيذ جولة ترفيهية لهم داخل العاصمة.
• قام موظفو الشركة بدعم (دار الرشاد للأطفال المشردين) إلى جانب إقامة يوم ترفيهي ليهم بمستشفى التجاني الماحي، وقدموا للمشردين ملبوسات أجهزة تلفاز بالإضافة إلى ملبوسات ومعدات رياضية ومواد الرسم.
• بادر موظفو الشركة خلال هذه المبادرة السنوية (الواحد وعشرين يوم) بتنفيذ مشروع تدريب النساء ذوات الإعاقة الحركية لمبادئ الحاسوب والانترنت، وتم تدريب عدد 90 دارسة علماً بأن المشروع يستهدف عدد 450 دارسة.
• قام ّ موظفو (الشركة) بأعمال الصيانة والترميم وإعادة تأهيل مباني مدرسة الصم والبكم بالخرطوم 2 حيث تمت صيانة المدرسة من الداخل والخارج، وصيانة مرافقها المختلفة: فصول، استراحات، المصلّى، ومكاتب الإدارة، وذلك حتى يجد تلاميذ هذه المدرسة بيئة دراسية مهيئة بإنتظارهم عند إنطلاق العام الدراسي الجديد.
أراد صديقي (ياسر) الإستطراد في سرد ما قامت به هذه الشركة لكنني قاطعته قائلاً:
• شوف يا ياسر.. جميل جداً إنو الشركات الكبيرة دي تطلع بمسؤوليتها الإجتماعية تجاه المجتمع العايشة فيهو.. وجميل جداً إنو الشركة القلتها دي تستن ليها سنة زي دي وتخصص ليها 21 يوما كل سنة عشان الموظفين بتوعنها يطلعوا من مكاتبهم ويخدموا المجتمع وده شئ تشكر عليهو.. لكن
وهنا قاطعني صديقي (ياسر) قائلاً:
• طيب وكت دي حاجه كويسه ليه ما بتكتبوا عنهم؟
• أنا شخصياً ح أكتب ليك عنهم في عمودي بس بشرط
• شرطك شنووو؟
• زي ما قلتا ليكا شئ جميل إنو الشركة دي تخصص ليها 21 يوما من كل سنة لخدمة المجتمع.. لكن أنا شايف إنو حقو الشركات الكبيرة دي بدل ما تشتت مجهوداتها في (صيانة المدارس) وتأهيل (المعاقين) وحفر (الآبار) وإجلاس (التلاميذ) والحاجات الكتيره دي تعمل لينا حاجة واحدة (ضخمة) تخلد بيها إسمها وتقعد ليها صدقة جارية على مر الزمن ويستفيد منها كل الشعب السوداني !!
• زي شنوو؟
• مثلاً (مستشفى لسرطان الثدي) !!
• والله كلامك في محلو يا أستاذ !!
• خلينا من محلو ولا ما محلو .. الشركة إسمها شنوو؟
• الشركة هي شركة (إم تي إن) MTN
• يبقى خلاس.. مستشفى MTN لسرطان الثدي !!
كسرة:
قال لي صديقي (ياسر) وأنا أغادر مكتبه: يا أستاذ والله ورطتنا معاهم جنس توريطه !
كسرة تانية:
شكراً لشركة MTN على ما تقوم به من مشروعات مقدرة تخدم المجتمع.. ونحن في إنتظار (المستشفى) وللا من بكره نعمل ليكم كسرة: أخبار مستشفى MTN لسرطان الثدي شنوووووووووووووووووو!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و+و.