غُربة.. و.. دقـــة

أصبح حلم كل شخص أن يسافر إلى أرض الفرنجة.. ممنيا النفس بالجنة.. والعيشة الهنية.. لو كانت الهجرة ساهلة كنا العميان شايل المكسر.. ومرقنا.. ومشينا هناك وخلفنا كراع فوق كراع.. وممكن ندخل خشومنا في شغلة الناس.. ونعلمهم الأدب.. الما بيعرفوهو.. وكتيرين مشو للخواجات عند أهلهم.. ودايرين يصلحوهم.. البعض يحلم بالهجرة عشان يصلح وضعو.. ويجي راجع.. يقعد وسكين الزمن تاخدو علي غفلة.. يكبر ويموت في الغربة.. وبعض عارف إنو ماشي عشان ما يجي راجع..!!!!.. ما نحن برانا.. كل شعوب العالم التالت حلمها تهرب من بلادها..!!!

من قولة تيت

باصر المعايش في البلد.. وكل شي ما جايب همو.. عرف إنو ود حلتو ربيع سافر إنجلترا ولقى خواجية وعرسها وكتبت ليهو قروشها جت والبيت والعربية واتبسط بسط شديد.. أضمر السفر لإنجلترا اشترى فيزا بخمسين مليون ادينن وسافر وفي المطار أول واحدة يلاقيها كورك لها:-

(speak English?)

“yes”

(English, English?? )

واللا نص نص؟

“.. ”

قال يستغل فترة الانبهاطة دي.. ويدخل توش في المشروع

( me you love,

بعدين,

marry

بعدين

you money, house, car me)

قال يطمئن إنو ما عندو منافس.. كلب.. أو كديسة وسألها

(you dog?)

” no. iam Catherine”

تقصد اسمها كاترين!!!

ثم سرح يسترجع حصيلتو من الإنجليزي.. كاترين دي شنو يا ربي؟

ثم حاول ان يخفف دمو.. ويوريها إنو نكتنجني.. قال وهو يضحك

.. (كاترين رُكبة؟)

كعادته عندما ينكت.. طااااااخ ضربها في كتفها

آخر مرة شوهد قاعد في عنقريب في البلد في ضل الضحى.. متمحن ويتساءل: “لا يا ربي اللوم الاتلومتو شنو؟ الخواجات ديل يرجعوني من الميطار؟”

……….

تمانية ضررة

وفي الأخبار – نيويورك: (أمريكية تزوجت من ثمانية مهاجرين بينهم مصري في نفس الوقت)

المصيبة يكونو التمانية في قسيمة واحدة..!!!

قالو عشان ياخدوا الجنسية.. لأنو أي أجنبي يتزوج أمريكية من حقو ياخد الجنسية الأمريكية..

علا قبضوها..!!!

وليداتنا البي يشابوا علي أمريكا.. ربنا إن سهل لكم.. بعدين أووووعكم تلاقيكم في المطار خواجية ترفع لكم حواجبيها وتقول لكم “هاااااااالو”.. وإنتو تتكيفوا.. والواحد فيكم نفسو تحدسو ويقول كسرتها.. أبقوا نجااااااااض.. !!!!!! مش إن رفعت حواجبيها؟ بس إن وقعت بي قفاها أوووووعك تشتغل بها.. تعرسها يظهروا لك عشرة ضرررة.. تتمحن وتطير عيونك زي الزول البايعين ليهو قطعة واطا في الخرطوم وبايعنها لي تسعة تنفار معاهو..!!!!!!

وبعدين النحدسكم.. قالو الأمريكيات ديل يومكم التشكلو تركبك كاراتيه وجودو.. تقوم من الواطا ما تفرز صلبك من وشيك..!!!!!.. ويبقى عليك يا كافي البلا سفر من وسط أهلك ودقة من مرا في الغربة؟.. وما دام أصلو دق لي دق أقعد وعرس من هنا وأخد دقتك من الدنيا وانت جنب اهلك!!!..