محمد عبد الماجد

ناس (المجموعات) ظاهرين من (طيارتهم الخاصة)


ناس (المجموعات) ظاهرين من (طيارتهم الخاصة)
هدف (مساوي) دا لو جبتوه في الترجي الحكم كان حسبو ليكم (21) قون..وكان حفلتكم مدورة لي تاني يوم
الحاجات دي حركات (تمهيدية) حركات (شفع)..الاندية الكبيرة ما بتتكلم عن (والله كنا ضاغطين)

ما بنقعد نحسبها كدا.
يخلوا الكورة ..ويقعدوا يحسبوا في الفرص الضائعة.
الجماعة ديل (مخلوعين) شديد.
بفرحو بـ (الكورنر) امام الترجي.
الجدعة عندهم زي (السماية) امام الترجي.
ووقت يجيبوا ليهم هدف (وهمي) كدا بصدقوا ..وما بنوموا.
الحاجات دي كبيرة عليهم.
ما بنقول لو ما دقت العارضة.
ولو اتقدم شوية.
ولو كمل الهجمة.
ولو ما طارت.
ولو كان.
الحاجات دي حركات (تمهيدية) حركات (شفع)..الاندية الكبيرة ما بتتكلم عن (والله كنا ضاغطين).
ضاغطين انتوا عاوزين تطلعوا ليكم (سمنة).
ولو كورة بكري المدينة جات.
اول بكري المدينة متين بجيب ليه قون؟.
بيلعب من سنة 2002 ..ما شفنا ليه قون.
بضيّع ليه 1750 كورة في المباراة.
الغريبة ناس المريخ ..خلوا (كاساتهم الجوية).
خلوا (المقصورة الطائرة).
ونحن في المريخ اخوة.
نسوا ليك جمال ابوعنجة وكمال عبدالغني زي الما حصل حاجة.
وبقوا لا بجيبوا سيرة لي رمضان عجب وراجي عبدالعاطي.
خلوا اي حاجة ومسكوا ليك في (بكري المدينة).
والله نحن ما قايلين بكري المدينة بخلعكم كدا.
املهم بقى بكري المدينة.
حلمهم بقى بكري المدينة.
حياتهم بقت بكري المدينة.
تطلعاتهم بقت بكري المدينة.
ينوموا ويصحوا على بكري المدينة.
بكري المدينة في الهلال كنا مع (جريه) دا ما قاعدين نعدو.
ولا بنحسبو.
البرير كان عاوز يشطبو.
والكاردينال قال ما بجدد ليه.
وانتوا فرحانين بيه كدا.
طايرين بيه الجو.
والله فعلا الفرق بين الهلال والمريخ فرق السما من الواطة.
الجماعة من سجلوا بكري المدينة (لولوتهم) كترت.
بقوا يقولوا ليك بعد كل مباراة والله كنا ضاغطين.
وكنا لاعبين.
والكورة دي لو كانت جات.
ولو جاء هدف تاني كنا نمنا قفا.
و…
يقعدوا يحكوا ليك (ظروفهم) كلها.
لمن يقربوا يمشوا ديوان الزكاة.
حالتكم بقت تحنن.
ح تقعدوا تصبروا في (جمهوركم) لي متين بالطريقة دي؟.
لو كملوا الهجمة.
ولو القون جاء في اول ربع ساعة.
ولو ما العراضات.
جمهوركم فتر من حركاتكم دي.
جبتوا ليه (طوحال) كروي.
المريخاب بقوا يطلعوا من المباراة ..يقولوا ليك الاولاد لعبو.
فد قون بفرحهم.
وبي ضربة جزاء ابدع الحكم في احتسابها.
اخترع ليه حاجات من رأسو.
نحن بنغلب عديل.
برة البلد.
بنجيبها حمرة عين.
ما بنشتغل بي اتخن تخين.
الحكم ينقض لينا قون صحيح 100%..
ولا بنزعل.
ولا بنقول لو.
وما كان.
ونحن.
والظروف.
والاولاد ما قصروا.
ولا بنشتغل بالموضوع في الاساس.
ينقضوا هدف (بشه).جيب (مساوي) قون.
نحن بشه مخصوص جايبنو للحاجات دي.
في مباراة الهلال والمريخ في الممتاز الموسم الماضي الحكم نقض ليه هدف لي (بشه).
نحن بنسجل..وانتوا اقعدوا انقضوا.
يا ربي (جهاد ابوجريشه) لم يحسب هدف بشه ليه؟.
كان شارب ليه حاجة غلطت عليه.
يكون فاكر (بشه) دا بيلعب في برشلونة…عشان كدا ما احتسب لينا الهدف.
يا زول ما مشكلة.
ولا قضية.
هدف ما بيناتنا.
تنفض هدف بشه ..(مساوي) بيجيب قون.
ح تعمل شنو؟.
ح تصرف كيف؟.
الحكم شافها شينة.
كان ممكن ينقض هدف مساوي ..لكن بقت ما مبلوعة بعد ان نقض هدف (بشه).
وعشان نثبت ليكم استهداف الحكم لبشه.
وعشان نوريكم النظرية.
ونثبت ليكم المعلومة.
جهاد ابوجريشة بعد ان نقض هدف بشه ..منحو (كرت اصفر).
ليه؟.
عشان شنو؟.
الكرت الاصفر اذا كان بشه متسلل ..بكون مقبول ..عشان المسافة بين صفارة التسلل والتنفيذ ..وقتها طويل.
شفتوا العلم دا كيف؟.
لكن بشه غير متسلل ..وليس هنالك حتى شبه تسلل ..الصورة التلفزيونية وضحت انطلاقة بشه.
بل ان الامر لا يحتاج حتى لصورة تلفزيونية.
الحكم نفسه لم يجد مبرر (واهي) يتعلق به ويقول بشه متسلل.
اذا نقض جهاد ابوجريشه هدف بشه عشان الكورة لامست يد بشه..وهي طبعا لم تلامسه ..يبقى ما في داعي للكرت الاصفر.
اذا اعتبرنا ان بشه لامس الكورة بيده ..الكرت الاصفر لزومو شنو؟.
لأن المدة ما بين ملامسة الكورة باليد وتنفيذها بالقدم (ثواني)..واكيد ليس في الامكان ان يتراجع بشه عن قرار التنفيذ بعد صفارة الحكم اذا منح حكم المباراة الكرت الاصفر لبشه عشان التفيذ.
شفتوا الفرق بينا وبين المريخ.
الفرق واضح.
ينقضوا لينا هدف.
ويكرتوا لينا مساوي ونزار حامد.
وناس المريخ هنا ..ضربة الجزاء تكون (برة) الاستاد ..يحسبوها ليهم.
لو في شكلة في باب الدخول يحسبوا ليهم ضربة جزاء في المنطقة.
بكري المدينة افشل ممثل في الدنيا ..لو وقع بحسبوا ليه ضربة جزاء.
هو بكري المدينة دا في الكورة ما نافع ..ح ينفع في (التمثيل).
نحن بنغلب.
بنفوز في كينشاسا.
في حضور جماهيري يقدر حسب الصورة التلفزيونية بي (20) الف مشجع.
وفي وجود حكم ظالم.
وفريق محترم بيلعب كورة.
بنفوز ونرجع بالنقاط الثلاثة.
من برة البلد.
انتوا يجيبوا ليكم طاقم تحكيم مريخي.
الحكم صديق علي صالح إلّا شوية.
وفي حضور جماهيري دفع اكثر من 600 مليون جنيه.
وترشوا الملعب.
وتقولوا ما بتتلفوزها..تغشوا الناس.
بعد دا بتفوزوا بي هدف وحيد من تمثلية مكشوفة.
آخر تمثيلية حضرتها في الراديو كانت لابراهيم حجازي قبل 14 سنة.
رجعتونا تاني للتمثيليات الاذاعية.
ضربة جزاء (تمثيلية) اذاعية.
بتفرحوا بعد دا.
طيب نحن البنجيب الانتصار من (ملعب الموت).
نعمل شنو؟.
تتخيلوا ولا بنفرح.
الموضوع عادي.
الهلال الكبير..اي فريق امامه بكون صغير.
كلهم بيصبحوا اقزام امام الهلال.
الكبير والصغيّر عندنا واحد.
نحن بنضرب من طرف.
جوة وبرة.
ما عندنا اي فرز.
ولا بنقول لو ما دقت العارضة.
والهلال كان ضاغط.
والهلال مفروض كان يغلب تلاتة.
الحركات البتقولوا فيها دي ..نحن ما عندنا.
ولا بنقول الهلال ضيّع كتير.
ولا بنقول عندنا هدف صحيح الحكم ما احتسبو لينا.
الحاجات دي كلها نحن ما بنعملها.
عارفين ليه؟.
عشان الهلال فريق كبير.
عشان الهلال فريق (محترم).
بنفوز عديل ..لا شق ولا طق.
وبنجيب الانتصار من خارج الديار.
مرة نتعادل برة.
ومرة نفوز عديل كدا.
نعمل شنو تاني اكتر من كدا؟.
في الخرطوم الحكم بينقض لينا ثلاثة اهداف.
وفي كنشاسا الحكم بنقض لينا هدف.
في امانة اكتر من كدا.
في نزاهة اكتر من دي.
انتوا عارفين الاهداف المنقوضة دي قاعد تكيفني اكتر من الاهداف المحسوبة.
على الاقل هذه الاهداف المنقوضة بتكشف الفرق بين الهلال والمريخ.
ولا بنقول الهلال كان ضغاط.
وفي هجمة ضاعت بالتهور.
ولو ما دقت.
وكان.
وعندنا كورة ضربة في القائم.
الحركات البتقولوا فيها بعد كل مباراة..وتخدروا بيها (الجمهور)..نحن ما قاعدين نعملها.
ولا بنغش لينا بيها زول.
ولا بنقول المباراة ما متلفزة ونتلفزها.
حاجاتكم كلها (غش).
حتى ضربة جزاء بكري المدينة (مغشوشة).
……..
ملحوظة : نحن لو لقينا حكامكم ديل ..بنجيب كأس العالم بدون ما نشارك فيه.

هوامش

ناس المجموعات ظاهرين.
واضحين ولا عاوزين ليهم (طيارة خاصة).
من طياراتهم الخاصة بيظهروا.
من جوهرتهم الزرقاء.
ما تقعدوا تتجرسوا لينا ساكت.
وتقولوا لينا لو جات ..ولو ما طارت ..وكنا ضاغطين.
ضاغطين..في دورة رمضانية.
الكلام البتقولوا فيه دا ..بقولوه في الدورات الرمضانية.
كلامكم دا ما بوصلكم (المجموعات).
غايتو يا الكاردينال بالغت عديل كدا ..تبني في الجوهرة الزرقاء ..وتتصدر الممتاز.
وتتأهل باذن الله لمرحلة المجموعات.
اوعك.
اوعك الكونفدرالية.
كلو ولا الكونفدرالية.
يا الكاردنيال اسمع كلامي دا.
انت خلاص بقيت زول مجموعات.
ناس (الكونفدرالية) ديل ما تشتغل بيهم.
من هسع يا الكاردينال انصرف نحو (التسجيلات).
سجّل صاح يا الكاردينال.
جيب لينا (قنبال).
اعمل ليك فريق بطولات.
بعد كدا خلاص انت وصلت المجموعات.
من اول سنة.
ما شاءالله.
وتبارك الله.
الفريق اعمدتو كلها غادرت.
وصلنا المجموعات بي ناس وليد علاءالدين واطهر الطاهر ومحمد عبدالرحمن.
ما شاءالله وتبارك الله.
يا الكاردينال بوصيك بالتسجيلات.
انت بقيت قريب من اللقب.
تسجل صاح ..بتجيب كأس الاندية الافريقية.
ناس الكونفدرالية ديل ما عاوزين منهم اكتر من (رمضان عجب).
رمضا عجب ما عشان البطولة الافريقية – اصلا هو قانونيا ما ح يلعب.
رمضان عجب للممتاز.
ناس بشه ديل بقوا ما فاضيين للمحلي.
عندهم (مجموعات).
طبعا الكلام عن المجموعات ..بخلي ليك جماعتنا ديل يتحسسوا.
بضايقوا شوية.
ونفسهم تمرق من الاقل.
نحن الانتصار البتفرحوا بيه جوة البلد ..نحن بنجيبوا من برة.
وبدون ضربة جزاء.
وبدون رش الملعب.
وبدون تمثلية.
بنجيبوا عديل كدا.
من ملعب الموت.
تاني في شنو؟.
بنجيبوا بي ناس وليد علاءالدين واطهر ومحمد عبدالرحمن.
انتوا خليكم في (بكري المدينة)
يا الكاردينال ..اللاعب الوطني مهم.
ركز في التسجيلات برضو في اللاعب الوطني.
ناس وليد الشعلة وماهر ام بدة ..ما فيهم اي كلام.
هلالك تمام.
اي حاجة مية المية.
بس سجل صاح في مايو.
موضوع التاهل لمرحلة المجموعات اتحسم في كنشاسا.
فكروا منذ الان في المجموعات بشكل علمي.
شوفوا معسكراتكم.
وتسجيلاتكم.
ورمضان عجبنا.
من الليلة رمضان عجب ..اسمو رمضان عجبنا.
ضربة في ملعب الموت في كنشاسا.
والضربة القادمة في قمة الممتاز ان شاءالله.
والبعدها في رمضان عجبنا باذن الله.
وندخل على المجموعات بعد كدا.
تاني في شنو؟.
ولا كلمة.
عندنا جوهرة زرقاء.
لازم ندخل المجموعات بكل القوة.
نجضم اي حاجة.
………..
عاجل : لو ناس المريخ انسحبوا ..افضل ليهم من (البهدلة) الممكن يتعرضوا ليها في تونس..


‫4 تعليقات

  1. اسوء مقال عن انتصار الهلال
    يا محمد خليك فى فريقك وقل ما يفيد بالتاكيد هنالك سلبيات رغم الانتصار طرحها بموضوعية مفيد
    اكثر من تناول المريخ

  2. راجل فارغ وفاقد تربوي ولايفهم في الصحافة وده السبب في تدهور الكرة الاسودانية امثال محمد عبد الماجد قال ايه صحفي انت ما بتفههههم اي شي عن الصحافه الهادفة هدفك تكتب اي كلام في اي كلام راجع نفسك
    انت مسؤول يوم القيامة عن ما تكتبه

  3. انت‏ ‏مبدع‏ ‏في‏ ‏سخريتك‏ ‏اقصد‏ ‏ساخر‏ ‏في‏ ‏ابداعك‏ ‏,,,,‏ ‏بعدين‏ ‏خلي‏ ‏الكلاب‏ ‏تنبح‏ ‏ما‏ ‏دامت‏ ‏القافلة‏ ‏تسير‏ ‏,,,,‏ ‏احيييك‏ ‏تربيع