زر زرة
كل أربعة تنفار يبقى عندهم باقي قريشات عاجباهم.. واللا ناوين ياكلو ليهم بنك.. ياخدو سلفية وبعد سنة يرفعو اديهم فوووووق.. “أها فتشونا كان تلقو عندنا شي.. أباطانا والنجم”.. . واللا دايرين يصوطو مع السايطين.. يسو شيرينغ.. وكل زول يدفع نصيبو.. ويفتحو قناة فضائية.. . رئيس مجلس الإدارة.. أعضاء مجلس الإدارة.. مدير القناة.. مدير البرامج.. مدير الزرزرة.. ودا أهم مدير تنفيذي.. البرامج شنو يا جماعة؟.. غنا.. نضم.. من برامج التدقيس والفهلوة.. برنامج نسميوهو (رمتّلة).. أو(دنعة).. زيارة لي ناس في بيتهم يكون احد اعلام المجتمع الشبه منسيين ح يفرح طبعا لاننا ازلنا الغبار عنه.. دا غايتو الله يستر ما يضبح لكم عديل كدي.. نتغدى معاهم.. ونصورهم ونتونس معاهم.. ونركب عربيتنا نجي راجعين.. أولا دي بتوفر لينا قروش ضيافة بدل ما ندردر الضيف ويجينا ويسوينا في شاي وشربات وبعدين يقول داير قروش نمشي ليهو نحن.. وتاني شي بتوفر لينا حق الغدا.. وممكن يطلع الضيف فنجري يلملم لنا باقي الغدا في اكياس ويزبل المذيع.. ويملا لينا تنك العربية بنزين.. انا اقترح البرنامج دا يكون مرتين في اليوم.. مرة ساعة الفطور ومرة ساعة الغدا.. برامج الرياضة الكورة دي زااااتا بقت كتيرة ومسيخة.. نحن نمشي ناس المصارعة مصارعة النوبة.. في الصقيعة.. نصورهم.. ونعمل حوارات مع المصارعين والمتفرجين.. هم لاقين يطلعو في قناة؟.. ونقول للحكومة دايرين دعم لانو نحن بنعمل على تعريف الشعب السوداني بثقافاتتنا المختلفة.. أو ننقل مباراة شطرنج لاتنين علل يقعدو في القيم سنة للحول.. أها نجي لاهم برنامج في القناة.. برنامج الزرزرة اقترح نسميهو “زنقة كلب في طاحونة”.. واقترح عشان المسالة يكون فيها دهشة ومصداقية نصور البرنامج في طاحونة.. طاحونة شغالة.. ومقدم البرنامج يزنق المسعول.. ويكورك بطول حسو ويسعلو سوعال نكير.. وما يخليهو يزوغ منو كلو كلو.. “السيد المسعول.. يقولون إنه لديك خمسة عمارات.. وسطاشر سيارة.. وحساب بنكي بالعملة الصعبة.. والأهم من ذلك.. الأهم من ذلك ،عندك جوز نعلات واااااااااحد.. .السوعال هو:- ماذا تقول في بتاعين الاورنيش الحايمين بدون رخص ولا رسوم ديل؟ وياكلو في حق الشعب.. اكيد سعادتك ما بتتعامل معاهم كتير لكن نريد رأيك؟”.. حقيقتن أنا نعلاتي بلاستيك.. أغسلن بالموية.. وجبغ البسن وامشي”.. أذن انت من أصحاب النعلات البلاستيك.. سوعال آخر في محور آخر.. بماذا توصي الشعب السوداني”أقول للشعب السوداني الكريم.. يا جماعة امسكو خشمكم عليكم وخلونا نعرف نشتغل وما تسمعو نضم الناس البتأمرو علي البلد.. يعني واحد مسكين عندو عمارتين حاسدنو فيهن.. شوفو برا بيحصل شنو.. المسعول عندو البلد كلها والشعب ضيوف عندو.. “ثم يبكي المسعول” وهو يتكلم يشهد الله محنني الشعب السوداني دا.. ما لاقي زول يكون ضيف عندو زي ناس برا.. وسوف نعمل جاهدين أن يكون ضيف عندنا.. ثم يبكي معاهو مقدم البرنامج.. ثم تعلن القناة الحداد لمدة أسبوع حنية علي الشعب!!
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة