زواج سوداناس

البربي المحن بي يلوليهن


شارك الموضوع :

كل وسائل الإعلام.. من قنوات فضائية.. وروادي.. وجرائد.. وانترنت.. اللسبوع الفات ما عندها نضم غير إنو في مهاجرين أفارقة راكبين مركب واللا فلوكة غرقو.. وهم ماشين على إيطاليا.. مهاجرين معاهم شفع.. ومعاهم نسوان.. تلقى أسرة كاملة قفلت بيتها ووقعت البحر ماشة أوربا وحاديها “يا غرق.. يا جيت حازما”.. كل يومين أربعمية نفر غرقو.. سبعمية نفر غرقو.. وأكلهم القرش.. السادة الأوروبيين.. ويا ناس السوق الأوربية المشتركة “غايتو جنس طرطشة ؟؟.. بي قروشكم الكتيرة دي؟ مشتركين مع بعض ومسوين لكم سوق واحد؟.. نحن كان كدي هنا قاتلانا رجالة فرد زول وااااااحد يسوي ليهو أسواق”!! بي عافيتكم!! علا عاينو جاي أنا عندي مبادرة بخصوص أزمة المهاجرين القاعدين يغرقو كل يوم جنايز تمرقو فيها من البحر.. وأحرجوكم.. ومحنوكم.. إن بقى عندكم مؤتمر بالخصوص دا أدرسو المبادرة دي سمح.. إن بقيتو دايرني أجيكم أشرحها ليكم بجي واقعد معاكم لمن تنفذوها تب.. وأولك بالتبادي مافي زول بيدور الغربة ويدور يخلي أهلو إلا يضايق تب وتغلبو المعايش.. انتو عارفين نحن الأفارقة ديل الجايبنا ليكم المعايش.. والمعايش في بلودنا بقت قاسية وصعبة واضايقنا تب.. “نضمن بيني وبينكم انتو السبب في الفيهو نحن دا” والبربي المحن بي يلوليهن “أها لولو”.. وبالواضح كدي ما جايبنا ليكم كواسة ديمقراطية ولا شيء ما تسمعو النضم دا.. ديمقراطية شنو؟ انتو زااااااتكم ديمقراطية ما عندكم.. كل بلد فيها حزبين يتبادلو في الحكم.. كل مرة يحكم واحد.. والديمقراطية العندنا عندكم مافي..نحن حسي عندنا فوق التمانين حزب.. كل أربعة تنفار سو حزب.. وإن ما حكمو.. يقلعوها حمرة عين.. ويكضبو علينا ويقولو لينا “وطني ولا ملي بطني” نحن نصدق ونجوع ويملو بطونهم هم.. مع إنو ممكن يكون وطني وملي بطني مالو؟.. لكن دايرين يشبعو هم ونجوع نحن ونحرس ليهم الوطن.. أمانة في ذمتكم دي “باقي انتو ذمتكم ماها غريقة” أبدا من الله خلقكم، سمعتو ليكم بي زول جيعان حرس ليهو شي؟ لكن برضو بي عافيتكم! المهم جايبانا ليكم معايش.. عليه اقترح عليكم.. بدل الهيصة البقيتو فيها دي.. غراق وإحراج.. وكواسة جنايز.. وناس يمرقو ويملو ليكم بلدكم بشرية ويضايقوكم في المواصلات، وفي الرقاد وفي اللكل والشراب، وفي المشي في شارع الله دا يضايقوكم، وبعدين الأفارقة ديل ما تشوفهم كدي، فيهم ناس العرقي دا شوفتوهو يضايقوكم فيهو من العصر يعدم اسم النقيطة ودا غير يخربو طبعكم.. ترسلو لينا حقنا ونحن قاعدين عند أهلنا.. كل زول تربطو ليهو ماهية.. تمسكوّها ليهو في بطن ايدو.. تاني زول بي يحوم عليكم مافي.. وإن شفتو ليكم أضان زرقا حايمة عندكم لوموني.. علا عندي ليكم شرط أوعكم تدوهن حكومة من حكوماتنا، بياكلونا.. ويسوها لينا وليكم كلها كسور وبواقي.. وهم زاتهم اربطو ليهم مواهي عشان باكر ما يسوني في نضم ولوم ويقولو فرزتهم!! أها تاني النحدسكم.. مواهينا تجينا كل أول شهر.. آخر يوم، يوم خمسة.. وأوعكم تتلومو وتاخروها.. يومكم التاخروها يانا الجاينكم العميان شايل المكسر!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *