زواج سوداناس

لسان الحال غلب


شارك الموضوع :

> من أروع أغاني الطنبور، أغنية لسان الحال
> الإبداع فيها من أول حرف اتكتب في القصيدة لي آخر صفقة مصاحبة لإيقاع الدليب في الأغنية
> وحتي الدهشة في عيون المستمعين كانت رائعة
> أغنية توضح فعلاً لسان الحال
> التحية لكل من ساهم في ذلك الإبداع
> المهم
> أغنية لسان الحال، هي الأنسب لوصف المريخ في هذه الايام
> فاصرار جمال على الاستقالة في هذا التوقيت بعد رفع السقف مشكلة كبيرة
> سقف الصرف والمرتبات، بل وسقف طموحات الجماهير
> وهنا تحضرني أبيات من الاغنية
> والله ما بنكر جميلك برضو لينا ثناك وجب
> موكب هداياك ما انقطع كان سترة في الزمن الصعب
> لابسين وماكلين والنعيم كايلنا في يوم ما نضب
> وعايشين معيشة المترفين طولنا والطبع اتخرب
> ايها الناس
> من حق جمال أن يترجل
> ومن حقه علينا أن نحترم رغبته
> ولكن أليس من حقنا عليه أن يحترم رغبة المريخ ؟؟؟
> رغبة المريخ ليست في الاستمرار
> بل في الاستقرار
> والتوقيت للاسف لم يراعِ فيه الاخ جمال لرغبة المريخ
> على الاقل كنا نتوقع ارجاء الامر الى ما بعد التكميلية
> او تقديم الاستقالة مصحوباً بالدعم الذي يسير الامور بالنادي الي حين اختيار مجلس ادارة بصورة مريحة
> الي حنين وضع الخطط اللازمة لا نزال السقف في الصرف
> فجمال باستقالته المفاجئة يجعلنا نشبه الامر بي زول جاب سلم وطلعنا بيهو للطابق المية
> بعد وصلنا الطابق المية
> شال سلمو وفات
> خلانا فوق
> لاسلم ينزلنا
> ولا سلم للثريات يوصلنا
> ولكن هل بقاء المريخ في استمرار جمال ؟؟؟؟
> بالطبع لا والف لا
> فحياة المريخ لا ترتبط ببقاء شخص
> وإن كانت كذلك، فليمت المريخ
> ايها الناس
> نحنا في الطابق المية
> وسيد السلم شالو وفات
> اما نموت في طابقنا المية مكتوفي الايدي
> وإما نربط عممنا ببعضها وننزل بيها في واطات الله دي
> ونشيد سلم خرصاني يوصلنا من جديد للثريات
> سلم يكون مافي زول بقدر يشيلو ويمشي
> بالتأكيد الافضل نربط العمم
> لنبدأ من الارض الثابتة
> ايها الناس
> اعني ان نفرض على انفسنا دعماً يسير نادينا بثبات
> ومن بعده نعمل استثمارات للنادي تكفيه شر شيلة السلم والناس فوق
> يبقى نفعل وبشدة ونصر على مشروع الدعم 2870
> قبل كل شيء لنثبت للعالم إن جمهور المريخ يدعم ويقتطع من لحمه لصالح ناديه
> وان التربية الجماهيرية في المريخ لا تقوم على جابوا لينا ودفعوا لينا
> بل تقوم على مشاركتنا جميعاً في تسيير امور نادينا مادياً
> ايها الناس
> صدقوني السبب الاساسي للاستقالات
> هو الصرف المرهق
> بالذات بعد ارتفاع سعر الصرف الدولاري
> بقت المسأله شبه مستحيلة
> تراوري مثلاً راتبه عشرة آلاف دولار شهرياً
> ليه ؟؟؟؟؟
> وعشان شنو ؟؟؟؟
> ده ما مهم
> المهم موش كان ممكن يجي محترف افضل منه بألفين ويتسوق ويعود علينا بالفائدة؟؟؟
> اخطاء كثيرة صاحبت الحقبة الماضية
> تحتاج لاصلاح فوري واصلاح تدريجي
> رفعت السقف تلك الاخطاء
> واصبحت سبباً في الاستقالات
> اي عمل تصحبه سلبيات
> لانلوم جمال، بل نقدر ما قدمه
> وان اخطأ في اشياء
> فقد اصاب في اخري
> وقدم الكثير
> لكن فتر
> الدولار غالي ولا شخص يدعم
> عشان كده قبل اطناشر سنة كنا بنقول ليك الاستثمار يا جمال
> ولسه بننادي
> الاستثمار يا الجايينا بعد جمال
> الاستثمار عشان مافي زول يشيل السلم ويمشي
> يخلينا لافي السما ولا في الواطاه
> ايها الناس
> المريخ يمر بمنعطف خطير جداً
> الحاج عيان
> ولما نقول الحاج عيان
> كل الابناء بخلوا اي شيء وبجوا
> من امريكا من كندا من السعوديه من الامارات من قطر
> اي زول فيهم بقول ابوي عيان وبجي سريع
> الحاج عيان يا مريخاب الخارج
> سوف يخصص حساب بالعملة الصعبة
> لمساهمات مريخاب الخارج
> رافد لمشروع 2870
> نربط عممنا ونوحد هممنا ونبني سلمنا
> عشان لما نطلع درجة ما ننزل منها تاني
> نشوف البعدها
> الاستثمار يا ناس
> وهل يوجد استثمار انجح من الاستثمار في جماهير المريخ الشرسة ؟؟؟؟
> ايها الناس
> لسان الحال غلب
> لازم نقولها واضحة
> لسان الحال غلب شديد
> وكأن النجمة شايلة طنبورها وتغني
> الكاتمة في جواي كتير متملك الجوف والعصب
> ما كت دايرة اقولو ليك لكن لسان الحال غلب
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> بقت خلاص ما بتتقعد لينا
> وتذكرة سفر بالدين مافي زول بدينا
> وقعدتنا كمان بتحطم امانينا
> السنين بتمر
> وفي محلنا يا والينا
> كأننا لا اشتغلنا ولا درسنا ولا قرينا
> ولا بنينا
> مستأجرين يا والينا
> نبني كيف والضرائب طايحة فينا
> والدمغات نشفت ريقنا علينا
> نشيل ونبل ونلصق يا والينا
> ريقنا نشف علينا
> تاني كان عملتو دمغة وفرضتوها علينا
> الا تبلوها لينا
سلك كهربا
ننساك كيف ولساننا بقي مدلدل بره خشومنا ما بتكلم بس جاهز للدمغات
والي لقاء
سلك

شارك الموضوع :

تعليقات الفيسبوك

تعليقات


2 التعليقات

      1. 1
        rashid

        ســـــــــــــــــــــــــــــــــــلـــــــــــــك جــــــــــــــــــــــــــــــــــــــــــــــــــــــــــــــــنــــــــــــــــــــــــــــــــــــــو

        الرد
      2. 2
        حلم الماضي

        وحقيقه لسان الحال غلب

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *