سواطة مع السايطين

كان للرئيس عبود قريب ليهو راقد في مستشفى الخرتوم الحكومي.. عيان.. واحد ضيف قاعد مع عبود في بيت عبود وكانت الساعة حداشر بالليل.. قال الضيف لعبود “يا عبود ما نمشي نزور فلان دا في المستشفى؟” عبود عاين لي ساعتو وقال ليهو “الساعة حسي حداشر.. باقي لك بي يخلونا ندخل؟”.. قال النضم دا وهو رئيس لجمهورية السودان وخايف ما يخلوهو يدخل.. البيخليهو يدخل منو؟؟.. غفير المستشفى.. عبود ما خائف من الغفير.. لكن خايف من القانون خايف من اختراق النظام المفروض يكون هو حاميهو ومسئول منو.. ممكن يمشي ويدخل تووووووش.. والغفير إن نضم باكر يلقى نفسو وسط وليداتو يتلفت وكايس لي شغل جديد.. دا كان مشى لي وليداتو.. في حين إنو ممكن عسيكري أخو بنات ببطاقة يدخل المستشفى في أي وقت وممكن يدخل أوضة العمليات.. يقولو ليهو ما تدخل انت ما معقّم وممكن تكون شايل بكتريا وتسبب في مشكلة للمريض يزعل ويتحرّق ويقول لهم “انتو أكنكم بتتهمو رجل قانون انو خامي ليهو بكتريا وماشي؟ يعني المعنى انا مبكتِّر؟.. والله من عويناتكم ديل، عرفتها عوينات معارضة.. اصبرو لي سااااااكت إن ما حدثت عبود”. ويقيف ويدخِّل خشمو في العملية.. وتشيلو هاشمية العزة بالسلطة ويقول للدكتور اديني المشرط دا جاي نشرط بطن الزول دا، انت شن عرفك بي شريَّط البطون؟ تشرط فيها براحة براحة كدي.. البطن بي يشرطوها كررررررر كدي دا.. آآآآآ الحنكوش”.. ويحمّر للدكتور وللسساتر.. وللعيان وللمرافقين.. ولي أي زول يلاقيهو وما يعجبو شكلو.. ولو زول نضم طوالي تسمع “انت بتعترض رجل أمن في أثناء أداء عملو؟.. آآآآآ المطرطش؟”.. حماية القانون مسئولية كبيرة.. وانها لكبيرة إلا على الذين يفهمونها تماماً.. لو لم يحترم رجل القانون القانون.. باقي الناس عندهم العذر يسوطو ويجوطو زي ما دايرين.. وينفرط عقد الأمن والأمان.. والقوي ياكل الضعيف.. وتسود شريعة الغاب” يا قول المثقفين”.. رجل القانون يجب أن يكون في صحة نفسية جيدة قبل الصحة الجسدية يتم الفحص عليه نفسيا بصورة دورية مهما كانت وظيفته.. أن لا يكون مصابا بمرض البوبار أو الفلهمة أو الفشخرة أو الغرور الضار أو صغرة النفس.. رحم الله عبود.. ورحم الله كل موتنا وموتى المسلمين.. قامت ثورة اكتوبر ضد عبود.. ضد رجل هذه واحدة من حكاياته.. ثورة اكتوبر أسست للفوضى السياسية.. ومن يومها ما قلنا أحي يا العافية.. فكان الفساد يتنفض ضد فساد ليحل محله.. واحسب الذين ينادون بمحاربة الفساد.. ليس كرهاً في الفساد.. ولكن عشان ما لاقين فرقة فيهو.. حسادة لمن تملكو ناصية الفساد وما ضايروهم معاهم.. فكانت شعارات الهمهمة “البي ياكل براهو بيخنّق”.. وشعارات الكواريك “يا ناس هووووووووي.. عووووك.. اكلو توركم وادو زولكم”!!