فنانين (عطالة) ساكت.!

*السودان هو البلد الوحيد في العالم الذى تتغلب فيه (الكثافة الفنية) على (الكثافة السكانية).!
*كل عشرة فنانين قصاد (مستمع واحد).!
*معقولة بس..؟
*هسي ياجماعة ما(عصرتو) على المستمع دا..؟
*الظريف في الموضوع واحد يقول ليك: (والله نسبة ارتفاع عدد الفنانين في اي دولة هو دليل عافية ثقافية).!
*ياعمي روح…قال (عافية) قال.!
*هو (عافية) ست الاسم ذاااااااتا اعتزلت وخلت الغناء.!
*مرة مشيت حفلة…قعدت في اول (طربيزة) لاقتني…لقيت فيها سبعة شباب (زي الورد)…بديت اتعرف عليهم…اتخيلوا لقيتهم كلهم فنانين وجايين (يجاملوا) العريس..!
*معقولة (طربيزة كااااملة) كلها فنانين..؟
*والله طربيزة الـ(….) مافيها الكمية دي من الفنانين.!
*هوي…انا قاصد (طربيزة البلياردو) عشان ماتسرحوا بعيد وتجيبوا لينا مصيبة ساكت.
*قال (بلياردو) قال…!
*زمان ياجماعة…الحلة كلها كان بيكون فيها فنان وااااحد بس…ولما تجي مناسبة الحلة كلها بتمشي تحنس الفنان دا عشان يجي يغني ليها في الحفلة…وطبعاً الفنان كان بيتعزز ويرفض يغني لحدي مالساعة تبقى 10…بعدين بيوافق…ولما يلبس الساعة 11 بتكون جات…ولما يطلع المسرح الساعة بتكون عملت 12…وبالرغم من كل دا (الحلة) كلها كانت بتشكر فيهو عشان جاء وغنى في الحفلة.
*هسي الآية اتقلبت…وبقوا الفنانين يحنسوا ناس (الحلة) عشان يخلوهم (يجاملوا).!
*بالله دا كلام دا…؟؟

باص بيني:
*البلد لما يكتروا فيها (الفنانين) مامعناها انو البلد دي (مثقفة) ولا معناها انو (الموهبة) فيها فايتة الحد…بالواضح كدا اي بلد لما يكتروا الفنانين فيها طوالي اعرف انو في مشكلة بتاعت (عطالة) حاصلة…و(دا المطلوب اثباته).!

باص قون:
فرق كبير جداً بين الفنان (العاطل)…والفنان (الموهوب).!