زواج سوداناس

فائدة ما لا فائدة منه


شارك الموضوع :

البني آدم.. ربنا خلقو.. هابش وهاباش وهباش.. ما بيقعد ساكت.. يلخبط ويجوط.. ركب الصواريخ والمركبات ووصل الفضاء.. والقمر والكواكب.. الرواد البسافرو ديل.. دايرين أكل وشراب دايرين زوادة.. اللكل حلو مشكلتو بي كبسولات.. كباسين.. بقت مشكلة الموية.. يجيبوها من وين.. وما بتبقى كباسين.. فكّر المهندسين والعلماء في الاستفادة من البول.. بول الرواد.. وخلق دورة مياة.. يعني البول يشيلوهو ويكرروهو.. ويينقوهو يحولوهو لموية.. والرواد يشربو وتاني البول يتكرر.. ويقعد كدي لي ديمة.. وطول ما هم قاعدين في خلا الفضاء.. مش الشراب وبس؟.. حتى التبيخ لي قدام ح يستفيدو من الماء البولي.. في التبيخ.. وقالت ناسا (وكالة الفضاء الأمريكية) إن مجموعة كبيرة من الباحثين تعكف على محاولة تطبيق الفكرة والاستفادة الفائدة القصوى من البول.. البول الكعب دا اصبحت تكون عندو فوائد جمة.. لقد اخترع أحد العلماء طريقة لملء بطارية الموبايل بتوليد طاقة من البول.. ويملو بيها بطارية الموبايل.. أو أي بطارية تانية.. الشغلة دي كلها عشان يسهلو للناس الحياة.. يعني لو انت في الخلا وبطارية موبايلك نزلت.. تسوي شنو؟؟.. أقرب شدرة وتتوكل وتشحن البطارية.. وهاك يا ونسة وهاك يا قرقراب.. مش شاحن البطارية من عرق جبينك؟.. عند سؤال العالم بتاع كهربة البول دا.فهمك شنو؟ قال دي احسن طريقة للحفاظ علي بئية نضيفة.. والعالم كلو بقى ملوّث.. وفي ثورة الخلايا الجذعية.. والخلايا الجذعية هي خلايا تكون أساساً لأي خلية في الجسم.. يعني ممكن تكون أساساً لخلايا العضلات، أساساً لخلايا القلب، أساساً لخلايا الأعصاب.. وبدأ في الآونة الأخيرة التركيز عليها شديد.. والأمل فيها كبير لعلاج كتير من المشاكل الصحية للإنسان.. والتركيز على خلايا الجنين الجذعية لأنها الأكثر فائدة.. ودي طبعا مشكلة تانية أخلاقية ودينية.. حتى أنهم فكرو يلفو ويدورو ويستنسخو من زول جنين ويشيلو منو الخلايا الجذعية.. دا موضوع طويل عريض!!!

قالت هئية الإذاعة البريطانية (البي. بي .سي.. عشان مافي زول يغالط) قالت :- “استطاع باحثون صينيون تصنيع خلايا أسنان بشرية من خلايا جذعية من البول البشري”، يعني يسووا سنون للناس من البول..

لما كنا أطفال الواحد لما سن اللبن منو تتكسر يشيلها ويقابل بيها الشمش ويكورك “يا عين الشمش اديتك سن الحمار.. وأديني سن الغزال” وكانت دائما ما تمقبلنا عين الشمش وتشيل سن الغزال وتدينا سن الحمار.. حسي اخير كل شافع يقول داير سن الحمار في بكانا.. الظروف ما معروفة.. والخوف واحد من ناسانا التريانيين ديل يسافر من هنا للخارج يغير سنونو.. ويقع فوق سنون البول دي.. ويجي راجع يتبسّم ساااااااااكت في وشياة خلق الله.. والغريبة لو كان النوع البينضم ويرشرش بالبصاق.. دا تكون الونسة معاهو من نواقض الوضوء!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *