جناي.. البريدو
صوفيا فيرغارا.. ممثلة ومذيعة وعارضة أزياء كولمبية.. لكنها تعتبر من مشاهير العالم.. ودائما الميديا (صحف- مجلات- قنوات فضائية – مواقع إنترنت – ونسة دكاكين) تهتم بأخبارها زيها زي باقي المشاهير.. تعتبرها وسائل الإعلام من أجمل الجميلات.. أنا شخصيا لا أرى فيها غير مرا معصعصة ومالية وشيها مكياج ورافعة حواجبيها في آخر ركن من جبهتا.. وخامة الجماعة.. عمرها اتنين واربعين سنة.. ولي حسي بيعتبروها سمحة ونجمة.. ويتابعوا أخبارها صغيرها وكبيرها..
آخر خبر:
(صراع بين الممثلة صوفيا فيرغارا وصديقها السابق على أجنة مجمدة).. هي وصديقها السابق رجل الأعمال نيك نوب.. لما كانوا كويسين مع بعض وسمن علي عسل جمدوهن وختوهن لليوم اللسود.. أو لمن صوفيا تشوف برامجها كيف ومتين تكون فاضية عشان تحمل أو قلبها يقول لها أحملي.. كتبوا عقد مع بعض إنو الأجنة دي حقتهم النص بالنص وأي واحد فيهم داير يتصرف فيهن لازم بي موافقة التاني.. أها قاموا اتشكلوا وقعدوا يتالووا في الأجنة دي.. وقالت ما بديهن ليهو هو طبعا مفكر يشيلن وتحمل بهن مرا تانية غير صوفيا.. وحسي باقين في محاكم ومحامي يقوم ومحامي يقعد..
في نسوان في الهند دا أكل عيشن.. (تأجير الأرحام) يأجرن أرحامن زيهن وزي أي شقة مفروشة.. الحساب بالأسبوع مقدم.. أي تأخير في الإيجار ياهو الجنين الانطرد!!!!؟؟ قروش الإيجار برا من قروش مستلزمات الأم البديلة علي الأبويين الأصليين من متابعة دكتور وغذاء صحي وهدوم حمل.. وبعدين الولادة وآلام المخاض حسابها براهو برضو.. في النهاية بتطلعلها بخسمطاشر عشرين ألف دولار حلوين.. يحملن جنيات الناس ويلدنهم وديك يشيلوهن ويمشوا.. المصيبة إنو في ناس زاغوا بقروش الإيجار(إيجار الرحم).. عشان المأجرة داقسة ومن الأول ما نجضّت الشغلة!!!. وفي ناس بعد المأجرة ولدت اتشاكلوا وحردوا الجنا ليها وفاتوا.. وهي مسكينة يكون عندها غيرو ستة حقنها براها.. سلمتو الحكومة الهندية ودي سلمتو سفارة الدولة المنها الأبوين.. وكل شي ولا حق الناس!!!
(تجميد الأجنة هو ركن أساسى وهام لعلاجات الحمل المساعد فى كافة مراكز أطفال الأنابيب. إن العديد من عيادات التخصيب خارج الرحم في جميع أنحاء العالم الآن قادرة على تجميد احتياطي أجنة جاهزة للنقل في وقت لاحق)..
توجد بنوك لأجنة مجمدة في دول كثيرة حول العالم.
يمكن تجميد الأجنة لمدة خمسطاشر سنة
يعني ممكن يكون الجنين ندداهو في تاني ثانوي وهو لي حسي ما ولدوهو..
وممكن أمو تلداهو ويكون راجلها طلقها قبل خمس سنوات.. أو مات قبل عشر سنوات.. وممكن أمو وأبوهو يكونوا ماتوا قبل عشر سنوات وهو يا دوب ولدوهو من مرا تانية طبعا!!.. ويكبر ويسعل: “أمي وأبوي وين؟” يقولو ليهو “أمك وأبوك ماتوا في حادث زماااااااان قبال يلدوك بعشرة سنين”.. ثم يسرح ويمرق يصنقر في عتبة خشم الباب ويرعى في غنم إبليس.. وممكن يرعى معاهن إبليس شخصيا!!!
أريت ربي يجننكم يا الخواجات!!!!.. غايتو صواطة ما معروف حدها وين؟!!!
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة