د/ عادل الصادق المكي

هبشك الما ضراك


لاحظت عند أطفالي وهم في سن الطفولة المبكرة .. اهتماهم بمشاهدة التلفزيون بصورة عامة.. واهتمامهم وتركيزهم على الإعلانات بصورة خاصة وخاصة الإعلانات الفيها أطفال كوسيلة وأداة إعلانية أو رسومات كرتونية أو حيوانات اليفة كديسة خصوصا وفار.. التلفزيون بصورة عامة كلنا مهتمين بيهو.. وكلنا نجي نحقص جنبو ونبحلق فيهو.. في المسلسلات العربية والأجنبية.. وأصحاب هذه المسلسلات يمررو لينا أشياء عاوزين يمرروها لينا.. ونحن نعتبرها بدون ما نشعر ولانحس انها دي الحياة كدا.. السلوك يمر في داخلك زي الدرب نقطة نقطة.. لحدي ما ينتهي المسلسل تلقى نفسك اتمليت سلوك لمن دفقت.. وبعد مرات حتى ضحكتك وطريقة مشيك وطريقة نضمك تتغير.. ونظرتك للبيئة حقتك تتغير.. وتتماشى مع ما دخلك من المسلسل.. أذكر في دولة عربية انني تعرضت لحادث مروري بسيط كنت أنا المخطئ بنسبة خمسة وسبعين في المية.. ومشينا المرور ولقينا ضابط يجثم علي كتفيه صقر ذهبي.. استقبلنا بصورة صارمة جدا.. وتكشيرة خلتني أشك في أني ما جيت إدارة المرور أني جيت إدارة المخدرات. ثم كفكف ايدين القميص.. وبدأ محاضرة عن القانون.. وقوانين البلد النحن فيها وبين كل جملة والتانية يقول لي ” يا غريب كن اديب” ووضح لي ان البلد النحن فيها لا تتهاون مع المجرمين ولا تسمح لاي كان بتقويض النظام وتهديد امن وسلامة المواطنين والشرطة صاااااااااحية لامثالك.. وكل جرمي اني في حادث مروري غير مقصود كسرت لمبات خطرات لسيارة أحدهم.. ولما انتهى وعاوز أتكلم وأوضح ليهو عاين لي بطريقة أبطال المسلسلات المصرية وقال لي “الكلام دا تقولو في النيابة”!!!.. وعندما سالت عنه ذكرو لي أن جنابو مدمن مسلسلات مصرية.. وربك ستر ما قام وعلقك في المروحة.. بالرغم من أنك معترف يكون عاوزك تعترف وانت مدلدل تحت المروحة!! وممكن تعترف بكل خطرات العربات المكسرة في البلاد، طول سنوات القرن العشرين.. لاشك أن كل فرد منا يتأثر بالميديا مهما عمل فيها صاحي ومفتح وما عاوز يتأثر.. والإعلانات خطرة على الأطفال نسبة لتكرارها.. تعلمهم سلوك كعب.. في دراسة عن تأثير الإعلانات على الأطفال وجد أن الأطفال بيتعلمو الطمع والشره والإلحاح في طلب الأشياء وخصوصا المعلن عنها.. والتقليد “شفت إعلان لصابون غسيل فيهو شافع بي يجلبط نفسو بزبادي عشان امو تقول ليهو مافي مشكلة طالما الصابون الفلاني موجود.. أي شافع ح يعتبر الجلبطة بالزبادي شي مفرح للأم ويسويهو”.. وبعض الأطفال يطلبو أشياء بس لأنهم شافوها في الإعلان زي صابون غسيل مثلا.. بعض الشركات لقت إنو الشفع بطلبو صابون غسيل بقو يختو مع كل عبوة دمية (لعبة).. منعت معظم الدول في العالم زي السويد والنرويج وفرنسا وانكلترا والمكسيك.. منعت بث الإعلانات أثناء تقديم برامج الأطفال.. حماية للأطفال!! يا ريت قبل ما نعرض أي إعلان نفكر في تأثيرو السلبي علي المتلقي.. شافع أو زول كبير!! ما يكون تسويق لمنتج ومعاهو تسويق لسلوك كعب.. نشتري المنتج ونخسر حاجات أهم!


تعليق واحد

  1. الشفع ما مشكله … المشكله في الناس الكبار ذاتهم … والشفع بقلدو اهاليهم … والاهالى في الاخر يجو يعملو فيها رايحين وتلقى الواحد فيهم يستغرب .. الشافع ده جاب الكلام ده من وين ؟؟؟ الاهل نفسهم عايزين تربيه .. حتى بعد كده ممكن يربو