رمضان عجب زي (الرصيد) الما بنزل سجلوه قبل وبعد المباراة

× الاتحاد العام فتح أبوابه قبل التسجيلات وسجل ليهم رمضان عجب قبل الميعاد…يعني رمضان (جنى سبعة)

× تقعد تسمع في (تائه الخصل) لمن تضحك لي غادي…وتمشي بدون مناسبة كدا تقيف في الحوش

× قروش تحويل الرصيد كلها أدوها (رمضان عجب)..أنت يا أمير كمال إلّا يسجلوك بـ (شكر اللـه سعيكم)

× اللاعب في المريخ بقوا يسجلوه مرتين ما فاضل ليهم إلّا يسجلوه في عمادة الطلاب أو في الشهر العقاري

× رمضان عجب السنة دي بقى زي (الاسكراتش).

× زي الرصيد الما بنزل.

× تنزلو مرتين.

× سجلوه مرتين.

× تنزل الرقم ..يقولوا ليك الشبكة كعبة.

× تطلع تقيف بره ..عشان تنزل الرصيد وترجع تاني.

× يعني مرات الرصيد ما بنزل ليك إلّا بعد سبع محاولات – لمن تشك في (الرقم السري).

× وتقعد تنفخ في (الاسكراتش).

× يتخيل ليك أنك لو نفخت الكرت ورفعتو فوق شوية – الرصيد بنزل ليك في تلفونك.

× وتخج التلفون.

× في كروت شحن تغيّظ ..التمانية لا تعرفها تمانية لا ستة.

× التلاتة تبقى ليك زي الخمسة.

× تشك في رقمك.

× رمضان عجب – السنة دي عمل نفس العملية.

× من مليار ونص ..وصلهم ليك اتنين مليار ونص وتلاتة مواسم فقط.

× قروش تحويل الرصيد كلها أدوها (رمضان عجب).

× أنت يا أمير كمال إلّا يسجلوك بـ (شكر اللـه سعيكم).

× أو يعملوا ليك حملة جديدة.

× احتمال.

× في احتمالات تانية.

× برضو.

× شبه تاني.

× رمضان عجب السنة دي بقى ليك زي (شريط الكاسيت).

× تشغلو بي صفحة.

× ترجع تنفخو ..وتقلبو على الصفحة التانية.

× زمان كانت في ثقافة (شرايط كاسيت).

× يعني لمن تلقى ليك شريط كاسيت لي (حمد الريح) ما بتنوم الليلة ديك.

× تقعد تسمع في (تائه الخصل) لمن تضحك لي غادي.

× وتمشي بدون مناسبة كدا تقيف في الحوش.

× تكون فرحان..في منتهى السعادة.

× حاجة بسيطة كانت بتفرح الناس وتسعدهم.

× رمضان عجب السنة دي زي (شريط الكاسيت).

× شريط كاسيت تماماً.

× تشغلو بي صفحة.

× وترجع تقلبو وتشغلو بالصفحة التانية.

× تقلب الشريط ..(دي صعبة كمان).

× ومرات كمان تجر الشريط.

× صبر مافي.

× رمضان عجب دا جابوه لينا قبل مباراة القمة وسجلوه أو عملوا معاه (اقرار).

× صينية خبيز هو.

× يجيبوه ويرجعوه.

× واتصوروا معاه.

× وقالوا خلاص موضوع رمضان عجب انتهى.

× خلص.

× الاتحاد العام لكورة القدم السوداني فتح ليهم أبواب الاتحاد العام قبل (التسجيلات).

× جماعتكم قالوا التسجيلات لو فتحت ..رمضان عجب دا ما مضمون.

× أحسن نخلص على الموضوع من بدري.

× سجلوه قبل الميعاد.

× يعني رمضان (جنى سبعة).

× جابوه وسجلوه قبل المباراة ..وقبل التسجيلات.

× وجابوه سجلوه تاني بعد المباراة ..بعد التسجيلات.

× يعني قبل وبعد.

× في (خلعة) اكتر من كدا.

× دي عدم ثقة غريبة.

× خلعة مبالغ فيها.

× المضحك أن المريخاب عبر إعلامهم القاعد ساي ..بعد ما وقعوا اقرارات مع رمضان عجب في حضور أسامة عطا المنان ..قبل مباراة القمة قالوا إن الهلال حاول يخطف رمضان عجب بعد مباراة القمة.

× نخطف ليه شنو؟.

× نحن في فيلم هندي.

× حركات الأفلام الهندية ما تعملوها لينا هنا.

× وقالوا إن اللاعب تعرض لمطاردات.

× نطارد ليه شنو؟.

× انتوا قايلين نفسكم في فيلم أجنبي؟.

× زول عملوا معاه اقرار ووقع ليكم …المطاردة في شنو؟.

× ودفعتوا فيه اتنين مليار ونص.

× رصيدكم انتهى.

× وحيلكم اتقطع.

× الجماعة ما عندهم ثقة في اللاعب.

× عشان كدا سجلوه مرتين.

× قبل مباراة القمة.

× وبعد مباراة القمة.

× واللـه الهلال دا بزعزع الجماعة ديل جنس زعزعة.

× ما بنوموا الليل.

× بتوهموا عديل كدا.

× اللاعب بقوا يسجلوه مرتين.

× ما فاضل ليهم إلّا يسجلوه في عمادة الطلاب.

× أو في الشهر العقاري.

× الجماعة ديل بقوا كل 48 ساعة يسجلوه؟.

× انتوا الحركات العملتوها مع بكري المدينة ..الهلال ما بعملها مع رمضان عجب.

× جماعتنا ديل دخلتهم خلعة.

× خلعة عديل كدا.

× لا عرفنا الخلعة من (رمضان)…لا عرفناها من (عجب).

× يمكن الاندراوة البعملوا فيها دي تكون عشان رمضان قرب.

× رمضان باقى ليه (35) يوماً.

× يعني يا جماعة الموضوع دا قرب شديد.

× شوفوا من (الكواري) تبقى غالية ..وسعرها يصل السماء …أعرفوا طوالي رمضان قرب.

× ومن تشوف ليك زول العصر بجي كاتل ليه شارع وشايل ليه (بطيخة) دون عادتو..أعرف طوالي رمضان قرب.

× هسع نحن خلعة المريخاب ديل ما عرفنها من شنو؟.

× من شهر رمضان؟.

× أم من رمضان عجب؟.

× من الجزائرين؟.

× قالوا ليك الجزائرين (لابدين) للمريخ.

× المريخ وقع مع تلاتة أندية جزائرية.

× الموضوع دا زي وقت تكون ماشي ليك في شارع.

× تكون ماشي في الشارع تشوف قدام الشارع هناك واقف زول أنت ما عزيتو في وفاة أبوه.

× يبقى ليك الموقف محرج شديد.

× تقول ترجع …ما ظريفة تعزيّه في الشارع.

× تتلفت وراء تشوف ليك زول عاوز منك قروش.

× بضرب ليك ألف مرة وما بترد عليه.

× تبقى في موقف بائخ.

× لا تعرف تمشي على الزول الطالبك (فاتحة).

× ولا تعرف ترجع على الزول الطالبك (قروش).

× هسع ناس المريخ لو مشوا قدام بلقوا وفيق سطيف.

× لو رجعوا ورا اتحاد الجزائر.

× لو وقفوا قبلهم مولودية العلمة.

× يتصرفوا كيف؟.

× يعملوا شنو؟.

× واللـه إلّا تقدوا سلك.

× عشان اللخبطة دي ..سجلوا رمضان عجب مرتين.

× يجبوه ويرجعوه زي أنبوبة الغاز.

× موش مرات بتكون حايم يومك كلو بي أنبوبة الغاز.

× أي محل تمشي عليه – بقوم يوصف ليك محل تاني.

× لكن الشغل العملوه ناس الهلال هو الذي جعل المريخ يسجل رمضان عجب مرتين.

× مرة قبل المباراة.

× ومرة بعد المباراة.

× انتوا لو عندكم الصاقعة (نزار حامد) كان عملتوا شنو؟.

× يمين كان سجلوه تسع مرات.

× الهلال اشتغل على (رمضان عجب) ونجح في أن ينزع الثقة في اللاعب من قبل المريخ.

× وفوق هذا – مجلس الهلال اشتغل على نار هادئة موضوع (وليد الشعلة).

× العاصفة (وليد الشعلة).

× بقى عندنا الصاقعة (نزار حامد).

× والعاصفة (وليد الشعلة) الذي يعتبر مكسب التسجيلات الحقيقي.

× الجماعة انشغلوا بي (ولدهم)…والهلال هنا خلص على (وليد الشعلة).

× الاتحاد العام هو ذاتو اتخلع من سرية العمل.

× الاتحاد العام بدون ما يشعر قام وقف ليك نشاط (وليد الشعلة).

× الكلام دا كلو خلعة.

× وردة فعل من الاتحاد من غير ما يشعر.

× قال شنو؟.

× قال الاتحاد يغرم الأهلي الخرطوم (25) مليون جنيه ..عشان وليد الشعلة لم ينضم للمنتخب الأولمبي.

× طيب عاوزين نعرف ..الـ (25) مليون دي بتمشي لخزينة الاتحاد أم خزينة المريخ؟.

× الجماعة كبسوا من الأهلي الخرطوم.

× إدارة نادي الأهلي الخرطوم تعاملت مع الأمر بمسؤولية ..وحسبت مصلحة ناديها فقط.

× أطلقت سراح وليد الشعلة للهلال وقدمت درساً في التسويق.

× العاصفة وليد الشعلة المكسب الأول في التسجيلات.

× في العادة نحن نسعد أكثر عند تسجيل لاعب وطني.

× اللاعب الوطني عملة نادرة ..وموهبته لا تقدر بثمن.

× الهلال الآن سيّطر على قوام كل المنتخبات.

× المنتخب الأول والأولمبي والشباب.

× وهذا أمر يحمد ويحسب لأشرف الكاردينال الذي تحرك في كل الجوانب ودعم الهلال وقواه في كل المراحل.

× وقبل اللاعب المحترف …نسأل عن المزيد من النجاحات في ملف تسجيلات الوطنيين.

× ونسأل اللـه التوفيق والسداد واكتمال خطوات التدعيم كلها بنجاح تام.

× …………

× ملحوظة : عاصفة الحزم العاصفة (وليد الشعلة).

هوامش

× الأهلي الخرطوم قدم للهلال المحترف الأفضل في السودان الآن نيسلون.

× والأهلي الخرطوم يقدم الآن للهلال أفضل المواهب الوطنية وليد الشعلة.

× وهذا أمر تستحق عليه إدارة نادي الأهلي الخرطوم التحية والتقدير.

× يجب أن يدعم الهلال الأهلي الخرطوم ببعض الإعارات.

× هلال الأبيض والأهلي الخرطوم يستحقون الدعم.

× وكذلك هلال الفاشر وهلال كادوقلي.

× جميل أن الكاردينال هذه المرة أدار التسجيلات من الخرطوم وليس من الإمارات.

× دا الشغل الصاح.

× ويبدو واضحاً أن أشرف الكاردينال استفاد من تجاربه السابقة.

× وهو المطلوب.

× من قبل كنا قد كتبنا وطالبنا أن لا يرسل الهلال في كشفه الأفريقي اسم (27) لاعباً لتكون فرصته في التكميلية تتمثل فقط في إضافة ثلاثة عناصر.

× في كشف الهلال الأفريقي لاعبين لم يستفد منهم الهلال في شيء.

× لو أرسل الهلال للاتحاد الأفريقي اسم (25) لاعباً لاستفاد الآن من إضافة خمسة لاعبين.

× ذكرنا وكتبنا عن ذلك وقتها قبل أن يرسل الهلال كشفه الأفريقي ..لكن الأمين العام وهذا اختصاصه لم يلتفت للأمر ولم يهتم به.

× جري رسلوا الكشف.

× المريخ يمكنه إضافة أربعة عناصر لكشفه الأفريقي…لأن كشفه الأفريقي الذي كان قد أرسله كان فيه (26) لاعباً.

× نرجو أن يستفيد مجلس الهلال من هذه الأمور مستقبلاً.

× ما ترسلوا ساكت يا عماد الطيب.

× وما تستعجلوا.

× …….

× عاجل : يا أمير كمال – أوعك تقع في الغلطة الوقع فيها رمضان عجب ..براك شفت الحصل.