محمد عبد الماجد

قصص تصلح أن تقرأها أكثر من مرة


ناس المريخ مفروض يشيلوا منهم شرائح زين وسوداني وام تي ان …ويدوهم شرائح (جزائرية)
صديق علي صالح حسب (كورتو) الشايفنها ليه بكون فاكر الجزائر دي دولة (أوربية)..عشان كدا قال المريخ بيلعب في دوري أبطال أوربا
عشان يصلحوا الموضوع شوية…قالوا تراوري عمل ليه مؤتمر صحفي…تقول حرر هجليج
يا الكاردينال البرازيلي دا لو قعد في السخانة دي ..زوجتو ما أظن تقعد ..عشان كدا احسموا تسجيلوا من بدري

المساء الذي يشبه اللبن (الرايب(.
الزبادي بي فهم ناس الخرطوم – تتعطل فيها (15) حاسة.
غير (شاي اللبن(.
حتى إذا جاء الصباح بعد (طلاع روح) اكتشفت أن المساء (الرايب) والزبادي (العليل) – ما عندو أي علاقة بهذا المساء الذي نكتب عنه الآن.
الذي أعرفه أن (المساء) عندما يكون (ثقيلاً) يبقى متل ( نص النهار) الكهربتو قاطعة.
والناس بتدخل وتطلع من غير موضوع.
منو العندو (ملامح) زعلانة منو؟.
حردانة ..وواقفة على أطراف الأصابع.
………..
نحن عندنا أغرب حالة.
طياراتنا بتقع ..وشيكاتنا بتطير.
اقلبوا الصورة.
…………
بعض الكتابات تبقى مثل (أم فتفت) تحتاج إلى أن تغسلها عشر مرات حتى تقرب منها.
ما عندنا قضية مع (أم فتفت).
لا أم فتفت ولا يحزنون.
الدخل الحزن مع (أم فتفت) شنو؟.
لو ما قانون الحركة فيها حاجات غريبة.
لا (أم فتفت) ولا غيرها.
لكن قضيتنا مع (الكتابات) التى تشبه (أم فتفت).
اليوم نكتب بمثل (الطعم).
نغسل الحروف عشرين مرة لتخرج من حالة (الخمول) التى تبقى فيها (حبيسة).
احبسوا حرف (السين)…حرف (الميم) برفع فيكم عريضة.
دا لو ما طلعت (العين) بره في الشارع.
………..
قريباً من هذه الحالة.
برج حمام فيه عشرين جوز حمام.
(40) حمامة عديل كدا.
غير (الترجي) وعزام وكابوسكورب
لبرج الحمام هذا تدخل (كديسة) يومياً وتشيل ليها (فردة) وتطلع.
وتدخل (المحلية) وتشيل ليها يومياً (جوز حمام).
كم حمامة تتبقى في ذلك البرج بعد (11) يوم.
أحسب الحمام الدخل (المجموعات).
………….
انتظرها طويلاً – على حافة الشارع.
لمن جلحاتو طلعت.
وجاتو صلعة.
وذاكرتو ضعفت.
وبقى يتكلم ساكت.
بعد أن طال عليه الانتظار ..فتح الساعة وجدع (حجرها) عشان ما يحس بأنها اتأخرت شديد.
وضميره يقوم يوجعو.
………..
قال ليه …وهو عامل فيها مفكر.
أو هكذا كان يبدو في الحلة.
قال ليه : لو لقيت ليك خزينة فيها 20 مليار جنيه وقدامها كلب سعران تعمل شنو؟.

قال ليه : أقسم مع الكلب ..هو عشرة وأنا عشرة.
في ناس بحسبوها كدا في السخانة دي.
……………………
اتقدم ليها عشرين مرة.
في كل مرة كانوا برفضوه.
أول مرة …مشى معاه جدو.
المرة التانية ..ساق معاهو أبوه.
المرة الرابعة ساق معاهو أخوه.
المرة العاشرة ساق معاهو ولدو.
آخر مرة ساق معاهو أربعة من أحفاده.
الجميل أنها قالت ليه – مالك مستعجل كدا ..خلي أحفادك ديل يكبروا شوية.
هو برضو ما قنعان.
……………
لو عاوز دمك يبقى بارد.
وجلدك يبقى تخين.
وما بتحس بي أي شيء.
شجع المريخ أربعة يوم ..وما تشرب قهوة.
ما أشرب قهوة ممكن …أشجع المريخ دا كيف؟.
يمين (24) ثانية ما بقدر على العقوبة دي.

ولا بكضب.

ولا بنستحمل الكلام دا.

……………

اشتري ليك بطيخة.

قطعها على أربعة.
شرطاً كدا تقطعها على أربعة.
ناس المحلية بيجوك بقولوا ليك أنت شيل القطعة الخامسة ..وخلي لينا القطع الأربعة.
بشيلوا الأربعة – بتقعد تفتش في القطعة الخامسة.
ما تتعب شديد – عشان القطعة الخامسة لو ظهرت بشيلوها (دمغة جريح).
……………..
قعدت أحضر المباراة في التلفزيون.
قلت أحوّل الطبق.
حولت الطبق.
بدل المباراة …الطبق جاب لي (الشيخ ود حمد والطيب ود عيسى والأمين ود الجزولي والشفيع ود الحسن وخالد ود الفاتح) ديل كلهم قالوا عاوزين يحضروا معاي الكورة.
غير (اللوري) الناسو بيسألوا من وصف البيت.
قلت ليهم لو عارف (الطبق) بجيب لي (الجمهور) دا كلو كان دخلتها في الاستاد.
أو على الأقل كان جبت لي (تذكرجي) ووقفتو قدام البيت.
………………
قال ليه ..عشرين سنة قاعد امتحن عشان أدخل طب.
صاحبو قال ليه : ودخلت كلية الطب في النهاية.
جاوب ليه بي ثقة زايدة ..وقال ليه دخلت طب ..لكن اكتشفت في السنة الرابعة أني دخلت (تجارة).
واتخرجت شنو؟.
قال ليه : والـلـه لا أقول ليك (تاجر) ولا أقول ليك (طبيب).
الشهادات شهادة طبيب …والعمل عمل تجار.

البيجيني يقول عندو (نزلة) ساكت بشيل منو (200) جنيه.

…………..
المريخ ح يلعب في مجموعة فيها تلات أندية جزائرية.
ليه حق صديق علي صالح يقول المريخ بيلعب في دوري أبطال أوروبا.
صديق حسب (كورتو) بكون فاكر الجزائر دي دولة (أوربية).
………………
قالوا لي عنكبة أعاروه لهلال الأبيض.
قلت ليهم أنا ما زمان قلت ليكم بكري المدينة وعنكبة ما بقعدوا في فريق واحد.
عنكبة وبكري في فريق واحد ..زي إنصاف مدني في فرقة (عقد الجلاد).
عشان كدا طفشوا عنكبة لهلال الأبيض ..عشان بكري المدينة يأخد راحتو.
………….
السخانة الأيامات دي شديدة.
لكن المشكلة ما في سخانة.
ولا في قطوعات الكهربة.
ولا في الحاجات دي.
المشكلة في السخانة دي تلعبوا لي في مجموعة كلها جزائرين.
…………..
يا ناس جمال الوالي.
ويا الفريق طارق.
وعبدالصمد (استقال أو ما استقال ما عندي معاهو قضية).
وعلاء الدين يوسف وبكري المدينة وأحمد الباشا.
وكل الجماعة الطيبيين.
أنتوا مفروض يشيلوا منكم شرائح زين وسوداني وام تي ان …ويدوكم شرائح (جزائرية).
اعملوا ليكم شرائح (جزائرية).
……………
ناس المريخ عندهم (بدع) بيعرفوها براهم.
حاجات بقطعوها من رأسهم.
بيصنعوا ليهم (اختراعات) نحن أصلو ما سمعنا بيها في الدنيا دي.
في الأيام الماضية ..مهد إعلام المريخ للتخلص من (تراوري)..واقنعوا الجماهير أن تراوري لا جدوى منه.
قالوا تراوري ما فيه فائدة.
وإن المدير الفني للمريخ الفرنسي غارزيتو يشوف (العمى) ما يشوف (تراوري).
وكان الجهاز الفني للمريخ ومجلس الإدارة استبق فترة التسجيلات بإيقاف (تراوري) باعتبار أن المحترف المالي سوف يكون أول المغادرين لكشوفات المريخ.
الناس كلها اقتنعت بمغادرة تراوري لكشوفات المريخ – فهو لاعب غير منضبط وغير ملتزم ..ولا يرجى منه شيئاً.
على هذا سارت الجماهير واقتنعوا جميعاً بمبررات إعلام المريخ والأسباب التى ساقها للتخلص من (تراوري).
المعلوم أن تراوري لم يظهر في النصف الأول من الموسم إلّا في مباريات محدودة لم يكن لها فيها أثر.
تراوري طبعاً نحن مجربنو.
نحن عارفنو.
حافظنو حفظ.
ما فيه أي فائدة ..وما عندو غير يضيّع الكورة ويشد الشورت ويصنقع لي فوق.
أنا ما عارفو بصنقع فوق لي شنو؟.
تقول بركب ليه في (مروحة).
المريخاب بقت ليهم شنو؟.
عشان يصلحو الموضوع شوية.
قالوا تراوري عمل ليه مؤتمر صحفي.
تقول حرر هجليج.
وقالوا تراوري في المؤتمر الصحفي اعتذر لي غارزيتو.
قديمة.
واعتذر لجماهير المريخ.
عليكم الـلـه من الـلـه خلقكم شفتوا ليكم (تمثيلية) بالشكل دا.
عاوزين يصلحوا الموضوع.
عشان يتبلع.
ويبقى مقبول.
قالوا دكتور تراوري عمل ليه مؤتمر صحفي.
غايتو يا ناس المريخ لمن تكونوا عاوزين تصلحوا الموضوع – أصلو ما بتغلبو.
لكن بتعملوها ظاهرة.
ما بتتبلع.
أنتوا بتغشوا في منو؟.
بتغشوا فينا ..وإلّا بتغشوا في نفسكم.
لو بتغشوا فينا …نحن حاجات زي دي ما بتغشنا.
لو بتغشوا في نفسكم …أنتوا بتكبروا متين؟.
مؤتمر شنو؟.
لو تراوري بعرف يعمل ليه مؤتمر صحفي ..دي ما كانت حالتو.
بعدين غارزيتو بقتنع بي الحاجات دي.
غارزيتو بقتنع بـ (المؤتمر الصحفي).
قول نحن اقتنعنا – البقنع غارزيتو شنو؟.
……….
ملحوظة : تراوري بقى زي دكتور العيون من المؤتمرات الصحفية.
هوامش
البرازيلي قالوا ليك وصل في سخانة – قرّب يرجع.
يا الكاردينال الزول دا لو قعد في السخانة دي ..زوجتو ما أظن تقعد ..عشان كدا احسموا تسجيلوا من بدري.
زوجتو بتملأ ليه رأسو.
التسجيلات بكره آخر يوم.
أحسن…عشان ما تزعجونا ساكت.
الاستفاد من التسجيلات هلال الأبيض.
تقول مشارك في المجموعات.
………
عاجل : أمير كمال الخمسة مليار ما شوية – لكن لو انتظرت نوفمبر بتصل (11) مليار.


تعليق واحد

  1. يا سلام عليك أيها الكاتب النحرير ! بالله في أي المدارس الأدبية تعلمت هذا الأبداع ؟ ومن أي المراضع رضعت هذه المعاني ؟ لقد أكدت لي مقولة أن (جائزة نوبل عمياء ) بل هي عمياء وطرشاء أين هي من هذا الأبداع ؟ الذي فاق الطيب صالح وماركيز وكل الفائزين والمرشحين للجائزة من يوم صدورها وحتى الغد !! الله يا هذا المبدع الفنان إقرأ معي عباراته (حرف الميم يرفع عريضة) الله يا هذا الخيال تخيلوا حرف الميم واقف أمام كاتب العرضحالات يملى عريضته !!!! وإقرأ معي ( منو العندو ملامح زعلانة منو) الله الله أنت مبدع أكثر من وولي سونيكا ومن السياب لماذا لا توافق لنا لنجمع توقيعات لنرشحكم لنيل نوبل يا بطل !! تأملوا معي (كتابات مثل ام فتفت) الله يا ولد … أم فتفت بت الناس ؟!!