سؤالات

الغريب إنك بتسأل.. إني وين؟!!

وأنت عارف بيني بينك.. مافي بين

أنا.. من عيونك.. خطوتين

وانا من زمانك.. لحظتين

والضفاف بالفطرة تعرف

جيّة الموجات متين

#####

والغريبه معاي.. وغايب

وقلبي في أشواقو.. دايب..

راجي جيتك من سنين..

وعمري عدا مع الحنين..

وبرضي واقف في انتظارك.. كأنو طالب الفرقة دين

#####

والغريب في الكون لقيتك مرة بدري

تكتب معاني الإلفة مرة.. ومره تشرح معني عمري

وكم قريتك.. وكم سمعتك.. والسنين بالحسرة تجري

وعمري ما فكرت لحظة.. إنو شوفتك.. تبقي قدري

######

والغريب لسع بتسأل: ليه بريدك؟

اسأل الدم البيجري.. كيف عرف سكة وريدك؟

واسأل الكف البتكتب.. كيف بقت بالفطرة إيدك؟

واسأل الحرف المعنّى.. كيف دخل أبيات قصيدك؟

واسأل الحزن البيصبح.. دمعة سالت في خديدك

واسأل اليوم السعيد.. الحضر لحظة جديدك

واسأل البهجة البترسم.. معنى عيدك

واسأل أقدارك وحظك.. ولوح حياتك

واسأل اللحظة البتشهد.. يوم مماتك

تعرف انو الحب مسطر.. وإنو كاتبو المولي سيدك

###

والغريبة تغيييييب وترحل

وبرضو ترجع تاني تسأل!!

عن دروب ريدنا القديمة.. وعن مضامينا الحميمة

وعن غرام بيناتنا طول

وحقو تسأل عن مصيرنا؟!.. وليه سكن أحلامنا غيرنا..

وكيف حياتنا حتبقى أجمل؟

بس نعيد في الريد حسابنا..

وتفتح الحنية بابنا..

وتبقى عنوان لي كتابنا..

ونمسح أحزانا وعذابنا..

وحقو نسأل: كم بكون في العمر فضل؟!

تلويح:

بخاف أسأل عليك الناس.. وسر الريدة البينا يذيع!!