(تشافي) من برشلونة الى السد القطري و(عمر بخيت) من الهلال الى المريخ
علاء وبكري والمعز عاوزين يكبّروا كومهم بعد ان اصبحت (شلة) الهلال في المريخ هى المسيطرة على الاوضاع
“”””””””””””””””””””””””””””””””
(كباتن المريخ) العجب والباشا وبلة يتم الاستخفاف بهم ولا يجدون التقدير ولا الاحترام في دارهم بينما يجد (كباتن الهلال) هيثم وعمر والمعز كل التقدير في المريخ
“””””””””””””””””””””””””””””””””
يا ابراهومة انت مستعجل مالك؟…المريخ دا ملحوق بعد (17) سنة ممكن تجي تلعب فيه
“”””””””””””””””””””””””””””””””””””””””
حركات (التمهيدي) دي ما تعملوها لينا في (المجموعات) – برجّعوكم من اول مباراة لو ما خليتوا حركاتكم دي
“””””””””””””””””””””””””””””””””””””””””””
• المريخاب عندهم قناعة تامة بي ان اي لاعب قادم من الهلال – لاعب مفتح وعارف اي حاجة وسوف يضيف للمريخ الكثير.
• وما فيه اي كلام.
• ان شاء الله كان بلعب في الهلال قبل (50) سنة.
• عندهم ايمان قاطع بي لاعبي الهلال – يعلمون ان الهلال يمنح لاعبيه الخبرة العريضة والثقافة العالية.
• لذلك اي لاعب يأتي للمريخ من الهلال هو من دون شك سوف يشكل اضافة للفريق – مثلما يضيف لاعبو الهلال لفرق الاهلي شندي وهلال الابيض والامل عطبرة والنسور وغيرهم من اندية الممتاز والدرجات الصغرى.
• المريخ بثبت لنا دائما انه (الضل) – في الحقيقة التصرفات البنشوفها في المريخ دي تصرفات ناس بتاعين (ضل) ساكت.
• تمهيدي – ما مجموعات.
• ليس هناك (ضربة) وجهت للهلال في تسجيل عمر بخيت للمريخ وان قصد مجلس المريخ ان يشوه تاريخ اللاعب الحافل والكبير مع الهلال.
• ومثلما كان هذا هو هدفهم عندما سجلوا هيثم مصطفى الذي استغنى الهلال عنه بعد (17) سنة – فعل المريخاب نفس الشيء وسجلوا عمر بخيت من اجل (المكايدة) فقط.
• وقد اشار امس الخبير سيد سليم الذي قال ان تسجيل عمر بخيت (مكايدة) للهلال واللاعب لا يمكن ان يعطي للمريخ شيئا.
• وعندما تكون النوايا من اجل هذه الاهداف – تبقى النتائج مخيبة من دون شك.
• علاءالدين يوسف وبكري المدينة والمعز محجوب كانوا اكثر الناس اصرارا على تسجيل عمر بخيت في المريخ..والهدف من ذلك واضح.
• علاء وبكري والمعز عاوزين يكبروا كومهم بعد ان اصبحت (شلة) الهلال في المريخ هى المسيطرة على الاوضاع.
• لا اثر الآن لكل كباتن المريخ – فقد انحسروا جميعا بداية من (بلة جابر) الكابتن الثاني للمريخ وحتى احمد الباشا الكابتن الاول للمريخ ، وقبل ذلك كان العجب.
• ورغم ان احمد الباشا جاء من الهلال ايضا – إلّا ان سنوات الباشا في الهلال كانت قليلة كما ان الفترة طالت.
• كباتن المريخ يتم الاستخفاف بهم ولا يجدون التقدير ولا الاحترام في دارهم بينما يجد كباتن الهلال كل التقدير ويظفرون بالمليارات من المريخ ويسطيرون على الاوضاع في المريخ.
• بكري المدينة لملم ليك (المليارات)..وخلي ليك خشم امير كمال ملح – ملح.
• جاء كابتن الهلال هيثم مصطفى للمريخ ففعل له المريخاب كل شيء – حتى كادوا ان يفرشوا له الارض.
• جمال الوالي قدم شيك على بياض لهيثم مصطفى من اجل ان يعيد تسجيله في المريخ فرفض هيثم مصطفى ذلك.
• بل فضّل هيثم مصطفى الجلوس في بيته من ان يمنح كابتنية المريخ.
• في الوقت الذي تم فيه اجبار (فيصل العجب) على الاعتزال وعلى كتابة خطاب انهاء خدمة – حتى تم تهجير فيصل العجب الى مريخ الفاشر.
• احمد الباشا كابتن المريخ وجد اسوأ معاملة في المريخ فهو في المريخ الآن لا يشارك ولا يطلق صراحه.
• احمد الباشا كابتن المريخ يمر بحالة نفسية سيئة انهت قدراته وكممت مواهبه وعطلت امكانياته ، وهو من افضل اللاعبين في السودان سلوكا وقدرات فنية.
• بلة جابر كابتن المريخ الاخر خرج ولم يعد ..واصبح لا حس ولا خبر (انتوا ذاتو يا الهلالاب ما بتريحو الزول).
• في ظل هذه المعاملة القاسية والغريبة وغير الانسانية التى يتعرض لها كباتن المريخ ..يجد كباتن الهلال (السابقين) كل الاحترام والتقدير في المريخ.
• مع الاحترام والتقدير بلقوا (المليارات) وبسيطروا على كل الاوضاع لدرجة ان ملفات تسجيلات المريخ اصبحت في يد علاءالدين يوسف وبكري المدينة.
• كابتن الهلال هيثم مصطفى ..الكل يعرف ما وجده في المريخ ..ما خلوا ليه شيء.
• ناس هيثم كابو الكلام الكتبوه في هيثم مصطفى ما كتبوه في محمد وردي.
• المعز محجوب لعب للهلال اكثر من عشر سنوات وتقلد القيادة ..وجاء للمريخ ليصبح من (الكنبة) له الكلمة الاولى في المريخ.
• عمر بخيت كابتن الهلال ..جاء للمريخ بعد (14) سنة في الهلال ..فتهللت بشائر المريخاب وانفرجت (جباهم) وعمر بخيت يوقع بعد كل هذه السنوات في المريخ.
• خلونا نسأل ونقول هل ما وجده كباتن الهلال هيثم مصطفى والمعز محجوب وعمر بخيت في المريخ وجده كباتن المريخ فيصل العجب واحمد الباشا وبلة جابر في المريخ نفسه.
• الاجابة واضحة.
• لأن فيصل العجب يلعب الآن في الفاشر.
• واحمد الباشا …يمر بحالة اكتئاب خطيرة نتيجة لهذا الذي يشاهده في المريخ.
• ويبقى بلة جابر ..ضائع رسمي في المريخ ..فهو الحاضر الغائب.
• تلك الوقائع مشهودة للجميع ..هي علامات واضحة – الكل يعلم بها ويعرفها.
• والمريخاب الحقيقيين عارفنها قبل غيرهم.
• بل المريخاب البكاجروا برضو مقتنعين بهذا الذي نقوله.
• ابراهومة لو جاء للهلال ..لقدم موهبته بصورة محترمة ولوجد فرصته مع لاعبي الهلال فهم على الاقل في سنه.
• يعني ما معقول يا ابراهومة تلعب لي مع ناس عمر بخيت وايمن سعيد والمعز محجوب وعلاءالدين يوسف.
• ديل في (السفرة) ما بدوك فرصة …ناهيك عن التشكيلة.
• لو جيت الهلال كان لقيت ناس وليد علاءالدين ومحمد عبدالرحمن واطهر الطاهر ومعتصم ووليد الشعلة والثعلب والصيني وبشه الصغير.
• مالك ومال المجازفات.
• ناس الباشا وبلة جابر العكليتة ما لقوا فرصة مع التماسح ديل ..عاوز تلقاها انت.
• بعدين يا ابراهومة انت مستعجل مالك؟…المريخ دا ملحوق بعد (17) سنة ممكن تجي تلعب فيه.
• وتلقى فيه من الاحترام والتقدير ما لم تجده الآن.
• اعود واقول ان موضوع ان يسجل المريخ لاعب من الهلال لم يعد امر ايغضب الهلالاب ويثيرهم.
• بل هو امر يضحكهم ويثبت ان الفارق كبير بين الهلال والمريخ.
• بين الاصل والضل.
• الموضوع بقى عادي ..والمكايدة فيه اضحت ظاهرة ومكشوفة.
• اغلب المريخاب هم ضد هذه الخطوة التى قام بها المريخ.
• نعرف الكثير من المريخاب الذين يعرفون قدر المريخ ..ولا يرضون له ان يهلل وينتشي بلاعب لعب في الهلال قبل 14 سنة.
• يا جماعة الله ..كلامكم دا ناس (جزيرة الفيل) ما قاعدين يعملوه.
• انتوا ح تظلوا في هذا المربع – عاوزين تكبروا متين؟.
• حركات (التمهيدي) دي ما تعملوها لينا في (المجموعات) – برجعوكم من اول مباراة لو ما خليتوا حركاتكم دي.
• عشان اثبت ليكم ان الحركات البتعملوا فيها دي حركات ناس صغّار.
• تعالوا شوفوا الحكاية الواقعية دي.
• قبل ايام قليلة احتفل نادي السد القطري ..وملأ الدنيا ضجيجا واعلن انتقال كابتن برشلونة (تشافي هيرنانديز) الذي سوف ينتقل في الموسم الجديد لكي يلعب في السد القطري.
• تشافي لعب في برشلونة (17) عاما ..وانتقل من بعد لكي يلعب في نادي السد القطري.
• طبعا على طريقة الهلال – برشلونة استغنت من (تشافي) الذي قدم مسيرة حافلة في البارسا وحقق الكثير من البطولات والالقاب.
• لكن خلاص ..مسيرة تشافي انتهت مع برشلونة.
• انتقال تشافي للسد القطري ..من دون شك سوف يشكل اضافة كبيرة للسد القطري ..لأن السد يبحث عن (التاريخ).
• وتشافي تاريخ كبير.
• لكن الاكيد ان انتقال تشافي من برشلونة لن يؤثر بشيء في برشلونة – ما فارقة مع برشلونة كتير.
• عمر بخيت نحترم تاريخه في الهلال ..ونحفظ له ما قدم – لكن الهلال باختياره قرر عدم التجديد للاعب.
• وقد قفل الهلال ملف عمر بخيت الذي انتقل للاهلي الخرطوم بعد ان قرر الهلال عدم التجديد له.
• كما لعب عمر بخيت في الاهلي الخرطوم – سوف يلعب في المريخ ..ولا فارق كبير بين الاهلي والمريخ – الاتنين بنتظروا لاعبي الهلال بعد ان يصرف الهلال عنهم النظر.
• ………
• ملحوظة : يعني دي زعلتكم شديد ..ما عندكم اي فرق من الاهلي الخرطوم.
هوامش
• واحد قال لي لو الواحد عندو تذكرة قديمة من سنة 2003 ممكن يدخل بيها مباريات المريخ.
• قلت ليه المريخ دي مفروض تذاكر مبارياته يقيموها ليه بالتعريفة.
• الناس ديل قديمين شديد.
• من زمن تحتمس بلعب في شارع الموردة لابس ليه (ردا) وشايل ليه (نبلة).
• ناس الاتحاد العام لو عندهم نظر – مباريات المريخ يبرمجوها ليه في دار الرياضة ام درمان.
• طبعا نحن الهلالاب موضوع انتقال عمر بخيت للمريخ رفع لينا روحنا المعنوية.
• وخلانا ندخل المجموعات بي روح معنوية عالية.
• نذكر المريخاب ..ان عمر بخيت سجل في المريخ محليا وافريقيا.
• ورونا فهمكم.
• ……..
• عاجل : المريخ فشل في تسجيل (خليفة) – عشان خليفة قال ليهم عاوز اربعة مليارات.
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
تعلم كيف يكتب الصحفي يا فقير :
نيمار…جبتوهوا من البرازيل؟
@ تنشط هرمونات السعادة عندى وترتفع عندما يشرع كتاب الهلال فى عقد المقارنات بين الزعيم والوصيف!
@ تلك المقارنات تطربنا،لأن خاتمتها معلومة بالنسبة لنا!
@ مقارنة زعيم الكرة السودانية وكبيرها ومفجر أفراحها وحامل أختام بطولاتها الخارجية والمحليه مع اى فريق آخر فى السودان تشبه مباراة بين ملاكمين،أحدهما من وزن الثقيل والآخر من وزن الذبابة!
@ خلال اليومين الماضيين نشط كتاب الوصيف فى معايرة المريخ بتسجيل عمر بخيت مدعين ان الزعيم يلهث وراء نجوم الهلال بدليل انه سجل تلاتة من كباتن الفريق الأزرق خلال السنوات الثلاثة الأخيرة.
@ بدءاً نقول ان المريخ لا يرى حرجاً فى تسجيل اى لاعب متميز من أى ناد!
@ سجل راجى وعلى جعفر وأيهاب زغبير من اهلى الخرطوم،ومصعب عمر من اهلى مدنى ورمضان عجب وأمير كمال من الموردة وبله جابر من حى العرب بورتسودان وضفر من نيل الحصاحيصا وأحمد ابكر من الأمل عطبره وبخيت خميس من الرابطة كوستى وعنكبه من الخرطوم ومجدى عبداللطيف من هلال الساحل والمعز والعقرب والمعلم من هلال الساهل.
@ مافيش فرق يا ابراهيم!
@ أصلاً الفرق الكبيرة بتسجل من الفرق الصغيرة يا محمد عبدالماجد!
@ لو رفض الأهلة الإستعانه بنجوم المريخ لقبلنا منطقهم.
@ ولربما إستسغنا سخريتهم.
@ وثقت صفحات التاريخ الكروى ان الهلال سجل قرابة الثمانين لاعباً من المريخ منذ إنشائه فى العام 1930.
@ بل ان التاريخ أكد لنا ان الهلال نفسه ولد من ضلع المريخ،لأن الراحل فتح الله بشارة ورحمى سليمان وعدد من المريخاب الأوائل غضبوا من تحويل اسم ناديهم من المسالمه للمريخ فى العام 1927،فبادروا بتكوين فريق الهلال فى العام 1930 بأشهر زعله فى التاريخ الكروى السودانى.
@ تلك الواقعه تشير الى صحة مقولة أن الهلالاب فى الأصل (مريخاب زعلانين)!
@ الزعله إستمرت 85 سنه يا سلك.
@ وإستمر معها الصفر المعمر.
@ كذلك حفظ التاريخ لنا أن المريخ نفذ اول وأكبر وأشهر عملية نقل دم فى تاريخ الكرة السودانية، عندما قرر لاعب المريخ السابق طلعت فريد (رحمة الله عليه) الإنتقال الى الهلال لتقويته بعد ان ضعف وكاد يندثر فى مواجهة المد الأحمر فى العام 1934.
@ لذلك يسعد المريخاب لأى نجاحات يحققها الهلال لأنهم يحسون أن لهم نصيب فيها!
@ الدم الأحمر الذى يسرى فى عروق الأهلة يشهد على أصلهم الطيب.
@ والدم عمر ما بيبقى مويه يا كابو.
@ يدعى إعلام الهلال ان المريخ يلهث خلف عواجيز الأزرق بعد الإستغناء عنهم، ويطلقون على المريخ لقب (الهلال الأحمر السودانى).
@ من يرددون تلك المقولة سجلوا نجم المريخ السابق باكمبا بعد ان أمضى عشرة سنوات مع الزعيم.
@ وسجلوا قبله فتحى فرج الله ووهبه وعبده الشيخ وغيرهم بعد ان إستغنى المريخ عنهم.
@ وسجلوا طارق جاديكا وسعيد الزنزون وإدوارد جلدو والحارسين يس بابكر وعبد الرحمن لاميدو ووارغو ونصرالدين الشغيل ووليد علاءالدين وسامى عبدالله وفيصل موسى بعد شطبهم من المريخ.
@ أسماء كثيره وكبيره لجأ اليها الهلال طلباً للتميز وضمها لصفوفه على امل ان يحقق ما سبقه عليه المريخ!
@جحجوم..سلسيون..كليتون..فريوة..دقنو..مشرقى..الحمرى..ودالعازه..بنى..حنين..دوليب..فوتيا..غبريال..العكام..كبسون وغيرهم كثيرون.
@ كبسون وليس كبسور يا وصيفاب.
@ هؤلاء كلهم سجلهم الهلال من المريخ.
@ بل ان تاريخ الكره السودانيه أثبت لنا حقيقه أن المريخ أمد الهلال بأفضل المهاجمين فى تاريخه الطويل!
@ على قاقرين أتى للهلال من المريخ.
@ وعزالدين الدحيش أتى للهلال من المريخ.
@ من يسخرون من المريخ بإدعاء أنه يسجل لاعبى الهلال يضم كشفهم الحالى ثلاثة لاعبين من المريخ.
@ نصرالدين الشغيل وفيصل موسى ووليد علاءالدين الملقب ب(نيمار).
@ نيمار ده جبتوهوا من البرازيل برضو يا ود عبدالماجد؟
@ يزعمون ان المريخ يسجل عواجيز الهلال.
@ ما رأيكم فى فيصل موسى دام فضلكم؟
@ هل ما زال فى عمر الزهور..عمرالغرام..عمر المنى.
@ خلاص كبر وليهو 19سنة.
@ إتفيصلى.
آخر احقائق
@ سبق المريخ الهلال فى النشأة..فوضع الأهلة تحت (ضغط العراقة والريادة) منذ بواكير القرن الماضى!
@ الضغط الأحمر على الجبهة الزرقاء بدأ بأمر الثعلب الزين الشفيع الذى قاد المريخ لتحقيق أول فوز فى لقاءات القمة عام 1934 وإستمر حتى آخر مباراة!
@ (ضغط الجنين) لاينخفض إلا ليرتفع من جديد.
@ ساهمت دماء المريخ الزكيه فى إنقاذ الهلال من الفناء فإستمر حياً يرزق حتى اللحظة!
@ فى الثلاثينيات إستمر ضغط العراقه عالياً داخل الملعب وخارجه.
@ وفى الأربعينيات تواترت هزائمهم بالجمله..وقد أورد الحبيب ابوبكرعابدين ابوصدام نموذجاً بسيطاً لضغط الجنين، الذى مارسه المريخ على الهلال فى تلك الفترة بفوزه عليه فى 13 مباراة من مجموع عشرين جمعت الفريقين على مدى ثلاثة سنوات متتاليه عجز فيها الهلال عن تحقيق اى إنتصار على الزعيم.
@ تواصل الضغط العالى فى حقبة الخمسينات بأربعين فوزاً للمريخ مقابل 33 للهلال.
@ فى الفترة من مارس1950 وحتى سبتمبر1952صام الهلال عن تحقيق اى فوز على الزعيم..وحقق الهلال اول فوز له فى القمة بعد عامين ونصف العام وكتبت الصحف وقتها(الخرافة التى تقول ان فنائل المريخ وحدها قادرة على هزيمة الهلال إنتهت أخيراً).
@ فى حقبة الستينات إنتقل المريخ الى مرحلة(الضغط القاسى)بالفوز بمتواليه الثمانيه..وهو ضغط غير قابل للتخفيف لأن الأهلة عجزوا عن معادلته حتى اللحظة.
@ فى حقبة السبعينات إستحدث المريخ إنجازاً جديداً نقل به ضغطه على الهلال الى مرحل(الضغط العنيف)محققاً الفوز بالدورى المقفل والمقفل ناقص نقطة!
@ جاءت حقبة الثمانينيات لتنتقل فيها علاقة المريخ بالهلال من مرحلة(الضغط العنيف)الى مرحلة(الضغط الجوى)عندما سبقهم فى تحقيق الكؤوس الجوية والبطولات القارية والأقليمية.
@ فى التسعينيات إستحدث المريخ نوعاً جديداً من الضغط على شقيقه الأصغر عندما ختم تنافسه معه فى بطولة دورى الخرطوم بتفوق تاريخى..وقد أطلقنا عليه أسم (الضغط الثابت)لأنه غير قابل للمعادله نهائياً.
@ فى مطلع الألفيه الجديدة إبتدعت الصفوه نوعاً جديداً من الضغط على أحبابنا الأهلة وهو الضغط المزدوج.
@ تم الضغط عليهم فى الملعب بتحقيق بطولة الممتاز 3مرات متتاليه وخارجه بثورة المنشآت التى أحدثت ضغطاً هائلاً من القواعد الزرقاء على مجالس الوصيف.
@ هنالك ضغط متفرد مارسه الزعيم على وصيفه فى البطولة التى تحمل إسم الوطن ..وأطلقنا عليه أسم (الضغط المستفحل)حينما فاز المريخ بلقب كاس السودان 23 مرة مقابل سبعة مرات فقط للشقيق الأصغر.
@ فرض المريخ على مهاجمى الهلال حظراً طويلاً يقارب فى عمره الحظر المفروض من الأمريكان على الكوبيين..وفشل بموجبه كل المهاجمين الزرق من الوصول للشباك الحمراء 19 سنه متتالية.
@ (الضغط المتواتر)الذى مارسه الزعيم على شقيقه الأصغر منذ لحظة الميلاد تحول فى بعض المراحل الى محفز للإبداع ودافع للإجادة لدى الأهلة..وجعلهم يظفرون ببطولة الدورى خمس سنوات متتالية..لتصبح تلك البطوله آخر قلعة زرقاء صامدة فى وجه محاولات الضغط الحمراء العالية!
@ ونتوقع لتلك القلعة ان تنهار قريباً بفعل الضغط المتصل مثلما إنهار تفوقهم على الزعيم فى دورى الخرطوم.
@ خلال الألفية الجديدة شرع الزعيم فى ممارسة نوع جديد من الضغط على شقيقه الأصغر ببناء الطابق الثانى.
@ وهاهم الأهلة يجتهدون فى بناء المقبرة الزرغاء..أقصد الجوهرة الغبراء!
@ إحصائيات القمة تشير الى ان الهلال لم يحقق سوى فوز وحيد على المريخ فى آخر 13 مباراة قمة.
@ آآخر خبر: معنويات الصفوة فى العلالى..والضغط عالى!! .