مقالات متنوعة

إسماعيل جسن : بالدارجي والفصيح.. تسجيل عمر قرار صحيح


* طالما أن المعلم عمر بخيت لاعب كبير في السن.. وخرف.. وما عندو شي ممكن يقدمو للمريخ… ناس الهلال زعلانين من تسجيلنا ليهو ليه؟؟!!
* مالم ومالنا؟؟!!
* مش يمكن نحن بنحب اللعيبة العجايز المسيحين ركب وبلالي؟؟
* مش ممكن يكون عندنا جن اسمو اللعيبة المخرفين الطاعنين في السن؟؟
* أقول ليكم حاجة يا أهلة وما تزعلوا؟؟
* في صفوفكم الآن أكتر من لاعب خاتي بالو لينا.. ويتمنى أن يجينا حتى ولو بعد 14 سنة زي عمر بخيت والمعز محجوب.. أو بعد 17 سنة زي هيثم مصطفى..
* وأقول ليكم حاجة تاني.. نص اللعيبة الفي كشفكم الآن بحلموا بينا ليل نهار.
* طيب…
* لو جونا وقلنا ليهم ما دايرنكم عيب.. ولو سجلناهم تحننونا بالجقليب..
* نسوي شنو عاد..؟؟
* ثم ثانيا.. ما الغريب يا داؤود لو الهلال سجل سيدا سنة 1996م ولفت الدايره وجينا نحن سجلناه سنة 2012م..؟؟
* وشنو يعني لو الهلال سجل المعز محجوب وعمر بخيت سنة 2002م وجينا نحن سجلنا الأول سنة 2014م والثاني عام 2015م..؟؟!!
* نجوم المريخ السابقون عبده الشيخ وادوارد وباكمبا ووليد علاء الدين والشغيل وفيصل موسي الفي صفوف فريقكم الآن سجلناهم نحن متين وسجلتوهم إنتوا متين؟؟
* أما السؤال الأهم.. من هو اللاعب الذي سجله المريخ من الهلال مباشرة؟
* الباشا سجلناه من هلال الساحل..
* مجاهد سجلناه من جزيرة الفيل..
* طمبل سجلناه من اورلاندو الجنوب افريقي..
* كليتشي عقدو انتهي وقال ما دايركم ولو وزنتموه ذهبا..
* هيثم شطبتوه.. عبده جابر شطبتوه.. المعز شطبتوه.. عمر بخيت شطبتوه..
* أما أنتم فلقد سجلتم منا مباشرة..
* ادوارد جلدو فاوضتموه قبل أن ينتهي عقده معنا…. باكمبا حرضمتوه على التمرد عن طريق حوار في إحدى صحفكم المغرضة لتسهل عليكم عملية تسجيله..
* علاء الدين راعي الضان في الخلا يعرف كيف اغريتموه بمبلغ خمسين مليون زيادة..
* وحموده بشير لا أحد يجهل الطريقة القبيحة التي تمكنتم بها من خطفه وإخفائه في استراحة المسؤول الكبير بالجزيرة بينما كان في طريقه إلينا لتجديد عقده ..
* وأخيرا الشغيل الذي إتفق معه المريخ على الاستفادة من خانته مؤقتا حتى يشفى من الإصابة التي كان يعاني منها ثم يعود عزيزا مكرما إلى الكشف في التسجيلات التالية مباشرة مع التعهد الكامل بالتعامل معه معاملة اللاعب المسجل، وصرف مرتبه الشهري وكل الحوافز الجانبية، تحركتم كالعادة من خلف الكواليس ولعبتم لعبتكم معه.. وكذلك فيصل موسى..
* بإختصار… المريخ لم يحدث في التأريخ القريب أن سجل لاعبا من هلال أم درمان مباشرة. إنما الهلال هو الذي سجل عددا من اللاعبين من المريخ مباشرة..
* ختاما بقي أن نكرر القول لإعلام الهلال بأن معظم نجومه ينامون ويصحون على حلم الانتقال للمريخ.. بل وأن في صفوفهم الآن أكثر من لاعب عرض نفسه على المريخ في التسجيلات السابقة والحالية، ولكن عرضه لم يجد التجاوب لأسباب مختلفة.
آخر السطور
* بدل أن تكتب الزميلة قوون الراتب الشهري لمحترف المريخ الجديد ديديه بالعملة الصعبة (خمسة آلاف دولار) كراتب عادي ومعقول لمحترف في حجمه، وينافسنا عليه ناد كبير هو الترجي، كتبته بالعملة المحلية (45 مليون جنيه) شهريا ليبدو للقراء وكأنه راتب مهول وكبير..
* طيب على الأقل كان تقول (45 ألف جنيه) بالجديد..
* عموما يا ريت قوون تورينا كم يتقاضى اندرزينهو وجوليام شهريا. لنقتنع بأن هدفها من تناول راتب ديديه هدف نبيل.
* سيد سليم وصف تسجيل المريخ لعمر بخيت بأنه مكايدة للهلال..
* يا كوتش المريخ ما فريق صغير عشان يفكر بالطريقة دي.
* مكايدة شنو وكلام فارغ شنو؟
* المريخ محتاج للاعب في المحور .. وليس في السودان حاليا من هو أفضل من عمر بخيت ليملأ هذه الخانة. لذا قام بتسجيله..
* أما عامل السن فأنت سيد العارفين بأن المعلم أصغر من الطاهر حماد وفيصل عجب وهيثم مصطفى وعلاء الدين والمعز وأيمن سعيد…
* بقت عليهو يعني؟!
* غير كده يا كوتش فإن أي ناد في العالم يحتاج لعدد من نجوم الخبرة في صفوفه أكثر مما يحتاج للنجوم الشباب.. لذا يبقى الريال على كاسياس وراموس وبيبي وبنزيما ومارسيلو ويبقى البرشا على تشافي وانيستا والقائمة تطول إذا استعرضنا اسماء اللاعبين الذين تعتمد عليهم الأندية الكبيرة المعروفة رغم كبر سنهم.
* وكفى.