محمد عبد الماجد

هلال الفاشر وهلال الابيض وهلال كادوقلي وهلال (جمال الوالي)


· الناس تذكر للجنوب (سبت دودو) صقر افريقيا ..الذي كان يحظر (اجواء) مرماه ويقطع (الارضي) فيها

· بعد (عمر بخيت والمعز محجوب وبكري المدينة وعبده جابر واحمد الباشا وعلاءالدين يوسف وتراوري) ..مجلس المريخ يقاطع الصحف الهلالية

· المريخ المجموعات دخلها ليه (بكري المدينة)..لو على ناس رمضان عجب كان طلعتوا كالعادة من دور الـ (64)

· من الشرق ..جاء الطبيب الفنان محمد حسين كسلا ليمثل القاش والتاكا وتوتيل وليقدم (القهوة) في المستطيل الاخضر فنشربها (اهداف)

· الدوري الممتاز بقى كلو (اهلة).

· ممكن بعد سنتين تلاتة ..جميع اندية الممتاز تكون بتحمل اسم (الهلال) تشبها وانتسابا لهلال السودان الذي اخرجته (ام درمان) ليمثل السودان كله بتشكل ام درمان المعروف وبتعدد الوانها و اختلاف ثقافاتها.

· ام درمان هي السودان مصغرا ..اي هي العنوان الابرز والاوضح للسودان والمختصر المفيد له.

· الهلال ..لخص السودان كله وقدمه بتعدد ثقافاتها ولهجاته.

· الناس تذكر للجنوب (سبت دودو) صقر افريقيا ..الذي كان يحظر (اجواء) مرماه ويقطع (الارضي) فيها.

· ولجنوب السودان ..العديد من الاسماء التى مثلت الجنوب بمدنه المختلفة ..وقد امتد فينا الجنوب حتى بعد الانفصال ليكون جمعة جينارو واتير توماس.

· عروس الرمال (الابيض) ..اعطت اجمل (موسيقاها) للهلال عندما منحتنا منصور بشير تنقا.

· اجمل لحن.

· لتقوم المدرجات وتقعد مع صاحب القدم اليسرى …(تنقا) الذي كان من اجمل واروع (مقطوعات) الهلال الموسيقية.

· من الشرق ..جاء الطبيب الفنان محمد حسين كسلا ليمثل القاش والتاكا وتوتيل وليقدم (القهوة) في المستطيل الاخضر فنشربها (اهدافا).

· وامتد الاثر عند مجدي كسلا …المدافع الصلد.

· مثل كسلا …كانت كادوقلي ..التى اهدت الهلال من جبالها الـ (99) المرتفعة عزة وشموخ اللاعب (جلال كادوقلي).

· من عطبرة جاء القاطع الراسخ رسوخ نهر عطبرة زغبير ..وكان القاطرة شوقي عبدالعزيز الذي جسد (الحديد والنار) في دفاع الهلال وقطع الموية والنار من اي مهاجم بحلم ساكت يدخل ملعب الهلال.

· من شندي كان عثمان الجلال …بحلاوة منقة شندي وموزها ..حيث كان فاكهة الهلال وهو احد منارات سفراء السودان بالخارج.

· والاخوان معز ومعتز كبير.

· من مدني حيث الثقافة والادب والفن ..يبقى العطاء عظيما للهلال يتوافق مع عطاء مدينة ظلت تعطي السودان بلا حدود.

· حيث الديبة وحمد دفع اللـه وعصام غانا وقلة الى والي الدين محمد عبداللـه الذي جاء للهلال من النيل مدني.

· من دنقلا كان الحريف القصير خالد دنقلا.

· من بورتسودان الطاهر حسيب …و…و…

· من الفاشر الامين جلاب.

· هذه نماذج وامثلة محدودة قدمها الهلال ..مثلت السودان كله واثبتت قوميته ولخصت تلونه.

· قومية الهلال – وقومية السودان لا يمثلها (الهلال) وحده بجماهيرته التى تنتشر في كل انحاء السودان حيث له الغلبة والكثرة والشجاعة ايضا.

· يمثل الهلال ..هلال الفاشر وهلال كادوقلي وهلال الابيض …جميعهم ينتسبون للهلال الاب ويمثلونه بادب.

· مجموعة من الاهلة تبدع في الدوري الممتاز الآن وتسيطر على الاحداث الرياضية.

· بعض الاصوات كانت تنادي ان تجرد اندية الهلال والمريخ من هذه الاسماء ليبقى الهلال والمريخ فقط.

· هذه الاراء التى نادت بحظر الاسماء لتبقى حصرية على هلال ام درمان ومريخ ام درمان – لا تعرف ان انتشار الهلال والمريخ في مدن السودان وولياته المختلفة يمنحنا (رابط) نحتاجه.

· الهلال والمريخ من (روابط) السودان – يشكلان قوميته ..ويمنعان العنصرية والفرقة التى يعاني منها السودان.

· ان يبقى في الابيض هلال وفي الفاشر هلال وفي كادوقلي هلال وفي كوستي هلال وفي شندي هلال ..يعطينا ذلك (وحدة) اصبحنا نفقدها في السنوات الاخيرة.

· فان تفرقنا سياسيا – دعونا نجتمع رياضيا وفنيا.

· لا اريد ان اخوض في هذه الموضوع كثيرا فقد قصدت ان اضع عناوين للهلال تثبت قوميته.

· قدمنا بعض النماذج في اطار محدودة – واخذنا عناصر قليلة قصدنا بها التمثيل لا الحصر.

· المشكلة الآن ما في هلال الابيض..فهو ممثلا للرمال وللابيض وللتبلدي بنكهته السودانية المميزة.

· المشكلة ما في هلال الفاشر ..الذي يمثل لنا مدينة عظيمة ..كانت اياديها بيضاء على كل الممالك الاسلامية في افريقيا وفي الجزيرة العربية.

· فمنها يخرج النور والدعم ..ويطلع منها حفظة القرآن.

· وهي مازالت الى وقتنا هذا تمنحنا حفظة القرآن باصواتهم الجميلة ..وتقواهم العظيمة.

· المشكلة ايضا ليس في هلال كادوقلي …فعزة السودان تمثلها جبال كادوقلي بصمودها وهيبتها ووقوفها الذي لا يقبل الانكسار.

· ديل كلهم (اولادنا).

· هم مننا – ونحن منهم.

· وهم ما ناكرين الحكاية دي ولا داسنها.

· جميعهم يمثل الهلال في الاسم واللون ..والانتماء.

· المشكلة في جماعتنا ديل – البنكروها عديل كدا.

· وبقولوا ليك بعد (عمر بخيت والمعز محجوب وبكري المدينة وعبده جابر واحمد الباشا وعلاءالدين يوسف وتراوري) ..مجلس المريخ يقاطع الصحف الهلالية.

· انتوا وقت عندكم عزة قدر دي ..ما تقاطعوا اولادنا ديل.

· يمين نحن لا بنقاطعكم ولا حاجة.

· بنتابع اولادنا المعاكم ديل خطوة – خطوة.

· عاوزين ناس عمر بخيت وعاوزين تقاطعوا الصحف الهلالية.

· فالحين واللـه.

· اغرب من هذا – المنطق الذي جاء به الحبيب مزمل ابوالقاسم امس.

· مزمل ابوالقاسم ..امس عاوز يكحلها عماها.

· طبظها عديل كدا.

· كتب مزمل ابوالقاسم امس : (خلال اليومين الماضيين نشط كتاب الوصيف في معايرة المريخ بتسجيل عمر بخيت ، مدعين ان الزعيم يلهث وراء نجوم الهلال ، بدليل انه سجل ثلاثة من كباتن الفريق الازرق خلال السنوات الثلاث الاخيرة).

· دا كلام مزمل ..عشان ما يلخبطكم بي حكاية (كتاب الوصيف) التى استلبها من توصيف الهلالاب للمريخاب وكتابهم.

· وصيف شنو يا مزمل؟ ..انتوا هسع الممتاز البطولة الكبري عندكم فيه كم؟ لقب.

· ما تخلينا نحسبها.

· الممتاز خليه ..(المجموعات) دي بتعرفوا ليها شنو؟.

· قالوا دخلوا (المجموعات) بي (شدة).

· بتعرفوا (الشدة) – نعال كان بلبسوها الطلاب زمان في المدارس.

· المريخ المجموعات دخلها ليه (بكري المدينة)..لو على ناس رمضان عجب كان طلعتوا كالعادة من دور الـ (64).

· وهسع قالوا جابوا (المرشد) عمر بخيت ..عشان يوريهم مباريات المجموعة بتلعب في كم دقيقة؟.

· جماعتكم ما ناقشين اي حاجة.

· مزمل ابوالقاسم قال ان كتاب الهلال ادعوا ان المريخ سجل ثلاثة كباتن من الهلال في السنوات الثلاثة الاخيرة.

· يا مزمل انتوا الحقيقة بتعملوها (ادعاء).

· دا ما ادعاء ..دي حقيقة ..إلّا اذا هيثم مصطفى والمعز محجوب وعمر بخيت كانوا في الهلال (في مجلس الادارة).

· انتوا الحقائق عندكم (ادعاء).

· بي طريقتكم.

· دي حاجة ما بتخصنا.

· يقول مزمل في زاويته امس : ( بدءا نقول ان المريخ لا يرى حرجا في تسجيل اي لاعب مميز من اي ناد).

· يا اخوي يا مزمل ما في (ضل) بتحرج.

· انتوا (الاحراج) دا فارقتوه زمان.

· سيكافا كتلت قلبكم.

· والخروج من دور الـ (64) خلاكم بدون احساس.

· احراج شنو العاوزنو من ناس المريخ؟.

· دا امر نحن عافنكم منو؟.

· شوفوا مزمل بغالط الحقائق كيف؟.

· اقرأوا واحكموا براكم.

· يقول مزمل : ( سجل راجي وعلي جعفر وايهاب وزغبير من اهلي الخرطوم ومصعب عمر من اهلي مدني ورمضان عجب وامير كمال من الموردة وبلة جابر من حي العرب بورتسودان وضفر من نيل الحصاحيصا واحمد ابكر من الامل عطبرة ومجدي عبداللطيف من هلال الساحل والمعز والعقرب والمعلم من هلال الساهل).

· وييضيف الحبيب مزمل قائلا : ( اصلا الفرق الكبيرة بتسجل من الفرق الصغيرة يا محمد عبدالماجد).

· مزمل ما قادر يفرق ..ما قادر يستوعب لينا ان الذين سجلهم المريخ من الهلال استغنى عنهم الهلال اما بالشطب او بصرف النظر عن التجديد لهم.

· المريخ انتظر هيثم مصطفى (17) سنة ليستغنى عنه الهلال ..فيسجله المريخ بعد ان قام الامين البرير بشطب كباتن الهلال.

· تقول لي الفرق الكبيرة بتسجل من الفرق الصغيرة.

· هيثم مصطفى قعد سنة في بيتو ..عشان ما يلعب معاكم.

· على فهمك دا يعني نحن نمشي نسجل كمال عبدالغني وعاطف القوز وعصام الدحيش ونعتبر ذلك انجازا.

· يا مزمل المعز محجوب لعب في الهلال اكثر من عشر سنوات وصرف الهلال النظر عن تسجيله.

· دي معلومة ثابتة ما عاوزة (غوغل).

· إلّا اذا المعز دا غشاكم وقال ليكم لعبت في الهلال سنة ونص بس.

· وكذلك عمر بخيت الذي سجله المريخ من الاهلي الخرطوم بعد ان صرف النظر عنه من قبل مجلس الهلال.

· ريتشارد سجله المريخ بعد ان شطبه الهلال.

· ومجاهد احمد محمد شطبه الهلال وسجله المريخ من جزيرة الفيل.

· وعلاءالدين بابكر شطبه الهلال واحمد الباشا ..حتى علاءالدين يوسف الذي اقتلعه الهلال من المريخ (حمرة عين) بعد حادثة البصمة الشهيرة شطبه الهلال وسجله المريخ بعد ان مسح فييرا بكرامة المريخ الارض.

· انتوا قايلين الامين البرير دا كان رئيس برشلونة؟؟.

· يا مزمل انت الحاجات دي عارفها وإلّا بتكابر ساكت.

· الموضوع بتاعكم دا ما فيه بطولات ..وإلّا قررنا ان يبقى (النجم) في الهلال الى ان يموت.

· انتوا الآن ممكن تنتظروا (مساوي) الى ان ينهى الهلال التعاقد معه وتسجلوه.

· واكيد ح تنتظروا محمد عبدالرحمن واطهر الطاهر لو اللـه مد في الاعمار.

· الواضح ان جمال الوالي عندو (عقدة) رسمية من الهلال.

· جمال الوالي اي مدرب جاء الهلال مشى جابو ..فاضل ليكم (الفاتح النقر) يا مزمل ابوالقاسم.

· جمال الوالي زمان كان بنزل من المقصورة ويقول للمدرب ألعبوا لي بنفس الطريقة البلعب بيها الهلال.

· وقت لقى الموضوع صعب على ناس بلة جابر وموسى الزومة جاب ليهم هيثم طمبل وكلتشي ومجاهد والرشيد فيصل.

· انتوا قاعدين تنسوا.

· على العموم اذا كان عندنا هلال الابيض وهلال الفاشر وهلال كادوقلي ..بنقول كمان بقى عندنا هلال (جمال الوالي).

· ما اظن ناس هلال الابيض او الفاشر ..بجوا يوم ويقولوا نحن الاصل ..والهلال هو (الضل).

· انتوا يا مزمل لو عاوزين بعد الحاجات البتعملوا فيها دي ..تعكسوا الآية ..بنقول ليكم الناس بضحكوا عليكم.

· عشان انتوا في كل تسجيلات بتثبتوا لينا انكم (ضل).

· الهلال بقى يتلتل.

· الهلال ليهو (ضل).

· ……….

· ملحوظة : غارزيتو قالوا بزرزر ليك في الجماعة.

هوامش

· المنتخب الاولمبي امس قدم مباراة كبيرة.

· المدرب اخرج بشه الصغير واطهر الطاهر فخسر المنتخب في الدقيقة 88.

· يا الديبة حركات مازدا دي ما تعملها في الاولمبي.

· …………..

· عاجل : يا مزمل بي ناس عمر بخيت والمعز وبكري وعبده جابر والباشا وفييرا وتراوري …في الشوط التاني لو اتعصرتوا في مباراة بنقيف معاكم ..ما بنخلي (اولادنا) براهم – يضيعوا ساكت مع ناس ضفر ديل.


‫2 تعليقات

  1. يا مجمد عمر بخيت لن ينفع الهلال وتم شطبه وسينفع المريخ وتم تسجيله
    لماذا لان الهلال اعلى مستوى ( الرابع ) والمريخ (18) وعمر بحيت يمكن ان يكون فى المستوى اعلى من 18 واقل من 4
    ارجو ان يفهم مزمل ذلك

  2. اصلو الهلال كبييييير بلعيبتو وكتابو لكن البقنع الديك شنو وبعدين يا محمد عبد الماجد نحنا عارفين انو المريخ ضل الهلال في كل شئ حتى سلك عارفنو ضل محمد عبد الماجد قدر ماحاول يقلدك فشل