بابكر سلك

الله يستر علي الاهله الشرفاء من الجوهرة (الزرغاء )


*اها
*الجماعه في تونس بعقد قالوا نحنا من طرف بكري المدينه
*التوانسه احترموهم
*في تونسي خبيث شديد
*قال ليهم لو انتوا من طرف الشخص بكري المدينه ورونا سرعتو كم ؟؟؟؟
*لي اسي ماعرفوا الاجابه الصحيحه
*واحدين قالوا ميتين وستين سرعتو
*التوانسه قالوا ليهم كضبا كاضب
*ده لو واقف دائما وما بارح مكانو
*سرعتو تزيد في تلتمية ميل في الساعه
*واحدين تانيين قالوا خمسميه
*التوانسه قالوا ليهو كضبا كاضب
*ده في كورتنا في السودان اجي من دائرة السنتر زي (وجعلناها رجوما للشياطين )
*اقل من ثانيه كان داخل الخط
*ياخ ده جاري اعترضو مدافع من الترجي جري تاني
*اول مرة بنشوف زلمه بجري وهو جاري
*انتم موش من طرف بكري المدينه
*بكري المدينه طرفوا غير غير غير
*ده سرعتو تفوق زوز حصانات في اقصي سرعتهم
*قولوا ماشائ الله يا توانسه يا شافين كونفدراليتكم وين
*المهم
*جماعه من اهلنا قاعدين يتونسوا
*واحد فيهم قال شامي لي ريحة مطار
*قالوا ليهو دي ريحة بنقو يا غشيم
*ريحة المطار شميتها متين انت ؟؟
*قوم ارح ما تجيب لينا الهواء
*وبالمناسبة دي
*قالوا في بتاع بحر قاعد مع بتاعين ما بحر
*واحد من بتاعين المابحر اتكلم عن الصحف والصحافه والحاصل
*بتاع البحر قال ليهم
*انا شايف انو بجي يوم بلدنا بتنضف فيهو
*ولا بنلقي صحافه ولا ثورة ولا امبده زاتو
*جبره بس يا عمك
*غايتو بتاعين البحر ديل ببالغوا
*المهم
*سمعنا تحت تحت
*قالوا قاعة كردنه في الاحفاد غير مطابقه للمواصفات
*ولا زم تنزل عشان ما تقع في البنات
*كان دي الطريقه
*الله يستر علي الاهله الشرفاء من الجوهره (الزرغاء )
*اسقف علي كده يا صديقي عماد الطيب
*الوقعه في الحفره مازي الوقعه من طابق
*ولكن الحق يقال
*سمعنا برضو بالراجل التوم باعادة التشييد من جديد
*شركة صينيه لأ يا كردنه
*معلمين وطلب سودانيين وبابلوك امان يا مان
*المهم
*الليله الكلام كلو بحر
*الحبيب حامد بدوي قال لي نكته حلوه حلا
*قال في واحد بتاع بحر محتار
*قال متلخبط شويه
*ماعارف مواعد واحده الساعه اتنين ولا مواعد اتنين الساعه واحده !!!!!
*البحر في الحر ده كعب شديد
*والبورة في الزمن ده مع الفلس ده برضو صعبه شديد
*ايها الناس
*سيمبو الفاير سمو
*ضغط ليك الجماعه لما عرفوا حاجه
*ده الزيت يا عمك
*امس قالوا قبضوهوا حقو
*دولار ينطح دولار
*يا كده
*يا البرازيلي ابو اسرة كريمه يرجع يتفرج علي فالكاو
*وقال ليك سيمبو لما قبض
*كان بمسك دولار دولار
*يرفعوا للشمس ويعاين ليهو
*مفتح
*الزمن ده صعب شديد
*يعاين ليك جوه الدولار
*المابلقي فيهو السلك وصقر جديان ما بشيلو
*مابثق الا في السلك
*كمل الشمس زاتها
*وبعد استلمها قال
*ما قلولوتي فيوفوتي
*يعني ماقلتو فيفا !!!!!
*طيب ماكان من اول
*ايها الناس
*دخلنا مرحلة الجد
*بعد كده اعداد ممتاز
*واعداد جماهيري من عزام ولي قدام
*ونستنشق ريحة المطار بي مزاج
*ريحة مطار موش اي ريحه يا راجل
*محمد عبدالماجد
*بتعرف ريحة المطار ؟؟؟
*شميتها متين ؟؟؟
*تشمها قدحه
*قال تصنيف قال
*تصنيف بدون مطار
*زي تصفيف بدون شعر
*الليله مع السخانه دي السيره كلها بحر
*الحبيب جحا قال
*واحد بتاع بحر
*امو فتحت التلاجه لقتوا قاعد جو التلاجه
*قالت ليهو سجمي ده شنو
*قال ليها حبيبتي قالت دايره واحد مرطب
*اتلجي
*المهم
*مبادرة احباب حول المريخ رائعه
*ودور القروبات كبير جدا
*رأيكم شنو نعمل نفره تنافسيه
*تنافس شريف بين القروبات للدعم الشهري الثابت
*اي قروب مريخي يجمع تبرعاتو ويودعها الحساب المخصص
*اذا في الف قروب
*في الف دولار شهريا
*بمليون دولار شهري
*شفتوا القصه بسيطه كيف
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*من الخدمه المدنيه بكينا وقرفنا وشكينا
*ومافي جديد بالنسبه ليها ولا بالنسبه لينا
*الجلكسي صاحب الكلمه يا والينا
*صديقي عمار في رباعيه وصفها لينا
*صنقع ودنقر وقال لينا
*الواتساب والشغل اصلو ما بتلمو
*بيهو الموظف دائما متقل دمو
*في التلفون حالف كلامو يتمو
*والمواطن مسكين واقف وفاير دمو
*المواطن مسكين مولاي يفرج همو
*هيييييييييييييييييييييع
*مكاتب الخدمات بشوف فيها تردي
*تلقي الموظف لاهي وفي الغلط متمدي
*بالتلفون يورجق ومافي رنه تعدي
*ويحتل في الفطور لمن يجيك متغدي
*هيييييييييييييييع
سلك كهربا
ننساك كيف والمسئولين برضك يورجقوا فينا كاننا لا اشتكينا ولا جينا
والي لقاء
سلك


‫3 تعليقات

  1. العقم الذي اصاب صلعتك جعلك تردد في ببغائية بليدة كلمات سيدك الاصغر منك مزمل ( زرغاء) ياخ جيب حاجة من عندك. الله يصرفك

  2. لو مزمل كبيرهم دخل الجحر تلقاهم وراءهو داخلين من غير ما يسألو