زواج سوداناس

الكفر.. وبلاتر الختر



شارك الموضوع :

بلاتر رئيس الاتحاد الدولي لكرة القدم (الفيفا).. ما حفضتا اسمو وقبضتو.. علا الليام الفاتت دي.. قدر ما أفتح قناة فضائية بكل لغات العالم الحية والميتة والدايرة تموت.. إلا والقاهم ينضمو فوق بلاتر.. نزل انتخابات ونزل ضده كان الأمير الأردني علي بن الحسين.. فاز عليهو.. فاز بلاتر.. أضانا ما بردت من نضم اللنتخابات.. إلا وألقى بلاتر قالو قدم استقالتو.. بعد تلاتة أيام.. نان أول انت نازل انتخابات لشنو؟.. بعد شوية أسمع انو ورطان وجماعتو في قضايا فساد مالي.. وأمريكا دايراهو.. ودايرة تحقق معاهو.. هو وجماعتو.. المحيريني أمريكا دي ما زولة كورة.. زولة دواس بس.. الدخلها في الكورة شنو؟.. وتكوس لبلاتر السويسري.. وجماعتو كل زول من بلد ومن جيهة وتقول دايرة تحاكمهم وتشوف قريشات الفيفا دي مشت وين؟.. أها سمعت انو القروش المشت رشاوى للناس ديل مرت عبر البنوك الأمريكية وأمريكا اعتبرتو دا غسيل اموال عشان كدي أمريكا راسا والف سيف تحقق معاهم,.. لكن النضم دا برضو وراهو نضم.. ان بدت امريكا في محاكمة ناس ما من أهلها عشان بس استعملو بنوكها.. باقي لي دايرة تفتح الدرب لتحقيق في قروش تانية وناس تانيين غير ناس الكورة.. ودايرة توري باقي الدول القاعدة القروش تمشي ليها وببنوكها اننا نحن بنحاكم وانتو حاكمو وحققو برضو.. غايتو الله يجيب العواقب سليمة ويكضب الشينة.. والعندو قريشات في السهلة يلمهن عليهو ويسويهن في بقر ويطلقن في الخلا اخير لو.. واللا يقنع منهن وينكرن تب.. قبال ما يبقى في سين وجيم وشيل حال.. بلاتر عمرو فوق التمانين سنة.. أها الناس خلت قروش الفيفا.. ومسكت في بلاتر الرجل التمانيني وقالو بتاع نسوان.. ما نسوان بنيات صغار.. وبعض وسائل الإعلام جايبة اسامي يمكن عشرين واحدة ” شفتو قلة ادب العجوز دا؟ “دا غير إنو قالوا متزوج تلاتة مرات.. والبنات كلهن في العشرينات من العمر.. أنا براي بيني وبين نفسي قلت بلاتر دا بيعتبرن زي بنات ولادو.. يعني جدو.. وجدو الله يهدو.. علا ناس الإعلام متوكدين تب.. وقالو البنيات براااهن حدسنهم.. واخر واحدة قالو كانت عارضة ازياء روسية عمرها تسعة وعشرين سنة عندها علاقة مع لاعب الكرة الشهير رونالدو وباقين علي العرس تب.. ويلم فيها بلاتر ويلف لها راسا.. تخلي رولاندو وتبقى على بلاتر.. حتى بلاتر كان بي يغير منو وقال انو رونالدو سفيه ومبذر و قاعد يصرف قروشو علي تصفيف شعرو!! مالك ومالو؟؟.قروشو وحر فيها إن شاء الله يجيبها السودان ويقسمها معاي!! وبعدين انت عشان عندك صلعة؟؟ أها تراكا حسي ورطان في نصيبة وهجيمة و تشرب ما تروى؟. انت كمان يا رونالدو الزول ما بيشيل قروشو كلهن ويكبهن في تفتو.. أما عارضة اللزياء الروسية دي براااها وسائل الإعلام ما شاكراها قالو واقفة علي حيلا و ما قاعدة في الواطا كل مرة عندها علاقة مع مشهور.. حسي قالو شايفنها حايمة مع الممثل الأمريكي برادلي كوبر لمن تغتس حجرو!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *