زواج سوداناس

اذا (النجم) حلقوا ليه ..(النجمة) تبل رأسها ساكت


شارك الموضوع :

في اليوم الذي وصل فيه المريخ الى تونس ..كان الهلال يلعب مباراة اعدادية امام النجم التونسي

تعرض الهلال في هذا الموسم لظلم كبير من الحكام ..في مقابل (خصخصة) التحكيم السوداني ليصبح تحكيم (مريخي) خالص

قلنا ليهم المريخ ليه سافر يا دوب للمعسكر؟…قالوا (السيستم) كان قافل…والمفتاح عند عبدالصمد

المريخ يختار طاقم الحكام لمبارياته المحلية ..اما طاقم الحكام للمباريات الافريقية فامرها متروك لمجدي شمس الدين الذي يحسن الاختيارات للمريخ

· الموضوع كدا بقى ليكم واضح.

· ما تعملوا فيها ما فاهمين.

· الموضوع ما عاوز ليه شرح …ولا تفسيرات.

· سيستم ساكت ما عاوز.

· ما تعملوها لينا كلها (سيستم).

· قلنا ليهم المريخ ليه سافر يا دوب للمعسكر؟.

· قالوا (السيستم) كان قافل.

· والمفتاح عند عبدالصمد.

· وعبدالصمد عامل زعلان.

· قروش المريخ قالوا قدر (عشرة ايام) معسكر في تونس.

· ما عندهم قروش اكتر من عشرة ايام.

· عشان كدا سافروا في آخر اسبوع.

· الهلال داخل في الاسبوع الثالث ..وانتوا يا دوب في اول اسبوع معسكر.

· زعلة عبدالصمد ..جهجهت (معسكركم).

· وقفلت (السيستم).

· في اليوم الذي وصل فيه المريخ الى تونس ..كان الهلال يلعب مباراة اعدادية امام النجم التونسي.

· الناس يلعبوا امام (النجم التونسي) وانتوا يا دوب وصلتوا تونس يا ناس المريخ.

· ومباريات اعدادية مع منو؟.

· مع النجم التونسي.

· شغل على عالي.

· اذا كنا في (الاعدادي) بنعمل كدا في (النجم) – في (النجمة) ح نعمل شنو؟.

· النجمة تبل رأسها ساكت.

· النجوم يتخارجوا لينا من هنا.

· ما عندكم قدرة على الشغل دا.

· الهلال غير قابل للخسارة حتى في التجارب الاعدادية.

· نلعب في الامارات.

· او نلعب في تونس.

· كل المباريات – الهلال غير قابل فيها للخسارة.

· ولا بنكضب.

· ولا بنجامل في الحتة دي.

· نحن كنا بنعتبر ان النصف الاول للهلال في هذا الموسم سوف يكون الاسوأ على الاطلاق.

· باعتبار ان الهلال اعتمد فيه على عناصر (شابة) وصغيرة في السن وصاحبة تجارب جديدة.

· وكنا بنعتقد ان الهلال سوف يتأثر (فنيا) لأن الهلال (جملة واحدة) فقد عدد ا من عناصره الاساسية (عمر بخيت والمعز محجوب ومهند الطاهر).

· وقلنا ان الهلال يحتاج لتعويض هذه الاسماء لفترة طويلة ..فوليد علاءالدين ومحمد عبدالرحمن واطهر الطاهر لن يسدوا ثغرة لاعبين خبراتهم كانت اكثر من عشر سنوات.

· عشر سنوات كان فيها عمر بخيت والمعز محجوب ومهند الطاهر من عناصر تشكيلة الهلال الاساسية.

· لم يغيبوا في مباراة عن تشكيلة الهلال – بل كان غيباهم في مباراة واحدة يؤدي الى ما لا يحمد عقباه.

· وليد واطهر وبشه الصغير ومحمد عبدالرحمن والصيني وبيتر ديل يا دوب في مطلع حياتهم الرياضية.

· ناس ايمن سعيد بعيشوا في (شيخوخة) في المريخ.

· ايمن وعلاءالدين والمعز وعمر.

· فوق ذلك فان الهلال استقدم لاعبين اجانب جدد …وهم حتى يعطوا ويظهر انتاجهم يحتاجون على الاقل لموسم …كعادة كل المحترفين الذين لا يظهر انتاجهم إلّا بعد موسم.

· الى جانب هذا فقد الهلال في بداية الموسم عناصر اساسية بسبب الاصابات ..فغاب عبداللطيف بويا وغاب معاوية فداسي ومحمد عبدالرحمن ..وامتدت الاصابات اثناء الموسم ليغيب كذلك نيلسون.

· ودخل الهلال الموسم الجديد بعد (تبديلات) فنية عديدة للجهاز الفني الذي تغيّر في المواسم الاخيرة اكثر من (12) مرة.

· مع كل هذه العوامل قدم الهلال موسما متميزا في النصف الاول من الموسم وكان حتى الاسابيع الاخيرة للممتاز يتقدم على المريخ بـ (4) نقاط ليتساوي معه في النقاط في نهاية الدورة الاولى للممتاز.

· علما ان للمريخ مباراة يفترض ان يلعبها امام الامل حسب قرار لجنة الاستئنافات التى اعادت المباراة بسبب مشاركة بكري المدينة الذي مازالت قضيته معلقة تلقى بظلالها على المريخ من ام درمان الى لوزان.

· الهلال في النصف الاول للموسم كان صاحب نتائج مشرفة ..اذ لم يخسر الهلال في النصف الاول للممتاز رغم التحديثات التى حدثت في الفريق.

· بل لم تستقبل شباك الهلال في النصف الاول للممتاز غير هدفين ..ليتميز الهلال في (نتائج) تعتبر قياسية بكل المعايير.

· تميز الهلال لم يكن على النطاق المحلي فقط ..بل تميز الهلال امتد بصورة اكبر في المنافسات الافريقية ليصعد الهلال لمرحلة المجموعات عبر اقصر الطرق وايسرها.

· الهلال افريقيا في 6 مباريات لعب نصفها في الداخل ونصفها في الخارج بنظام الاياب والذهاب لم يخسر غير مباراة واحدة ..ولم تستقبل شباكه افريقيا غير هدفين.

· بل الهلال في هذا الموسم لم يخسر غير مباراة واحدة – رغم من انه لعب اكثر من (6) مباريات اعدادية في الامارات في بداية الموسم ..ولعب مباراة امس امام النجم التونسي استعدادا لنصف الثاني للموسم تعادل فيها.

· الهلال لعب في بداية الموسم امام المريخ في مباراة الاستقلال تعادل فيها الهلال وحصل على (درع الاستقلال) عبر القرعة.

· وكان الهلال قد لعب مباراة الاستقلال وهو في مرحلة بناء …بعد ان فقد اكثر من سبعة عناصر من تشكيلته.

· مع ذلك تعادل الهلال امام المريخ الذي كان اكثر استقرارا واكثر انتشاء بعد ضم مهاجم الهلال السابق بكري المدينة.

· الهلال في نهاية الدورة الاولى للممتاز تعادل ايضا مع المريخ الذي دخل للمباراة وهو اكثر جاهزية ولم يعرف الانتصار على الهلال.

· مباراة القمة في الاستقلال لعبها الهلال بقيادة البلجيكي باتريك ..وعناصر يغلب عليها الحداثة وتعادل الهلال مع المريخ بل وفاز بدرع الاستقلال.

· مباراة القمة في الممتاز دخلها الهلال بقيادة فنية جديدة كان على رأسها التونسي نبيل الكوكي..وتشكيلة كانت تتكون من اطهر الطاهر ووليد علاءالدين ومحمد عبدالرحمن وعماد الصيني.

· مع ذلك لم يعرف المريخ سبيلا للانتصار على الهلال…وقد دخل المريخ للمباراة بعناصر اغلبها تمتلك دافع الانتصار على الهلال لأنها سبق لها اللعب في الهلال.

· حصيلة الهلال (الرقمية) في هذه الموسم – حصيلة مشرفة جدا.

· تعرض الهلال في هذا الموسم لظلم كبير من الحكام ..في مقابل (خصخصة) التحكيم السوداني ليصبح التحكيم (مريخي) خالص.

· معروف ان المريخ يقوم باختيار طاقم الحكام لمبارياته المحلية ..اما طاقم الحكام للمباريات الافريقية فامرها متروك لمجدي شمس الدين الذي يحسن الاختيارات للمريخ.

· مع كل هذه المساعدات ..يمضى الهلال بعيدا ..وتبقى انتصارات المريخ نتيجة لمساعدات الحكام والاتحاد العام الذي اصبح جزءا اصيلا من المريخ.

· ………..

· ملحوظة : المجموعات بي طريقتكم دي إلا تشوفوا ليكم (حكم) من قدماء لاعبي المريخ.

هوامش

· الكوكي حتى في تونس ..يلعب بي ناس عماد الصيني.

· امام النجم بنلعب بي عماد الصيني وجمعة.

· وبنتعادل بعد كدا.

· فى قوة عين اكتر من كدا.

· جوليام من اولها كدا.

· من هسع حجزنا ليه (خمسة نجوم).

· عاوزين لينا مباراة في الاستقلال مع المريخ.

· شوفوا لينا اي طريقة عشان نلعب امام المريخ.

· ان شاء الـلـه تشوفوا لينا قمة للتنصيب.

· اي حاجة مستعجلة كدا.

· عاوزين لينا مباراة قمة.

· عشان تشوفوا ناس جوليام.

· وجونيور.

· ووليد الشعلة.

· يمين تفهموا حاجة.

· افريقيا الهلال منافسه الاول والاخير في المجموعة فريق مازمبي.

· لذلك مهم جدا ان ينتصر الهلال على مازمبي وهو يلعب في ارضه ووسط جمهوره.

· انهوا موضوع مازمبي من بدري.

· الانتصار على مازمبي في المباراة القادمة يعني ان الهلال حسم موضوع التأهل من اول جولة.

· جاهزية الهلال الآن تبشر بالانتصار.

· يجب الاستفادة من تلك العوامل من اجل الانتصار على مازمبي.

· محليا الهلال سوف يلعب امام الاهلي شندي في الممتاز وامام الامل في كاس السودان.

· وهذه مباريات يمكن ان تعد الهلال بصورة نموذجية قبل مباراة مازمبي.

· ويمكن ان تدخل جوليام والشعلة وجونيور في اجواء المباريات التنافسية..وتخلق الالفة والتفاهم بينهم وبين لاعبي الهلال.

· عودة نيسلون اكبر البشريات.

· شفاء نيسلون ومشاركته وحده يمثل اضافة قوية للهلال.

· اذا اصبح كشف الهلال خالي من الاصابات تبقى فرصة الهلال الاكبر في الفوز بلقب البطولة الافريقية.

· ننتظر ان يكتمل شفاء محمد عبدالرحمن بصورة مثلى.

· …………….

· عاجل : تاني نحن المريخ غير (الرديف) ما عندنا ليه شيء.

شارك الموضوع :

تعليقات الفيسبوك

تعليقات


2 التعليقات

      1. 1
        طارق

        يا بليد يا متخلف الهليل بتاعكم لعب مع الشفع الصغار بتاعين النجم الساحلي وما قدر يغلبهم عشان ما تتغشي ساي وزي ما سمعت كاس ما جابوه ناس هيثم وداريوكان وكلتشي والمعز زمان. ما بجيبوه ناس بشة. عرفت يا عوير؟ بعدين لمن تكتب ما تفتكر القراء ديل عويرين زيك

        الرد
      2. 2
        اهل بيزنطة

        آ جنا نحنا عندنا قروب اسمه اهل بيزنطة غير الفارغة ما عندنا شغلة عليك الله انضم ليك وحنعملك الريس بتاع المجموعة

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *