زواج سوداناس

سوي الجبنة يا بنيّة



شارك الموضوع :

تاريخيا البن أقدم من الشاي في السودان.. ويعتبر البن وسواة القهوة والجبنة في المجتمع السوداني قعدة ونسة.. وقرقراب.. يقول العلماء أحسن وقت لشراب البن هو نص النهار.. يعني من الساعة اتنطاشر لي اتنين.. لكن الفنان البجاوي المرحوم آدم شاش كان عندو رأي تاني :-
سوي الجبنة يا بنيّة
في ضُل الضحاوية..
والضحاوية من تمانية صباحا لحدي حداشر صباحا.. شراب الجبنة يبدأ بالفنجان اللول (البكري).. والتاني.. (التني).. والتالت (البركة).. آدم شاش شدة ما مبسوط من البنية التسوي الجبنة في ضل الضحاوية.. قال ليها:-
فنجان جبنة بي شمالو
يسوى الدنيا بي حالو..
يعني فنجان جبنة بيدك الشمال.. يساوي الدنيا.. وبعد داك إن شاء الله تخرب.. وتتقلب فوق تحت.. داير يضيع الدنيا والإنسانية كلها عشان فنجين قهوة من المرا العيسرا دي.. وفي موضع آخر صراحة ما عرفت آدم مالو جاب سيرة بابور البحر والديش؟:-
بابور بحر بي ديشو
ماشي طوااااالي
ما دام ماشي طوالي.. مافي داعي للنضم فيهو.. لكن يكون ادم عندو فهم تاني.. واللا يا ربي دا يكون نوع من الغزل والمشاغلة للبنية؟.. لكن يشاغلها بي بابور البحر والديش؟.. أصبحت القهوة في أيامنا دي متطورة.. وبعضهم قد اختصرها في كباية شاي بدل الفناجين.. وبعضهم يدوح ويكوس للجبنة الحبشية وين؟.. ويمشي يتفرجخ في بنبر.. ويملص مركوبو.. ويقعد يجغم ويتفرج.. وفي داخله “فنجان جبنة بي شمالو.. يسوى الدنيا بي حالو”.. ويغرق في شراب الجبنة ويردد “الزول ينسى روحو. . و.والديهو وجناهو.. ويدفع لك حياتو لخاطرك ضريبة”.. وهو يكون حق النفايات ما قاعد يدفعو!!
القهوة شراب عالمي.. 90% من سكان الكرة الأرضية بيشربو قهوة.. عشان كدي بقت فيها تفانين في صناعتها.. وشركات قايمة علي البن وتجارتو.. ومقاهي فاتحة بيوت من سواة الجبنة.. وأسعار في البورصة العالمية.. الذ مذاق لقهوة.. قالو قهوة معمولة من (براز) الفيلة.. الفيل يأكلوهو حب بُن.. ويجو بعد فترة يلقطو بعرو.. ويفقشوهو ويمروقو الحب.. ويغسلوهو ويسوهو جبنة.. . وهاك يا ونسة ويا قرقراب.. . وغالي غلاء شديدة.. قالو الكيلو منو بي الشي الفلاني من الدولارات.. نان انتو قايلين بن البعر دا.. بيشربو اي زول؟.. زولاً ما بيقول أنا أنا.. يبقى لو بالسم.. . غايتو البن الحبشي ما سمعت فيهو نضم.. والحبشة زااااااتا مافيها فيلة الحمد لله.. علا مليانة ست ناس.. والساتر الله!
البن الليل الفيلة دا قطع شك ما بيمشي علي خشمنا.. لكن النصيبة انا خايف من شاي ليبتون سماحتو دي ما سماحة نصاح.. غايتو اليوم داك شايف في التلفزيون في سريلانكا في مزارع الشاي.. الناس يمعطو وياكلو في ورق الشاي.. وخوفي من نظرية بُن الفيل.. ونحن نجي هنا.. نشرب ونتمطّق.. وشاي صاموطي!! ولا اعفي نفسي من قائمة المصمطيّن!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *