محمد عبد الماجد

وقت بتلعبوا في (ملاعب الفنادق) السفر لتونس لزومو شنو؟


قالوا المريخ يلعب امام نجوم الدوري التونسي…طيب يا جماعة منطقي (النجوم) ديل اسم واحد معروف تقولوه لينا ما فيهم

ملاعب الفنادق دي بتعادل هنا في السودان (ملاعب الخماسيات) عشان بس تبقوا عارفين

وقت بسجل ليكم (ضفر) طيب انتوا (ديديه) دا مسجلنو (حرس صيد) ..جايبنو يركب ليكم (انبوبة الغاز)…يظبط ليكم (الطبق)

يكونوا ديل ولاد الحلة…او يكون المريخ دا لعب مع (العمال) الشغالين في فندق (قرطاج)

· الحمدلله ان الهلال كل مبارياته التى لعبها في تونس لعبها امام فرق معروفة..(ما قاطعنها من رأسنا).

· فرق تهز وترز.

· ولا جايبنها من (غوغل).

· ولا شيلنها من (العلاقات العامة).

· الهلال لعب امام النجم التونسي ..(وما في زول ممكن يقول ما بعرف النجم التونسي).

· عشان البقول كدا الناس بضحكوا عليه.

· وبنقطع ليه (اضنينا) لو ما سبقونا عليها ناس (المحلية) وقطعوها ليه قبل ما نصلو.

· ممكن النجم التونسي يكون لعب بالرديف او بالصف الثاني …لكن اظن ناس جمعة جينارو ويونس الطيب ديل برضو بيلبعوا في (الصف التاني).

· يعني رديف فريق كبير – بلاقى رديف فريق كبير.

· المباراة كانت في ملعب رسمي …ما في (حوش).

· ولا قدام البيت.

· الهلال تعادل امام (النجم) وصيف الدوري التونسي بهدف (جوليام) حديث العهد بالهلال.

· لاعب في اول (6) دقائق جاب ليه قون.

· المباراة الثانية للهلال في تونس كانت امام (الملعب التونسي).

· وكلكلم بتعرفوا (الملعب التونسي).

· العاوز ينكرو عشان نحن لعبنا امامه بيبقى ما عندو موضوع.

· ولا عندو رأس.

· وما بحضر (عالم الرياضة) كمان.

· الواحد فيكم يحضر (عالم الرياضة) ويقعد يحلل لينا.

· يحمينا النوم.

· الملعب التونسي الهلال لعب معه بيونس الطيب ومعتصم وبشه الصغير والصيني والثعلب ووليد علاءالدين واطهر الطاهر ووليد الشعلة.

· بهذه الاسماء التى لا خبرة لها – استطاع الهلال الانتصار على فريق (الملعب التونسي) في تونس.

· الملعب لعب في (الملعب) الرسمي للمباراة …ملعب عديل كدا.

· انتصر الهلال على الملعب بهدف (وليد الشعلة).

· مرة جوليام.

· ومرة وليد الشعلة.

· عشان نثبت ليكم عمليا ان تسجيلات الهلال ناجحة ..وما فيها كلام.

· انتوا بعد الكلام دا بتفتكروا نحن قاصدنها.

· المباراة الاولى يجيب (جوليام).

· والمباراة التانية (وليد الشعلة).

· نظام ..اي حاجة بي تخصص.

· والمباراة الثالثة بنخليها للعلماء.

· للاساتذة الكبار.

· ناس كاريكا.

· واي حاجة نحن عندنا بي نظام – ما زي جماعتكم ديل ..بعد التسجيلات بيسجل ليهم (ضفر).

· طيب انتوا (ديديه) دا مسجلنو (حرس صيد).

· جايبنو يركب ليكم انبوبة الغاز.

· يظبط ليكم الطبق.

· ما شفنا ليه اي كورة.

· العلم وين؟.

· العلم في المباراة الثالثة.

· الهلال في المباراة الثالثة لعب امام (منتخب).

· منتخب عديل كدا.

· منتخب استطاع ان يبعد المنتخب الاولمبي السوداني.

· عشان ما تقعدوا تنظروا لينا ساكت.

· وما تتكلموا ساي.

· الكلام قبل ما تقوله ..اعقله.

· اذا كان المتحدث مجنون ..المستمع يكون عاقل.

· المنتخب الاولمبي التونسي استطاع الهلال ان ينتصر عليه – بعد ان منح المدير الفني للهلال نبيل الكوكي الفرصة لكل لاعبي الهلال.

· دخل الهلال المباراة الثالثة بي ناس كاريكا وبشه ونزار الصاقعة.

· دخلها الهلال بـ (العلماء).

· مع مشاركة وليد علاءالدين ومالك ووليد الشعلة.

· اصلو نحن ما عندنا حاجة ساكت.

· معسكر يعني معسكر.

· الهلال امس استطاع ان ينتصر على المنتخب التونسي بهدف مدثر كاريكا الذي سجله من الدقيقة الثالثة من عمر المباراة.

· خلوا ليك المنتخب الاولمبي يلوص من الدقيقة الثالثة – زي الما عارف حاجة.

· من الدقيقة الثالثة بفتشوا للتعادل.

· وما في طريقة.

· مع (مكسيم) ما في اي طريقة.

· ولا تفكروا في الوصول لي شباك الهلال.

· لو عندكم شغلة غير دي شوفوها.

· يا عيال ألعبوا بعيد.

· عليه الاندية او (المنتخبات) التى لعب امامها الهلال في تونس كلها اندية معروفة..ومنتخابات لها وزنها في القارة.

· ما زي جماعتنا ديل ..بلقطوا ليهم (توانسة) من الشارع ويلعبوا امامهم ..ويقولوا ليك ديل نجوم الدوري التونسي.

· ناس من الحلة ساكت.

· اسم واحد فيهم ما قالوا لينا.

· عشان تعرفوا الزول وقت يقطع من رأسو.

· قالوا المريخ يلعب امام نجوم الدوري التونسي…طيب يا جماعة منطقي (النجوم) ديل اسم واحد معروف تقولوه لينا مافيهم.

· ديل نجوم شنو؟.

· غايتو إلّا يكونوا نجوم (تنس).

· الزول السجل الهدف في المريخ – ما قالوا لينا اسمو.

· يكونوا ديل ولاد الحلة.

· او يكون المريخ دا لعب مع (العمال) الشغالين في فندق (قرطاج).

· قالوا ليك ساعة المباراة ..(النزلاء) في الفندق – مويه يشربوها ما لقوها.

· العمال كان عندهم مباراة.

· ادارة الفندق قالت ليهم شوفوا (الحمام) دا …بيطبخ كيف؟.

· بي ياتو طريقة؟.

· وناس المريخ فرحانين …انهم لعبوا امام نجوم الدوري التونسي.

· اول حاجة عشان احددها معاكم.

· نجوم الدوري التونسي (الوطنيين) في المنتخب وعندهم مباراة مهمة في بعد ايام – ما فاضين يلعبوا مع المريخ.

· نجوم الدوري التونسي الاجانب ..غادروا تونس بعد انتهاء الدوري التونسي.

· يبقى كيف المريخ لعب امام (نجوم الدوري التونسي).

· يا جماعة قولوا ليكم كلام يتعقل.

· كلام يتبلع.

· ما كضبوا قدر دا كمان.

· يا عالم معقولة (نجوم الدوري التونسي) يلعبوا مباراة في ملعب (فندق).

· من قلة الملاعب.

· ديل لو كانوا نجوم كانوا على الاقل لعبوا في ملعب رسمي.

· ملاعب الفنادق دي ..اسألونا منها نحن.

· ملاعب الفنادق دي بتعادل هنا في السودان (ملاعب الخماسيات) عشان بس تبقوا عارفين.

· وقت بتلعبوا مع اي مجموعة من الناس ..مسافرين تونس لي شنو؟.

· السفر لزومو شنو؟.

· خسارة قروش بس.

· وطيارات – ما في ليها اي داعي.

· انتوا قالوا ليكم ملاعب الفنادق هنا ما في.

· ولا كان تتعبوا.

· ولا كان تركبوا ليكم طيارة.

· وقت ماشيين تلعبوا في ملعب فندق …كان في داعي تخسروا السودان العملة الصعبة دي.

· الموضوع ولا محتاج ليه طيارة.

· ولا عاوز ليه تذاكر.

· تعب ساكت.

· خاصة ان (تراوري) ما معروف وين؟.

· وعلاءالدين يوسف عندو برجم ..وبخش (الفيس).

· مرتاح يا كابتن ..بقيت بتاع (فيس بوك) ساكت.

· وايمن سعيد يا دوب واصل المعسكر.

· ولاعبو المريخ في المنتخب ينتظر ان يكون عادوا اليوم.

· يعني معسكرهم كلو في تونس ما اتجاوز ليه خمسة ايام.

· وبعد دا بلعبوا على ملعب الفندق.

· ديل الفندق النزلوا فيه …ما عاوزين يطلعوا منو.

· المباراة لعبوها قبلها في الملعب الرئيسي لفندق قصر قرطاج مقر اقامة البعثة.

· من الـلـه خلقكم شفتوا ليكم كسل اكتر من دا.

· والـلـه نحن لو عارفنكم بتقلدونا كدا.

· كان عسكرنا في (مدني).

· عشان ما نتعبكم التعب دا كلو.

· وفي النهاية يا ريت لو بتلعبوا امام فريق معروف.

· خلوه الفريق المعروف.

· يا ريت لو بتلعبوا في (ملعب رسمي).

· ديل بلعبوا في ملعب الفندق.

· تقول سافروا (سياحة).

· غايتو معسكركم دا وقت تجوا راجعين منو – قطع شك بتكونوا اتعلمتوا فيه هذه الاشياء.

· اول حاجة المعز محجوب وايهاب زغبير بكون اتعلموا كيف يطلعوا العربيات الوحلانة من الرملة.

· قالوا ليكم المعز وايهاب يطلعوا في العربات الوحلانة.

· ضفر وبكري المدينة بكونوا اتعلموا (صيد السمك).

· اصلو ما عندهم شغلة.

· معسكر بتاع سياحة ساكت.

· امير كمال وراجي عبدالعاطي بكونوا اتعلموا سباق الدراجات عشان يستعدوا لفترة التسجيلات.

· بالمناسبة نحن عندنا برمجة خاصة لامير كمال وراجي عبدالعاطي واحمد الباشا.

· الجماعة ديل الواحد فيهم لو ما وصل التسعة مليار اصلو ما بعيد تسجيلو.

· يا تسعة يا كمان جمال الوالي يغادر.

· يتخارج من بدري.

· المريخ سوف يلعب الخميس امام المنتخب الاولمبي..شوفوه بيأخد كم؟.

· اقل حاجة خمسة.

· خلوا حركات الفنادق دي واطلعوا ألعبوا برة.

· ………..

· ملحوظة : قال نجوم الدوري التونسي قال.

هوامش

· معسكر الهلال في تونس بكل القياسات يمكن ان نقول انه حقق النجاح كله.

· الهلال يوشك من اكمال الاسبوع الثالث في تونس.

· وفي جماعة كدا اسبوع ما كملوه.

· وبلعبوا في ملاعب الفنادق كمان.

· ومع اندية بقطعوا ليها اسم من رأسهم.

· الكلام دا (العلمة) ما بمرقكم منو؟.

· معسكركم دا ألحقوه بي (ملحق).

· الهلال ان شاءالـلـه جاهز موية ونور لمازمبي.

· ما عندنا اي مشكلة.

· ما بنقبل غير الانتصار امام مازمبي.

· الهلال مطلوب يبحث فقط عن الانتصار.

· احسموا موضوع التأهل من اول مباراة.

· والهلال قادر باذن الـلـه على ذلك.

· ……….

· عاجل : هجومنا كلو سجل جوليام – الشعلة – كاريكا.


‫2 تعليقات

  1. آ جنا ما قلت لي خبرك شنو؟ قلت ليك نحنا عندنا قروب اسمه (أهل بيزنطة) وغير الفارغة والمقدودة ما عندنا شغلة من صباحات الرحمن لي آخر الليل غير سواتك البتسوى فيها دي ما عندنا غيرها ، آها آ جنا الله وكيلك كايسين لينا رئيس وكل المواصفات تنطبق عليك أها شن قولك آ جنا؟