زواج سوداناس

خطاب مسوكر إلى والي الخرتوم



شارك الموضوع :

السيد والي الخرتوم..
بعد السلام والتحية..
أولك بالتبادي مبروك الولاية.. إن شاء الله ربنا يديك خيرها ويكفيك شرها.. وتبقى بخيتة عليك وتبقى انت بخيت عليها..
الخرتوم بلدا مو هينة ومو ساهلة.. دي ما خرتوم فيل دي كرش الفيل.. قدر مافي سوداني ضاقت بيهو عند أهلو ستف شنطتو وقال ماشي الخرتوم.. اتملت ناس لود عينا لمن دفقت.. مافي زول بيخلي أهلو وعزوتو وعزو ساكت.. قطعا القلعو من وسط أهلو الشديد القوي.. دحين انت قدامك مسعولية مو ساهلة.. داير ناس يشالبوها معاك.. ويبقو ناسا جمال شيل.. شغل الخرتوم ما نضم وونسة.. داير ناسا ليل نهار كايسة لي راحة المواطن.. وما ناس وجاهات ناس فهم وراي وشغل.. المجاملة ما بتنفع.. بتنفعك عند الزول الجاملتو علا عند الناس موقفك بيقى صعيب أن الزول الجبتو دا ما بيض وشيك.. بالرغم من انو النضم الحلو بخور البطن.. علا الفعل هو الدايرنو.. والنضم سااااهل أي زول ممكن ينضم.. ويشبك الناس بسوي وبسوي وبسوي.. خلي بالك الناس فترت وزهجت من قولة بسوي بلا سواة.. وبصراحة ناسك المعاك والممشين امور الولاية دايرين غربلة شديدة.. وتمرق لك منهم اتنين تلاتة فيهم فايدة.. قدامك ملفات كتيرة وشائكة ” يا قول ناس الجرائد”.. أهمها الأمن.. أمن المواطن في مالو وفي رقبتو. باقي أي شي براهو بنعدل بعد يبقى الأمن في.. اللفح والختف بقى في الشوارع.. والله ناس البوليس ما مقصرين قدرتهم قاعدين يسووها وبزيادة.. بس دايرين تزودوهم بالبي يساعدهم في شغلهم وتبقو فيهم عشرة.. كل يوم خبر في الجرايد عن شي ما يطمن حسي أول البارح واحدة من الجرايد جايبة خبر إنو واحد سكران في امدرمان لقوهو شايل (عبوة ناسفة) قرانيت.. سكران وشايل متفجرات بدل ما يبقى السكران في ذمة الواعي بقى الواعي في ذمة السكران ما دام شايل متفجرات.. يعني دا بسكرتو دي لو مرة بي حفلة وفيها دلوكة كاربة ينزل يعرض ويهوش ويفرطق الحفلة والحفلات المجاورة.. حتى لو راكب مواصلات هايس وبتاع الهايس مشغل غنية حماسة (سريع الكف للصقع).. وزولنا يهوش ويقول لهم “هيع.. أنا أخو أم روبة” ويفرطق الهايس.. والنضم بكتر والناس يقولو عمل إرهابي وهو زول سكران لقى قرانيت ما معروف لقاهو وين؟ المواصلات وفوضى المواصلات.. عربات عامة كتيرة وزحمة يشتغلو بمزاجهم وقت الذروة تتلفت ما تلقى ولا عربية كل واحد يشيل اهلو وخصوصا يومي الاحد والخميس.. ما بعرفو الفهم شنو؟ التعريفة بقو يقطعوها من راسهم.. الصباح سعر والضهر سعر وفي الليل سعر لنفس الخط ونفس العربية وممكن نفس كرسي النص البتقعد فيهو.. المواصلات بالرغم من أهميتها إن ما اتلقت الناس بتاخدها موزة.. لكن بس يكونو مطمنيين إنو مافي زول يختف من زول شي.. واللا تلاقيهو جحافل نيقرز.. تشيل العندو كلها.. ويدخل على وليداتو ايد ورا وايد قدام.. دا لو ايديهو بقن سالمات!!
و.. عشمنا فيك كبير!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *