أصدقائي.. و..علامات الخرف

في صفحة الباب البجيب الريح على الفيس بوك.. كتبت:-

من علامات الخرف تكون شايل موبايلك في يدك وتقلب البيت فوق تحت كايس ليهو.. ومن علامات التعمّق في الخرف تتصل منو على مرتك العند ناس أبوها:-

“الو.. هناء.. يا أخي أنا مليون مرة قلت ليكي لما تجي تضايري البيت دا.. حاجاتي ما تهبشيها.. ساعة كاملة كايس لي موبايلي وما لاقيهو..؟؟)

تفاعل أصدقاء الصفحة مع الحدث عالية.. وقعد كل واحد يحكي.. عن ما أصابه أو أصاب قريب له أو أحد معارفه مما أصابه من داء الخرف.. الغريبة لقيت إن الخرف لا يصيب كبار السن فقط.. برضو شباب في ريعان الصبى والشباب مخرفين..

وإليكم بعض حكاوي المخرفين الشباب..:-

“ود عمتي ماشي يلحق صلاة العيد باالاستعجال داير يخت الشال في كتفو ختا سروال طويل. قال الناس العيّد ليهم كلهم يعاينو فيهو باستغراب”، دي من أم مهند

“هههه بالمناسبة قاعد في البيت والوقت ضايق ماشي لي رفع عزاء شلت الريموت قاايلو تلفوني ووصلت بيت العزا بعد صلاة المغرب حتى دخلت إيدي ف جيبي.. أفوو” دا المخرف / الريح نميري

أما نادر رستم فحكى عن واقعة ولحظات خرف جماعي كتب:- “زكرتني القصة الحصلت لينا مع أبوي الله يرحمو لابس النضارة وبفتش عليها ونحن كمان كنا بنفتش معاهو”..

أما زكريا إبراهيم ذكر إنو في لحظات خرف عابرة “دخل السندوتش في جيبو.. وقرم الموبايل”.. هنيئاً!!

“دي جد جد واحد صاحبي شرب في سبيل وشال غطاية السبيل في إيدو ومشى ركب المواصلات والجماعه يعاينو ليهو زول نضم معاهو مافي الكمساري جاء داير حقو صاحبي لقى نفسو شايل صينية مصقرة وحاضنها فكاها ضحكة عالية الناس ما استغربوا لأنو صنفوهو مجنون من قبل ما يركب” من جمال عثمان للزوجة والإخوان والأخوات مع الأمنيات الطيبة!

أما الصديقة/ بت الطيب تتحدث عن التدريب على الخرف للأطفال كتبت “أنا خرفي ظنيتو بعادي لأنو مافي زول جمبي بنبهني يعني باكل ولدي الرضيع بدل أدي أخوهو الأكبر منو.. وألبس بتي هدوم أخوها وألبس أخوها هدوما والغريبة بقومو جاريين عادي ولا في واحد ماخد بالو”..

وخديجة آدم كتبت عن خرف النعلات “ولا مؤاخذة واحدة صحبتي لابسة فرد ة جزمتها وحدة والتانية شايلاها في ايدا وبتضرب بيها أخوها وتقول ليهو هسي كنت عاملها عربية وسايقها”.. كنت أتوقع أخوها يرد يقول ليها ّحجزوها ناس المرور..

نور العين صالح كتبت:- “مره بعمل في الفطور كسرت البيض في سله القمامه وحتيت القشر في الطوه وعااادي بشيل الحله اكون عاوزه ادخلا التلاجه أدخل بيها الأوضة وألقى نفسي بكابس في باب الدولاب”.. المشكلة تفتح الدولاب تلقاهو مسخن تقول التلاجة بااااااظت!!

دي عينات من الخرف.. والصفحة مليانة مخرفين.. والسهلة برضو كلها مخرفين.. الله يكون في العون بس!!